The Phnom Penh Post Search

Search form




Logo of Phnom Penh Post newspaper Phnom Penh Post - ខ្លឹម ស្រីគា ថា​អាច​សម្តែង​កុន​តាម​កាលៈទេសៈ​មិន​ប្រកាន់​តួ




ខ្លឹម ស្រីគា ថា​អាច​សម្តែង​កុន​តាម​កាលៈទេសៈ​មិន​ប្រកាន់​តួ

Content image - Phnom Penh Post
កញ្ញា ខ្លឹម ស្រីគា អតីត​បវរកញ្ញា Miss Grand Cambodia 2017 ប្រែ​ខ្លួន​មក​ជា​តារា​សម្តែង​។ រូបថត ហ្វេសប៊ុក ផា លីណា

ខ្លឹម ស្រីគា ថា​អាច​សម្តែង​កុន​តាម​កាលៈទេសៈ​មិន​ប្រកាន់​តួ

ភ្នំពេញៈ ក្រោយពី​ផុត​តួនាទី​ជា​កញ្ញាឯក​តំណាង​ឲ្យ​ប្រទេស​ផ្នែក​សម្រស់​មួយរយៈ​មក​នោះ អតីត​បវរកញ្ញា Miss Grand Cambodia កម្ពុជា​ប្រចាំ​ឆ្នាំ​ ២០១៧ កញ្ញា ខ្លឹម ស្រីគា កំពុង​តែ​កាក់កប​នឹង​ការសម្តែង​ខ្សែ​ភាពយន្ត​ទាំង​កុន​ដុំ និង​កុន​ភាគ ក្រោយពី​អភិវឌ្ឃ​ខ្លួន​មក​ជា​តារា​សម្តែង ហើយ​អាច​សម្រប​ខ្លួន​សម្តែង​បាន​តាម​កាលៈទេសៈ​ទៀត​ផង​។

បើ​និយាយ​ពី​កញ្ញា ខ្លឹម ស្រីគា ទស្សនិកជន ប្រាកដ​ជា​ស្គាល់​ច្បាស់​ហើយ ព្រោះ​នាង​ជា​អតីត​ជា​បេក្ខនារី Miss Grand Cambodia2017 ដែល​ធ្លាប់​បាន​ទៅ​បង្ហាញ​សមត្ថភាព​នៅ​លើ​ឆាក​អន្តរជាតិ​ក្នុង​វិធី Miss Grand International 2017 ផង​ដែរ​។ នាពេល​បច្ចុប្បន្ន​នេះ​ទីផ្សារ​សិល្បៈ​របស់​កញ្ញា ហាក់​មាន​ទឹកមាត់​លេប​ជា​បណ្តើរៗ​ហើយ ព្រោះ​តែ​ចាប់​បាន​ឱកាស​ថត​ទាំង​កុន​ដុំ និង​កុន​ភាគ​រួម​ទាំង​មាន​ការថត​ស្ប៉ត​ពាណិជ្ជកម្ម និង​ថត MV បទចម្រៀង​ជា​ហូរហែ​។

កញ្ញា ខ្លឹម ស្រីគា អតីត​ជា​សិស្ស​រៀន​ចប់​ពី​វិទ្យាល័យ​ ប៊ុន រ៉ានី ហ៊ុន សែន វត្តភ្នំ ដែល​មាន​កម្ពស់​ ១៧៤ សង់ទីម៉ែត្រ និង​ធ្លាប់​ជា​បេក្ខនារី​ប្រឡង​ស្រី​ស្អាត-​ប្រុស​ស្អាត Freshie Girls & Boys 2017 នាពេល​នេះ​បាន​ឆ្លងកាត់​បទពិសោធ​ថតកុន ៣ ​រឿង​ហើយ​គឺ​កុន​ភាគ ១ ​រឿង​បាន​ចាក់​បញ្ចាំង​ចប់​នៅ​ប៉ុស្តិ៍​ទូរទស្សន៍​បាយ័ន​គឺ​រឿង «​ភូមិគ្រឹះ​ជំពាក់​ស្នេហ៍​» ដែល​បាន​សម្តែង​រួម​ជាមួយ​នឹង Freshie Boy លេខ​ ១ លោក ទ្រី តារាវុធ និង​កុន​ដុំ ២ ​រឿង​។

