ភ្នំពេញៈ ថ្មីៗនេះតារាចម្រៀងស្រីរៀមច្បងត្រកូលខាត់ អ្នកនាង ខាត់ សុឃីម បានប្រកាសសួររកប្រភពទីកន្លែងរស់នៅរបស់កុមារា ២ នាក់បងប្អូនដែលត្រូវឪពុកម្តាយបំបរបង់ចោលបណ្តោយឲ្យរស់នៅតាមសម្មាអាជីវោ ប្រៀបដូចចកដែលរសាត់អណ្តែតកណ្តាលបឹង ក្រោយពីនាងបានឃើញគេថតវីដេអូបង្ហោះតាមហ្វេសប៊ុកមកនោះ។
នេះជាលើកទី ២ ហើយនៅឆ្នាំ ២០១៩ ដែលតារាចម្រៀងស្រីពហុជំនាញអ្នកនាង ខាត់ សុឃីម បានចេញមុខប្រកាសជួយទៅដល់ជនក្រីក្រ ឬខ្វះខាត ក្រោយពីបានមើលឃើញស្ថានភាពលំបាករបស់អ្នកទាំងនោះដោយកាលលើកដំបូងគឺស្ត្រី ឆេង ដានី អាយុ ២៦ ឆ្នាំដែលប្រកបរបររត់កង់៣ឥណ្ឌា និងលើកនេះជាកុមារា ២ នាក់បងប្អូនត្រូវឪពុកម្តាយបំបរបង់ចោលដែលទំនងជានៅឯតំបន់ក្រុងប៉ោយប៉ែត។
នេះបើតាមការបង្ហើបប្រាប់នូវដំណឹងជាបឋមរបស់តារាចម្រៀងស្រីដែលល្បីទាំងផ្នែកប្រពៃណី និងសម័យ សម្បូរទេពកោសល្យ អ្នកនាង ខាត់ សុឃីម ប្រាប់ឲ្យដឹងក្រោយពីនាងប្រកាសសួរតាមបណ្តាញសង្គមមក។
អ្នកនាង ខាត់ សុឃីម បង្ហើបឲ្យភ្នំពេញ-ប៉ុស្តិ៍ដឹងពីសុច្ឆន្ទៈចង់ជួយដល់កុមារាទាំង ២ ដែលត្រូវគេបង្ហោះវីដេអូតាមហ្វេសប៊ុកនោះថា៖ «ជាការពិតក្នុងចិត្តគឺអាណិតអាសូរ និងតាមរយៈវីដេអូដែលគេបង្ហោះនោះគឺនាងពិតជាមានអារម្មណ៍ខ្លោចចិត្ត និងអាសូរគ្នាខ្លាំងណាស់ ព្រោះថានៅវ័យក្មេងៗសោះត្រូវឪពុកម្តាយចោលហើយក៏ត្រូវខំរស់ដោយការដើររើសអេតចាយយកទៅលក់ ដើម្បីទិញបាយហូបជាមួយនឹងបងប្អូនទៀត ខណៈពេលយប់ព្រលប់ដេកតាមសំយាបផ្ទះគេទៀតផង។ បើតាមក្រុមអ្នកសួរនាំបន្តគ្នាជាមួយនឹងអ្នកបង្ហោះវីដេអូនោះដោយគេបង្ហើបប្រាប់ថា ទំនងជានៅឯតំបន់ប៉ោយប៉ែតដែលត្រូវឪពុកម្តាយរត់ចោលទៅធ្វើការងារនៅប្រទេសថៃបាត់ហើយ»។
នាពេលនេះអ្នកនាង ខាត់ សុឃីម ក៏មិនទាន់បានជួប និងជួយអ្វីទៅដល់កុមារាទាំង ២ បាននៅឡើយទេ ព្រោះថានៅមិនទាន់ដឹងពីទីកន្លែងពិតរបស់ពួកគេ និងមិនទាន់ច្បាស់ដែរថា តើក្មេង ២ នាក់នោះ គឺពិតជាអត់សាច់ញាតិ ឬក៏មានសាច់ញាតិ ក្រៅពីឪពុកម្តាយរបស់ពួកគេនៅឡើយទេ និងខ្លាចចាញ់កលរបស់ក្រុមមនុស្សមួយក្តាប់តូចដែលប្រើរូបភាពបែបនេះជាការបោកប្រាស់ដើម្បីលាភសក្ការៈ។
ប៉ុន្តែយ៉ាងណាអ្នកនាង ខាត់ សុឃីម ក៏បានដាក់ការសន្យាខ្លួនឯងរួចជាស្រេចហើយដែរថា៖ «ទោះជាយ៉ាងណា នាងខ្ញុំសន្យាថានឹងជួយពួកគេតាមភាពជាក់ស្តែង និងតាមការគួរ ក្រោយពីនាងខ្ញុំបានដឹងច្បាស់លាស់នូវព័ត៌មានពីពួកគាត់។ និយាយឲ្យត្រង់ទៅអាចចង់នាំពួកគាត់ទៅរកទីកន្លែងណាមានគេចិញ្ចឹមបីបាច់ឲ្យបានរៀនសូត្រ ឬចង់យកទៅផ្ញើនៅតាមទីវត្តអារាមហើយនិងរកវិធីដើម្បីជួយឧបត្ថម្ភពួកគេតាមលទ្ធភាព ដែលនាងខ្ញុំអាចធ្វើបានតែម្តង»៕