.jpg)
ភ្នំពេញ: លោក ជា វិបុល ពិធីករពូកែវោហាលាយកំប្លែងធ្វើឲ្យទស្សនិកជនសើចបឹទមាត់មិនជិតប្រចាំនៅផលិតកម្មរស្មីហង្សមាស បានដឹងដៃភរិយាស្រស់សោភាសម្រស់ក្មេងមិនចេះចាស់អ្នកនាង គង់ សុជាតិ ទៅជួយសម្រាលជីវភាពប្រជាជនក្រីក្រក្បែរកន្លែងចាក់សម្រាមក្នុងថ្ងៃគម្រប់ខួបអាពាហ៍ពិពាហ៍។
កាលពីថ្ងៃ ទី ៩ ខែវិច្ឆិកា កន្លងទៅនេះ ពិធីករក្រមិចក្រមើមរូបនេះបានបង្ហោះសារមួយនៅក្នុងបណ្តាញសង្គមថា៖ «ថ្ងៃទី ៩ ខែវិច្ឆិកា ឆ្នាំ ២០១៨ ខួបអាពាហ៍ពិពាហ៍គំរប់ខួប៥ឆ្នាំ។ ឆ្នាំនេះប្លែកបន្តិច ពីរនាក់ប្រពន្ធ និងក្រុមការងារអ្នកគ្រូព្រមទាំងសិស្សមួយចំនួនរបស់សាលាបណ្តុះបណ្តាលវិជ្ជាជីវៈសុជាតិ បានមកភូមិ បាគូរ សង្កាត់ ដង្កោរ ខណ្ឌ ដង្កោរ ដើម្បីកាត់សក់ និងជូននំចំណីបន្តិចបន្តួចដល់កុមារ និងអ្នកភូមិ»។
ពិធីករដែលសម្បូរទៅដោយភាពប៉ិនប្រសប់ ក្នុងការបរិយាយនៅលើឆាកតន្រ្តីបានបង្ហើបមក ភ្នំពេញ ប៉ុស្តិ៍ ថា៖«ជារៀងរាល់ឆ្នាំខ្ញុំតែងតែធ្វើខួបអាពាហ៍ពិពាហ៍ ទៅញ៉ាំអាហារជាលក្ខណៈគ្រួសារមានឪពុកម្តាយនឹងកូនចៅ តែមិនធំដុំអីទេ មិនហ៊ានរំខានក្រុមមិត្តភក្តិ ព្រោះពួកគាត់រវល់ ក្រែងចិត្តពួកគាត់គ្រប់គ្នា»។
លោក ជា វិបុល ក៏បានបង្ហាញពីមូលហេតុដែលគាត់មិនធ្វើដូចរាល់ឆ្នាំព្រោះ៖ «ការញ៉ាំអាហារជុំគ្រួសារហ្នឹងរៀងរាល់ឆ្នាំហើយ ពួកយើងក៏ចង់ធ្វើការងារសង្គមមួយ ហើយចំពេលដែលដែលគ្រូៗ និងសិស្សនៅសាលាបណ្តុះបណ្តាលវិជ្ជាជីវៈសុជាតិ មានគម្រោងទៅទៅជួបប្រជាជននៅតំបន់ចាក់សម្រាម អ៊ីចឹងទើបធ្វើឲ្យយើងទាំងពីរនាក់ (លោក វិបុល និងអ្នកនាង សុជាតិ) សម្រេចចិត្តលើកថ្ងៃខួប ទៅចូលរួមជាមួយខាងសាលា ព្រោះចង់ធ្វើឲ្យប្លែកជាងឆ្នាំមុនៗ»។
លោកក៏បានបន្តទៀតថា៖ «ដោយគិតថាក្មេងៗក៏បានសម្រាកពីការសិក្សា ហើយប្រជាជនក៏ប្រហែលជាសម្រាកពីការងារ យើងទាំងអស់គ្នាក៏បានចុះទៅជួយសម្រាប់អ្នកដែលគាត់ខ្វះខាត គាត់ត្រូវការកាត់សក់ ឫខ្វះអ្វីមួយដែលទាក់ទងនឹងសាលា (សាលាបណ្តុះបណ្តាលវិជ្ជាជីវៈសុជាតិ) របស់យើង និងមាននំចំណីអីតិចតួច វាមិនច្រើនទេ គ្រាន់តែចង់ចូលរួមក្នុងការងារសង្គមជាចំណែកតូចមួយនឹងចង់បង្កើតអនុស្សាវរីយ៍មួយដែរក្នុងថ្ងៃគម្រប់ខួបអាពាហ៍ពិពាហ៍ និងចង់បង្ហាញដល់មនុស្សក្នុងសង្គមថាការជួយមិនចាំបាច់ដល់ច្រើននោះទេ តិចតួចក៏យើងអាចធ្វើបាន»។
ចំពោះការងារទាំងអស់នេះលោក ជា វិបុល ក៏បានបញ្ជាក់ដូច្នេះដែរ៖ «កម្មវិធីនេះ(ការចុះជួយតាមតំបន់ខ្សត់ខ្សោយ)ធ្លាប់បានចូលរួមរួចហើយ។ ទោះយ៉ាងណាក៏ដោយក៏យើងបានចូលរួមក្នុងកិច្ចការសង្គមតូចមួយ ទោះវាមិនបានច្រើន តែគម្រោងនេះនៅតែបន្ត សម្រាប់ប្រជាជនដែលជួបការខ្វះខាត»។
ការឆ្លើយតបមកវិញនូវទឹកចិត្តរបស់លោក និងភរិយា (ជា វិបុល និងគង់ សុជាតិ) ពីប្រជាជន៖ «គាត់បានរាក់ទាក់ពួកយើងបានយ៉ាងល្អ ព្រោះគាត់បានស្គាល់យើងរួចហើយ គាត់បានដឹងនូវអ្វីដែលពួកយើងនឹងធ្វើ ពួកគាត់បានចូលរួមយ៉ាងច្រើនកុះករ ហើយក៏ពេញចិត្តនៅអ្វីដែលយើងធ្វើសកម្មភាពជាមួយគាត់ ទោះហត់ហើយក្តៅបន្តិចមែនតែពួកយើងក៏សប្បាយចិត្ត ពេញចិត្តនឹងធ្វើ ពេលឃើញស្នាមញញឹមរបស់ប្រជាជនទាំងអស់»៕