ប៉ុន្តែ​កុន​ដុំ​ ១ ​គឺ​រឿង «​ខ្មោច​គ​» ខណៈ​កុន​ដុំ​ ១ ​រឿង​ទៀត​នៅ​ពុំទាន់​បាន​ចាក់​បញ្ចាំង​នៅ​ឡើយ​ទេ ហើយ​ក្រៅពី​នេះ​កញ្ញា​ក៏​ថត​វីដេអូ​ខ្លីៗ​នៃ​កម្មវិធី​កំប្លែង​របស់​ទូរទស្សន៍​ថោន​ផង​ដែរ​មាន​ដូចជា កម្មវិធី​ «​ដូច្នឹង​ផង​?» ​ជាដើម​។

កញ្ញា ខ្លឹម ស្រីគា ដែល​លេចមុខ​ក្នុង​កុន​ដុំ​រឿង​ «​ខ្មោច​គ​» របស់​ផលិតកម្ម​ថោន ជា​តួអង្គ​គ្រូ​ចាប់​ខ្មោច​សិចស៊ី​លើក​ដំបូង​នោះ បង្ហើប​ពី​អារម្មណ៍​ផ្ទាល់​ខ្លួន ក្រោយ​ពី​បាន​ក្លាយ​មក​ជា​តារា​សម្តែង​ថា​៖ «​ឥឡូវ​នេះ ខ្ញុំ​សប្បាយ​ចិត្ត​ខ្លាំង ព្រោះ​មិន​នឹក​ស្មាន​ដល់​ថា ក្រោយពី​នាង​ខ្ញុំ​ចប់​ភារកិច្ច​ជា​បវរកញ្ញា​មក​នោះ​អាច​មាន​ឱកាស​ក្លាយ​ជា​តារា​សម្តែង​ទៅ​តាម​ចំណង់​ចំណូលចិត្ត​តាំងពី​ក្មេង​បាន​។ នាង​ខ្ញុំ​មាន​ក្តីសង្ឃឹម​ថា​អាច​ចាប់​យក​អាជីព​មួយ​នេះ និង​ខិតខំ​ប្រឹងប្រែង​បត់បែន​ដើម្បី​ទទួល​យក​បាន​នូវ​បទពិសោធ​ផ្នែក​នេះ​តាម​កាលៈទេសៈ​សម្រាប់​អនាគត​ឲ្យ​បាន​ផង​ដែរ​»​។

តារា​ម៉ូដែល​ស្រី​មាន​រាង​ខ្ពស់​ស្រឡះ​រូប​នេះ​ក៏​បាន​បញ្ជាក់​ពី​ផល​លំបាក និង​ទទួល​យក​លក្ខខណ្ឌ​នានា​សម្រាប់​ថតកុន ខណៈ​ចាប់​តាំងពី​ពេល​ប្តូរ​មក​​ជា​តារា​សម្តែង​កាលពេល​ដំបូង​បន្ត​ទៀត​ថា​៖ «​ទោះបី​កាលពី​ដំបូង​ហាក់​មាន​ការលំបាក​ខ្លាំង​សម្រាប់​នាង​ខ្ញុំ ដែល​ប្តូរ​ពី​តារា​បង្ហាញ​ម៉ូដ​មក​ជា​តារា​សម្តែង​កុន​វិញ​នោះ​ក្តី តែ​ក្រោយ​ពេល​បាន​ខិតខំ​សម្រប​ខ្លួន និង​ដក​ពិសោធ​មួយរយៈ​មក​នោះ​ឃើញ​ថា​មាន​ភាពសមស្រប​ច្រើន និង​អាច​សម្រប​ខ្លួន​បាន​ជាមួយ​វិស័យ​សម្តែង​នេះ​ទៀត​ផង​។ ចំពោះ​ខ្ញុំ​ការសម្តែង​មិន​បាន​ប្រកាន់​ថា​ជា​តួឯក ឬ​តួរង​នោះ​ទេ​គឺ​នាង​ខ្ញុំ​អាច​ទទួល​ថត​បាន​ទាំងអស់ ហើយ​ការសម្តែង​បែប​ជា​តួ​ស្លូត ឬ​កាច​ក៏​អាច​សម្តែង​បាន​ដែរ​»៕

អត្ថបទគួរចាប់អារម្មណ៍