.jpg)
ក្រុមបុគ្គលិកអង្គការសីលការកម្ពុជា ក្នុងយុទ្ធនាការផ្សព្វផ្សាយពីសមភាពយេនឌ័រដល់ពលរដ្ឋតាមមូលដ្ឋាន។ រូបថត សហការី
ភ្នំពេញ៖ ដោយសារសង្កេតឃើញថា ក្នុងយុគសម័យទំនើប ការទទួលបានការយល់ដឹងពីបញ្ហាសង្គមនានា ជាពិសេសមធ្យោបាយផ្សព្វផ្សាយជាខ្សែវីដេអូ នៅក្នុងសម័យបច្ចេកវិទ្យាទំនើបហាក់មានការទាក់ទាញនូវចំណាប់អារម្មណ៍ក្រុមយុវជន និងសម្បូរអ្នកតាមដាននានាមានចំនួនច្រើនជាងអ្នកចូលទៅអានអត្ថបទសំណេរ។
ជាក់ស្តែងដូចជាការផ្សព្វផ្សាយនូវសារអប់រំស្តីពីសមភាពយេនឌ័រ តាមរយៈស្នាដៃវីដេអូខ្លីៗនានាតែម្តង ទើបជំរុញឲ្យអង្គការសីលការកម្ពុជា បានរៀបចំឲ្យមានការប្រកួតប្រជែងវីដេអូមួយឈ្មោះថា «បំបែកផ្នត់គំនិតសង្គម ដើម្បីសមភាពយេនឌ័រ» ក្រោមគម្រោងជំនួយនៃអង្គការ USAID សម្រាប់ដើមឆ្នាំ ២០២០ នេះ។
កញ្ញា ជាតិ សូលីនដា ជាអ្នកសម្របសម្រួលយុវជនរបស់អង្គការសីលការកម្ពុជា បញ្ជាក់ពីទំនោរងាកមកប្រើមធ្យោបាយផ្នែកវីដេអូ ដែលបានពីការផលិតរបស់បេក្ខជនដាក់ស្នាដៃវីដេអូចូលរួមប្រកួត ដែលជាទំនោរថ្មីនៃការចាប់អារម្មណ៍របស់អ្នកទស្សនា ឬអ្នកតាមដានចំពោះខ្លឹមសារពាក់ព័ន្ធនឹងសមភាពយេនឌ័រថា៖ «សព្វថ្ងៃនេះ បើតាមការសង្កេតឃើញ ការផ្សព្វផ្សាយការយល់ដឹងពីសមភាពយេនឌ័រ ដែលប្រើមធ្យោបាយមានខ្លឹមសារជាខ្សែវីដេអូហាក់មានសម្ទុះទាក់ទាញអ្នកទស្សនា ឬតាមដានច្រើនជាង ការប្រើមធ្យោបាយជាសំណេរអក្សរស្តីពីបញ្ហាសមភាពយេនឌ័រនេះ។ យើងសង្កេតឃើញថាយុវជន សព្វថ្ងៃ ពួកគាត់ចូលចិត្តមើល ឬយល់ដឹងពីអ្វីមួយក្នុងសង្គមតាមវីដេអូ ជាងការចូលទៅអានសំណេរអត្ថបទ ដែលបរិយាយពីបញ្ហាសង្គមដូចគ្នា។ យើងក៏បង្កើតឲ្យមានគម្រោងការប្រកួតវីដេអូស្តីពីបញ្ហាសមភាពយេនឌ័រ ដូចជានៅឆ្នាំនេះការប្រកួតក្រោមប្រធានបទ «បំបែកផ្នត់គំនិតសង្គម ដើម្បីសមភាពយេនឌ័រ»។
ក្រុមបុគ្គលិកអង្គការសីលការកម្ពុជា នាពេលធ្វើការពិភាក្សាជាក្រុម។ រូបថត សហការី
ការផលិតវីដេអូ នេះគឺជាការផ្ទេរសារផ្តល់ការអប់រំពីបញ្ហារបត់គំនិតមួយដល់ពលរដ្ឋខ្មែរពីបញ្ហាសមភាពយេនឌ័រ ជាពិសេសនោះ ការចង់លុបបំបាត់នូវទស្សនៈវិសមភាពយេនឌ័រ ដែលមានតាំងយូរមក ខណៈស្រ្តីតែងត្រូវគេច្រើននិយាយថា «ស្រ្តីបង្វិលជើងក្រានមិនជុំ» នោះ។ កន្លងមកអង្គការសីលការកម្ពុជា មានគម្រោងអប់រំពីសមភាពយេនឌ័រ តាមរយៈការប្រកួតប្រជែងផ្សេងៗគ្នាដូចជាការប្រកួតសរសេរអត្ថបទ ការប្រកួតពិភាក្សាគ្នាជាក្រុម និងការប្រកួតថតវីដេអូ ជាដើម។
កញ្ញា ជាតិ សូលីនដា បានបន្តឲ្យដឹងថា៖ «សម្រាប់ការប្រកួតប្រជែងផលិតវីដេអូ នេះមានការកំណត់វេលាមិនឲ្យលើសពី ៥ នាទីឡើយ។ ហើយការផលិតវីដេអូនេះ បានបើកទូលាយទៅដល់បេក្ខជនប្រកួតប្រជែងនានាទាំងនៅក្រុង និងខេត្ត ដោយយើងក៏មានការលើកទឹកចិត្តបេក្ខជនមកពីខេត្ត ដើម្បីប្រកួតរកជយលាភីផងដែរ។ ខ្លឹមសារវីដេអូ ដែលបេក្ខជនប្រកួតនោះ ត្រូវទាក់ទងនឹងប្រធានបទដែលយើងដាក់ជូនមានចំណងជើងថា «បំបែកផ្នត់គំនិតសង្គម ដើម្បីសមភាពយេនឌ័រ» និងជាវីដេអូមានរយៈពេលមិនឲ្យលើស ៥ នាទីឡើយ ហើយត្រូវតែជាវីដេអូដែលមានការផលិតជាភាសាខ្មែរ ខណៈភាសាអង់គ្លេសគឺជាជម្រើស ដែលអាចមានក៏បាន ឬអត់មានក៏បាន។ ចំពោះជយលាភីលេខ ១ នឹងទទួលបានប្រាក់រង្វាន់ ១ លាន ២ សែនរៀល លេខ ២ នឹងបានទឹកប្រាក់ចំនួន ៨ សែនរៀល និងលេខ ៣ នឹងបានទឹកប្រាក់ចំនួន ៤ សែនរៀល»៕
