.jpg)
កម្រងឈុតសម្លៀកបំពាក់ Dream Out Loud គ្រងដោយម៉ូដែលចម្រុះជាតិសាសន៍។ រូបថត សហការី
ភ្នំពេញ៖ ជាមួយតារាម៉ូដែលតូចចម្រុះជាតិសាសន៍ និងពណ៌សម្បុរ ប្រ៊េនសម្លៀកបំពាក់គិតគូរផលិតនៅកម្ពុជា The Extra Smile បានសម្ពោធបណ្ដុំឈុតរដូវកាលស្លឹកឈើជ្រុះ និងរដូវរងា ក្រោមឈ្មោះថា Dream Out Loud ដែលត្រូវបានរចនាដោយនឹកដល់ផ្នត់គំនិតអ្នកតស៊ូមតិ សិទ្ធិពលរដ្ឋ លោក ម៉ារទីន លូធឺរ ឃីង ជេអ័រ និង សិល្បករដ៏ល្បីក្នុងប្រវត្តិសាស្ត្រ ឡេអូណាដូ ដាវ៉ាំងស៊ី។
ប្រ៊េន សម្លៀកបំពាក់នេះត្រូវបានបង្កើតឡើងដោយស្ត្រីអឺរ៉ុប ២ រូប គឺ ហេឡេន ឌីវ៉ូស ជនជាតិបែលហ្ស៊ិក និង សាមេនថា ធូរ៉េត លីវីដ ជាតិបារាំង ក្រោមដើមទុនកន្លះលានដុល្លារ។
ស្ថាបនិក The Extra Smile ទាំង ២ រូប។ រូបថត សហការី
យោងតាមអ្នកនាង ហេឡេន និងសាមេនថា Dream Out Loud ត្រូវបានដាក់ឈ្មោះ ដើម្បីលើកកម្ពស់ការយល់ដឹងពីទាសភាព និងការរំលោភពលកម្មកុមារ ដើម្បីផ្ដល់សមភាព សុខុមាលភាព និងសុភមង្គលដល់មនុស្សគ្រប់រូប។
សហស្ថាបនិកបាននិយាយទៀតថា៖ «Dream Out Loud ចូលរួមសកម្មភាពដែលនឹងជះឥទ្ធិពលដល់អនាគតនៃពិភពលោកដែលយើងរស់នៅ។ សម្លៀកបំពាក់ធ្វើពីអំបោះសរីរាង្គធម្មជាតិ មិនប្រើប្រាស់ជាតិគីមីឡើយ»។
The Extra Smile បានប្រតិបត្តិការលក់សម្លៀកបំពាក់កុមារ ដែលរួមចំណែកដល់ការលើកកម្ពស់ជីវភាព បរិស្ថាន និងសមភាពពាណិជ្ជកម្ម។ ដោយចាប់ផ្ដើមប្រតិបត្តិការលក់កាលពីខែមិថុនា ឆ្នាំ ២០១៩ នៅទីផ្សារលំដាប់ខ្ពស់ក្នុងក្រុងប៉ារីស ឌុយប្លាំង នៅអៀរឡង់ព្រមទាំងបណ្ដាប្រទេសអឺរ៉ុប ជាច្រើន។
សម្លៀកបំពាក់កុមារស្អាតៗដែលត្រូវបានដាក់លក់អនឡាញ គឺជាស្នាដៃដេរចេញពីរោងជាងដេររបស់អង្គការ PSE និង Fairsew ដែលមានគោលការណ៍លើកកម្ពស់ជីវភាពអ្នកដេរ និងកាត់បន្ថយការប៉ះពាល់ដល់បរិស្ថាន។
អ្នកនាង សាមេនថា បានប្រាប់ ភ្នំពេញ ប៉ុស្ដិ៍ ថា៖ «យើងបានសិក្សាពីចង្វាក់ផលិតកម្មនៅប្រទេសថៃ ដែរ តែយើងយល់ថា វាមិនមានតម្លាភាពគ្រប់គ្រាន់ក្នុងការជ្រើសយកជារោងជាងផ្ដល់សេវាកម្មដេរសម្លៀកបំពាក់ឲ្យយើង។ ទីបំផុតយើងក៏បានមកដល់ភ្នំពេញ ហើយពេញចិត្តនឹងប្រតិបត្តិការនៅ PSE និង Fairsew»។
ដើមឡើយ សាមេនថា និង ហេឡេន ក៏មានការពិបាកក្នុងការស្វែងរកវត្ថុធាតុដើម និងចង្វាក់ផលិតកម្ម ដែលមានតម្លាភាព ក្រមសីលធម៌បំពេញការងារ និងស្នេហាបរិស្ថាន។
ការដេរសម្លៀកបំពាក់ត្រូវបានធ្វើឡើងនៅកម្ពុជា។ រូបថត សហការី
អ្នកនាង សាមេនថា បានលើកឡើងថា៖ «រាល់អ្នកដែលពាក់ព័ន្ធនឹងវិស័យម៉ូដសម្លៀកបំពាក់ គួរតែទទួលបានភាពរីករាយ មិនថាពួកគាត់ជាកសិករដាំកប្បាស ជាជាងដេរ អ្នកលក់ អ្នកទិញ កុមារអ្នកប្រើប្រាស់ខោអាវយើង ឬមនុស្សធំដែលជាអ្នកទុកដាក់ឲ្យពួកគេនោះទេ»។
អ្នកនាង សាមេនថា បានបញ្ជាក់ទៀតថា៖ «យើងរចនាម៉ូដសម្លៀកបំពាក់សម្រាប់ Collection នេះ ដោយផ្ដោតលើនិរន្តរភាព គុណភាពល្អ មាំអាចពាក់បានយូរ និងម៉ូដបែបសាមញ្ញមិនឆាប់សាប»។
ខោអាវកុមារ Dream Out Loud អាចបញ្ជាទិញតាមអនឡាញនៅវេបសាយ The Extra Smile៕
