ភ្នំពេញ: ខណៈដំណឹងខ្សឹបខ្សៀវកំពុងពុះកញ្ជ្រោល ក្នុងពិភពសិល្បៈដែលល្បីថាស្រីស្រស់ គង់ ច័ន្ទស្រីមុំ កំពុងត្រូវបានលោកឧកញ៉ាម្នាក់ព្យាយាមតាមជ្រែកបំបែកស្នេហ៍ពីលោក គឹម សីហា នោះ ស្រាប់តែ ស្រីស្អាតនាង គង់ ច័ន្ទស្រីមុំ ខ្លួនឯងផ្ទាល់បានបង្កឲ្យមានការភ្ញាក់ផ្អើលផ្ទួនៗគ្នាម្ដងទៀត ជាមួយសារក្នុងបណ្ដាញសង្គមហ្វេសប៊ុក ដែលរៀបរាប់ពីទុក្ខកង្វល់កប់ក្នុងចិត្តកំពុងតែរកវិធីដោះស្រាយ។
អ្នកដែលបានឃើញសាររបស់នាងនាំគ្នាលើកឡើងថា ស្រីមុំ របួសដួងចិត្ត ដល់ថ្នាក់លាតត្រដាងរឿងរ៉ាវក្នុងបណ្តាញសង្គម ហើយវាក៏ទំនងជាគ្មានអ្វីក្រៅពីរឿងស្នេហាហ្នឹងទេ ព្រោះថា សព្វថ្ងៃមុខជំនួញនាងក៏តែងតែឮវាចាអួតថា ដំណើរការរលូនទាំងថ្មីទាំងចាស់ដែរ។
អ្នកនិយមតាមដានរឿងសិល្បៈបានលើកឡើងថា៖ «ចុះម៉េចបានជាដល់ថ្នាក់បញ្ចេញសារកើតទុក្ខក្នុងបណ្តាញសង្គមនោះ មិនមែនធម្មតាទេមានតែសាមីខ្លួនទើបបានបកស្រាយការពិតបាន»។
ប្រភពពីអ្នកសិល្បៈមួយចំនួនបាននាំគ្នាខ្សឹបខ្សៀវថា៖ «ស្រីមុំ បើមានទុក្ខព្រោះស្នេហាក៏អាចដែរ ព្រោះថា ដំណឹងរៀបការជាមួយសង្សារដូចជាមិនមានលេចចេញរូបរាងសោះ ដែលបានត្រឹមតែបង្ហើបថា ចាំពេលនេះពេលនោះ ពេលមុខជំនួញដំណើរការល្អសិន។ ពេលនេះដំណើរការល្អហើយ ដំណឹងរៀបការនៅតែស្ងាត់ដដែល។ រឿងនេះក៏អាចមកពីដំណឹងថ្មីដែលកំពុងមានចំហាយរកនឹងផ្ទុះនោះ»។
កាលពីប៉ុន្មានថ្ងៃចុងក្រោយនេះ ពាក្យចចាមអារ៉ាមស្នេហាជុំវិញកញ្ញា គង់ ច័ន្ទស្រីមុំ តែងបន្លឺឡើងមិនដាច់ពីមាត់ថាតារាស្រីរូបស្រស់សម្រស់ក្មេងខ្ចីម្នាក់នេះកំពុងស្ថិតក្នុងក្រសែភ្នែករបស់ឧកញ៉ាទ្រព្យស្ដុកម្នាក់ ដែលថែមទាំងធានាថា ឲ្យតែនាងឆ្លើយថាព្រម នាងនឹងសោយសុខលើគំនរមាសពេជ្រដោយមិនបាច់ខ្វល់ចិត្តរឿងរកស៊ី ឬការងារសិល្បៈទៀតទេ។ ទន្ទឹមនឹងពាក្យចចាមអារ៉ាមថាមានឧកញ៉ាតាមជ្រែកស្នេហ៍នោះក៏ស្រាប់តែឃើញគង់ ច័ន្ទស្រីមុំ បង្ហោះសាររៀបរាប់ពីអារម្មណ៍ខ្វាយខ្វល់ខុសពីធម្មតា។
មតិជាច្រើន ដែលបានឃើញសារ របស់ គង់ ច័ន្ទស្រីមុំ បានសម្ដែងមតិផ្ទាល់ខ្លួនថា៖ «គ្មានអ្វីដែលនាំឲ្យ ស្រីមុំ ស្មុគស្មាញ ក្រៅពីពិបាកសម្រេចជ្រើសរើសហ្នឹងទេ។ បើម្ខាងម្ចាស់បេះដូងស្គាល់ចិត្តថ្លើមគ្នារាប់ឆ្នាំហើយ ហើយម្ខាងគ្រាន់តែជាអ្នកមានទ្រព្យ ខ្លាចចិត្តមិនបានដូចសង្សារចាស់នោះអី»។
ម្ចាស់ពានអាណាចក្រតារាផ្នែកខាងតារាមានប្រជាប្រិយរូបនេះបានអះអាងពីចំណងស្នេហ៍ដ៏រឹងមាំរបស់នាងថា៖ «សម្ព័ន្ធភាពយើងទាំងពីរ បង សីហា និងខ្ញុំកាន់តែស្អិតល្មួត និងស្រឡាញ់គ្នាលើសដើម។ ប៉ុន្តែរឿងរៀបការបញ្ចប់ព្យុះព័ត៌មាននោះនៅទេ មិនទាន់បានគិត ថាចាំមើលជំនួញក្រោយដើរឲ្យល្អជាងនេះសិន ចាំគិតអាហ្នឹង រឿងរៀបការក៏មិនទាន់ខុសដែរ»។
ស្រីស្រស់ គង់ ច័ន្ទស្រីមុំ បានបកស្រាយការសរសេរក្នុងហ្វេសប៊ុករបស់នាងថា៖ «មួយរយៈមុននេះ ដូចជាមានអារម្មណ៍មួម៉ៅនិងការងារទើបត្រូវបញ្ចេញអារម្មណ៍មិនល្អខ្លះ ឲ្យបានធូរស្បើយក្នុងអារម្មណ៍។ តែមិនពាក់ព័ន្ធនឹងស្នេហាទីពីរទីបីឯណាមកជ្រែកស្នេហ៍អីទេ»។
តារាស្រីញញឹមស្រស់សាច់សខ្ចីរូបនេះថែមទាំងនិយាយបែបលេងសើចទៀតថា៖ «បើនរណាៗក៏ដឹងថា ខ្ញុំ និងបង សីហា ជាគូស្នេហ៍រាប់ឆ្នាំទៅហើយ អ្នកណាគេហ៊ានមកសុំស្នេហ៍ខ្ញុំទៀត។ អ្នកទំនេរម៉ាគរគោកមិនទៅរក រកអីអ្នកមានម្ចាស់»៕
