ភ្នំពេញ៖ រឿងប្រមាញ់ប្រវត្តិសាស្រ្ត គឺជាប្រភេទខ្សែភាពយន្តបែបប្រវតិ្តសាស្រ្តសម័យថ្មីបង្ហាញពីអាថ៌កំបាំងជាច្រើនពាក់ពន្ធ័នឹងការបាត់ព្រះកាយព្រះបាទជ័យវរ្ម័នទី៧ និងរឿងរ៉ាវបែបប្រវត្តិសាស្រ្តផ្សេងទៀត នៅក្នុងសម័យមហានគរ ដែលនិពន្ធ និងដឹកនាំរឿង ដោយផលិតករវ័យក្មេងរបស់ផលិតកម្ម DL នឹងត្រូវបើកសម្ពោធពិធីក្រុងពាលី នៅចុងខែកក្កដា ឆ្នាំ ២០២០ ខាងមុខនេះ ខណៈតាមគម្រោងការចំណាយត្រូវប្រើទុនប្រមាណជាង ១ លានដុល្លារឯណោះ។
តាមលោក ជិន ជ័យណារ៉ា ដែលជាអ្នកនិពន្ធ ដឹកនាំផលិតខ្សែភាពយន្ត និងអ្នកគ្រប់គ្រងការផលិតទូទៅបានឲ្យដឹងថា៖ «រឿងនេះ ជាប្រភេទកុនដុំហើយការចំណាយ បើផ្អែកទៅលើសម្ភារបុរាណ និងការតុបតែងលម្អផ្នែកប្លង់ ពន្លឺ និងបច្ចេកទេសគឺចំណាយថវិកាទៅដល់ជាង ១ លានដុល្លារ សម្រាប់ការផលិត ហើយក៏មានបណ្តាក្រុមហ៊ុនមួយចំនួនបានចូលរួមឧបត្ថម្ភចំពោះការផលិតនេះផងដែរ ទើបអាចធ្វើឲ្យ DL អាចផលិត និងដំណើរការទៅបានរលូន។
អ្នកគ្រប់គ្រងការផលិតទូទៅនៅផលិតកម្ម DL រូបនេះ ក៏បង្ហើបឲ្យដឹងពីដំណើរដើមចមនៃការនិពន្ធរឿងនេះថា៖ «រឿងដែលយើងកំពុងតែផលិតនេះ គឺជារឿងបែបសម័យ ដែលគេនិយាយពីក្រុមបុរាណវិទ្យាមួយក្រុម បានចុះទៅស្រាវជ្រាវនៅតំបន់អង្គរ រួចពួកគេក៏បានមើលឃើញរូបភាពពីអតីតកាលមួយ ដែលផុសចេញពីសិលាចារឹក ឬរូបបដិមា ដែលជាកំណាយបុរេប្រវត្តិ គេបានឃើញចម្បាំង និងរឿងរ៉ាវវប្បធម៌ និងសិល្បៈគ្រប់ទម្រង់ ដែលបានផ្សារភ្ជាប់គ្នា ដើម្បីបង្ហាញឲ្យអ្នកទស្សនាបានយល់ដឹងពីសិល្បៈគ្រប់ទម្រង់»។
លោក ជិន ជ័យណារ៉ា បានបន្តថា៖ «ការស្រាវជ្រាវ ដែលមិនបំប្លែងប្រវត្តិសាស្ត្រ គឺជាអ្វីដែល DL ចង់ផលិត ព្រោះគិតថា ការយល់ដឹងរបស់កូនខ្មែរចំពោះប្រវត្តិសាស្ត្រ សិល្បៈ និងអក្សរសិល្បិ៍ នៅមានកម្រិតនៅឡើយ ហើយការផលិតកុននេះ អាចនឹងបង្ហាញឲ្យកូនខ្មែរយើងអាចឲ្យស្វែងយល់ និងសិក្សាបន្ថែមបានមួយកម្រិតទៀតផងដែរ។ ម្យ៉ាងវិញទៀត DL ទើបតែបានបង្កើតឡើងថ្មីសន្លាងមិនទាន់មានស្នាដៃ ថតកុននោះទេ ហើយនេះ គឺជាខ្សែភាពយន្តដំបូងដែលយើងចាប់ផ្តើមផលិត»។
ចំពោះតួអង្គសំខាន់ៗនៅក្នុងការថតកុនដុំរឿង «ប្រមាញ់ប្រវត្តិសាស្រ្ត» នេះមានដូចជា លោក លាង ឆេ លោក ខាត់ វៃហាំង កញ្ញា ស៊ិន យូប៊ីន តារាចម្រៀងប្រុស អាន គុណកូឡា លោក DJ milk លោក អេង លីហ៊ួ និងតារារលកថ្មី ហើយក៏មានក្រុមតន្ត្រីបុរាណ និងរបាំប្រពៃណីជាច្រើនរូបទៀត។
កុននេះដែរ គ្រាន់តែបាន-ផុសរូបថតបែនណឺរ ១ សន្លឹក និងរូបមានឈុតសម្លៀកបំពាក់តួអង្គស្តេច និងព្រះមហេសីប៉ុន្មានសន្លឹក នាសម័យអង្គរ អមដោយសារថា «ឆាប់ៗនេះ ពិធីក្រុងពាលីខ្សែភាពយន្តរឿង ប្រមាញ់ប្រវត្តិសាស្ត្រ ចង់ដឹងថា ការបាត់ខ្លួនរបស់ព្រះបាទជ័យវរ្ម័ទី៧អាថ៌កំបាំងបែបណា សូមរង់ចាំទស្សនាខ្សែភាពយន្តខ្នាតធំនេះ គ្រប់រោងកុននៅក្នុងប្រទេសកម្ពុជា» ភ្លាមនោះ ក៏មានការបញ្ចេញនូវមតិយោបល់បែបជាអនុសាសន៍យ៉ាងច្រើនសន្ធឹក ដើម្បីចូលរួមផលិតកុនមានគុណភាពល្អលើវិស័យភាពយន្តខ្មែរ៕