ក្រុងម៉ូស្គូ: ក្រុមមន្ដ្រីរុស្ស៊ីបាននិយាយកាលពីថ្ងៃព្រហស្បតិ៍ថា ក្រុមអ្នកវិទ្យាសាស្ដ្របានចាប់ខ្លាឃ្មុំទឹកកកដ៏ស្រេកឃ្លាន ១ ក្បាលដែលត្រូវបានប្រទះឃើញស្រែកតាមដងវិថីនានានៃទីក្រុងអាក់ទិកចម្ងាយរាប់រយគីឡូម៉ែត្រពីជម្រកធម្មជាតិរបស់វា និងទំនងជាត្រូវបាននាំយកទៅកាន់សួនសត្វ។
ក្រុមអាជ្ញាធរក្នុងទីក្រុងឧស្សាហកម្មនេះបានឲ្យដឹងក្នុងសេចក្ដីថ្លែងការណ៍ថា៖ «ក្រុមសត្វសាស្ដ្របានចាប់ខ្លាឃ្មុំទឹកកកញីមួយក្បាលដែលដើរត្រាច់ចរពេញទីក្រុង Norilsk។ ខ្លាឃ្មុំនោះទំនងជាដើរទៅភាគខាងត្បូងពីតំបន់អាក់ទិកនៃសមុទ្រការ៉ាស៊ី»។
ទ័ពខ្លាឃ្មុំទឹកកករមែងត្រូវបានមើលឃើញដើរត្រាច់ចរតាមទីប្រជុំជនភាគខាងជើងប្រទេសរុស្ស៊ី ខណៈបម្រែបម្រួលអាកាសធាតុ និងការអភិវឌ្ឍនៅតាមតំបន់បានកាត់បន្ថយជម្រកធម្មជាតិ និងចំណីអាហាររបស់ពួកវា ហើយពួកវាត្រូវបង្វែរគោលដៅដើម្បីស្វែងរកអាហារដូចជានៅតាមធុងសំរាមជាដើម។
សត្វខ្លាឃ្មុំទឹកកកដែលទំនងជាមានអាយុ ១ ឆ្នាំ និងទម្ងន់ ២០០ គីឡូក្រាមត្រូវបានត្រួតពិនិត្យសុខភាពដោយក្រុមគ្រូពេទ្យសត្វ។ ក្រុមមន្ដ្រីគ្រោងបញ្ជូនខ្លាឃ្មុំមួយនេះទៅកាន់សួនសត្វក្នុងទីក្រុង Krasnoyarsk ស៊ីបេរីនៅថ្ងៃសុក្រ។
សេចក្ដីថ្លែងការណ៍បន្ដថា៖ «សុខភាពសត្វមិនអនុញ្ញាតឲ្យវាវិលទៅកាន់ទ្រនំធម្មជាតិវិញឡើយ។ ក្នុងទីក្រុង Krasnoyarsk ខ្លាឃ្មុំនឹងត្រូវបានត្រួតពិនិត្យពេញលេញម្ដងទៀត និងទទួលការព្យាបាលដ៏ចាំបាច់»។
រូបភាពស្ដីពីសត្វខ្លាឃ្មុំទឹកកកល្ហិតល្ហៃជាច្រើនសន្ធឹកដែលត្រាច់ចរស្វែងរកចំណីក្នុងទីក្រុង Norilsk ក៏បង្កការភ្ញាក់ផ្អើលយ៉ាងខ្លាំង។ ទិដ្ឋភាពខ្លាឃ្មុំទឹកកកស្ថិតនៅសែនឆ្ងាយពីជម្រកធម្មជាតិពិតជាកម្រណាស់៕ HR