ភ្នំពេញ៖ នាថ្ងៃទី ៥ ខែ វិច្ឆិកា ឆ្នាំ ២០១៩ វេលាម៉ោង ៦ ដល់ ម៉ោង ៧ និង ៣០ នាទីយប់ គម្រោងសិល្បៈស-ស អញ្ជើញលោក ថារុន ណាហ្គេសហ៍ ដើម្បីមកធ្វើបាឋកថា នៅវិចិត្រសាលស-ស នៅរាជធានីភ្នំពេញលើកដំបូង ខណៈរូបលោកកំពុងមានវត្តមាននៅប្រទេស កម្ពុជា នោះ។
លោក ថារុន ណាហ្គេសហ៍ (Tarun Nagesh) ដែលមានតួនាទីសកម្មក្នុងការងារផ្គត់ផ្គង់ដល់សិល្បករក្នុងការបង្កើតស្នាដៃថ្មី និងការប្រមូលស្នាដៃសិល្បៈ សម្រាប់វិចិត្រសាល ហើយគាត់ក៏ទទួលបន្ទុកផ្នែកសមុច្ច័យ និងពិព័រណ៍សិល្បៈអាស៊ីប៉ាស៊ីហ្វិក តាមវិចិត្រសាលផងដែរ។
កញ្ញា គួន ឌីណា ជាអ្នកសម្របសម្រួលគម្រោងកម្មវិធីនៃវិចិត្រសាលស-ស បញ្ជាក់ពីការរៀបចំបាឋកថានោះដែរថា៖ «អាចនិយាយថា នេះគឺជាការរៀបចំលើកដំបូង សម្រាប់អ្នកជំនាញខាងរៀបចំពិព័រណ៍សិល្បៈសហសម័យនៅអាស៊ីប៉ាស៊ីហ្វិកប្រចាំ ៣ ឆ្នាំម្តង (APT) នៅក្នុងប្រទេស កម្ពុជា យើង។ ខណៈពិព័រណ៍សិល្បៈសហសម័យអាស៊ីប៉ាស៊ីហ្វិកនេះ បានចាប់ផ្តើមតាំងពីឆ្នាំ ១៩៩៣ និងការរៀបចំពិព័រណ៍ចុងក្រោយពេលថ្មីៗនេះគឺជាពិព័រណ៍លើកទី ៩ ឆ្នាំ ២០១៨-២០១៩»។
កញ្ញា គួន ឌីណា បានបន្តថា៖ «ថារុន ណាហ្គេស នឹងធ្វើការឆ្លុះបញ្ចាំងអំពីប្រវត្តិ និងការវិវឌ្ឍនៃពិព័រណ៍ APT នេះ ដែលនៅតែបន្តផ្តោតលើបរិបទសិល្បៈសហសម័យ នៅក្នុងតំបន់។ លោកក៏នឹងបង្ហាញ អំពីរបៀប ដែលពិព័រណ៍នេះ បានផ្លាស់ប្តូរទៅតាមពេល ខណៈពេលដែលទំនាក់ទំនង និងសង្គមសិល្បៈថ្មីៗ ដែលបានលេចឡើង និងផ្លាស់ប្តូរ។ លោកក៏នឹងពិនិត្យលើបញ្ហាប្រឈមក្នុងការរៀបចំពិព័រណ៍ប្រកបដោយអត្ថន័យ អំពីតំបន់ដ៏ចម្រុះមួយនេះ និងពិភាក្សាពីការងារក្នុងរយៈពេលថ្មីៗនេះ ពេលរៀបចំពិព័រណ៍ ដែលផ្តោតលើគម្រោងសិល្បៈមកពីកម្ពុជា និងអាស៊ីអគ្នេយ៍។ នេះក៏ជាឱកាសដ៏ល្អមួយដែរ សម្រាប់សិល្បករខ្មែរ ដែលមានបំណងចង់ស្តាប់ និងការចែករំលែកពីបទពិសោធសិល្បៈ រៀបចំពិព័រណ៍ផងដែរ»។
លោក ថារុន ណាហ្គេសហ៍ គឺជាអ្នករៀបចំពិព័រណ៍នៅវិចិត្រសាល Queensland Art Gallery / Gallery of Modern Art (QAGOMA) នៅក្រុងប្រេសប៊េន ប្រទេស អូស្ត្រាលី។ លោកក៏ជាអ្នករៀបចំពិព័រណ៍ម្នាក់នៃក្រុមស្នូលក្នុងការរៀបចំពិព័រណ៍ APT លើកទី ៧ លើកទី ៨ និងលើកទី ៩ នៃតំបន់អាស៊ីអាគ្នេយ៍ផងដែរ។ លោកក៏បានរៀបចំពិព័រណ៍ថ្មីៗនៅឯ QAGOMA រួមទាំងគម្រោងក្រោយៗដូចជាកម្មវិធី Problem-Wisdom/ Thai- Art in the1990s កម្មវិធី A- Fleeting Bloom/Japanese Art from the Collection កម្មវិធី KalpaVriksha/ Contemporary Indigenous និងកម្មវិធី Vernacular Art of India (as part of APT8) កម្មវិធី Political Parody in Indonesian Art និង Indo Pop/ Contemporary Indonesian Art៕