.jpg)
ក្រុងស៊ាងហៃ : ភាគហ៊ុនរបស់ក្រុមហ៊ុនហ្គេមវីដេអូចិនបានធ្លាក់ចុះប៉ុន្មានសប្ដាហ៍ចុងក្រោយនេះ បន្ទាប់ពីរដ្ឋាភិបាលបានបង្ហាញអំពីផែនការគ្រប់គ្រងចំនួនហ្គេមអនឡាញជាផ្នែកនៃកិច្ចខិតខំប្រឹងប្រែងការពារមិនឲ្យមានបញ្ហាម៉្ញូបភ្នែកក្នុងចំណោមកុមារ។
ផែនការនេះគឺជាវិធានការថ្មីបំផុតដើម្បីពង្រឹងការគ្រប់គ្រងរបស់រដ្ឋាភិបាលទៅលើឧស្សាហកម្មហ្គេមវីដេអូដែលមានប្រជាប្រិយភាពយ៉ាងខ្លាំងនិងរីកចម្រើនយ៉ាងលឿនក្នុងប្រទេសចិន ដែលនេះបានធ្វើឲ្យប៉ះពាល់ដល់ទីផ្សារហ៊ុនរបស់ចិន។
បទបញ្ញត្តិថ្មីនេះត្រូវបានប្រកាសប៉ុន្មានសប្ដាហ៍មុន បន្ទាប់ពីប្រធានាធិបតីចិន លោក ស៊ី ជិនពីង បានចេញ «សេចក្តីណែនាំសំខាន់» មួយដើម្បីការពារភ្នែករបស់កុមារ។
ក្រសួងអប់រំបានថ្លែងនៅក្នុងសេចក្តីថ្លែងការណ៍ថា អាជ្ញាធរនឹងដាក់បញ្ញត្តិនិងគ្រប់គ្រងចំនួនសរុបនៃហ្គេមអ៊ីនធ័រណេត ព្រមទាំងចំនួនហ្គេមថ្មី។
សេចក្តីថ្លែងការណ៍ ដែលត្រូវបានចុះហត្ថលេខាដោយក្រសួងចំនួន ៨ បានថ្លែងថា អាជ្ញាធរនឹងស្វែងរកប្រព័ន្ធក្រើនរំឭកអាយុសមស្រប ហើយនិងចាត់វិធានការកំណត់ចំនួនម៉ោងលេងហ្គេមក្នុងចំណោមកុមារ។
ប្រទេសចិនមានអត្រាខ្ពស់នៃបញ្ហាម៉្ញូបភ្នែកក្នុងចំណោមសិស្ស ដែលមានអាយុកាន់តែក្មេងជាងមុន។ នេះបើយោងតាមមន្រ្តីទីភ្នាក់ងារសារព័ត៌មានស៊ីនហួ (Xinhua) ដោយលើកឡើងអំពីបទបញ្ជារបស់ប្រធាននាធិបតី ស៊ី ជិនពីង។
បញ្ហាម៉្ញូបភ្នែកបានប៉ះពាល់យ៉ាងខ្លាំងទៅលើសុខភាពរាងកាយ និងបញ្ញារបស់កុមារ ដោយបង្កឲ្យមានបញ្ហាធំមួយដល់អនាគតរបស់ប្រទេសនេះ។ នេះបើយោងតាមទីភ្នាក់ងារដដែល។
ផែនការនេះបានធ្វើឡើងបន្ទាប់ពីការផ្អាកការអនុម័តលើការផ្តល់អាជ្ញាប័ណ្ណហ្គេមអនឡាញថ្មី។
សារព័ត៌មាន Bloomberg បានរាយការណ៍កាលពីដើមខែនេះថា ប្រទេសចិនបានឈប់ផ្តល់ការអនុញ្ញាតចំពោះហ្គេមថ្មីណាក៏ដោយតាមរយៈទូរស័ព្ទដៃ ដែលជាផ្នែកនៃការផ្លាស់ប្តូរយ៉ាងធំមួយនៅក្នុងទីផ្សារហ្គេម។
មិនមានអាជ្ញាប័ណ្ណថ្មីសម្រាប់ក្រុមហ៊ុនក្នុងស្រុក ដែលត្រូវបានបន្ថែមចាប់តាំងពីខែឧសភា និងមិនមានហ្គេមនាំចូលថ្មីត្រូវបានអនុម័តចាប់តាំងពីខែកុម្ភៈ។ នេះបើយោងតាមរដ្ឋបាលវិទ្យុ និងទូរទស្សន៍ជាតិ ដែលបានធ្វើបច្ចុប្បន្នភាពជាទៀងទាត់អំពីបញ្ជីហ្គេមអនឡានដែលត្រូវបានអនុម័ត៕ AFP/PS
