ក្រុងម៉ានីល: ទឹកមុខញញឹមញញែម កូនក្រមុំដើរលុយទឹកជំនន់ចូលព្រះវិហារនៅថ្ងៃរៀបអាពាហ៍ពិពាហ៍ក្នុងប្រទេសហ្វីលីពីន ទទួលបានការចាប់អារម្មណ៍យ៉ាងខ្លាំង ខណៈប្រទេសសម្បូរដែនកោះមួយនេះរងឥទ្ធិពលព្យុះភ្លៀងមូសុង។
ចូបេល ដេឡូស អេនហ្គេឡេស អាយុ ២៤ ឆ្នាំ រៀបការជាមួយស្វាមីដែលមានតំណក់ឈាមកូន ២ នាក់រួមគ្នា កាលពីថ្ងៃសៅរ៍ ខណៈព្យុះភ្លៀងត្រូនិក យ៉ាហ្គី និងខ្យល់មូសុងនិរតី បាននាំយកជំនន់ធ្ងន់ធ្ងរមកកាន់ក្រុងម៉ានីល និងតំបន់ក្បែរខាង រួមទាំង ខេត្ដកំណើត ប៊ូឡាខាន របស់ពួកគេផងដែរ។
វីដេអូហ្វេសប៊ុក ត្រូវបានចែករំលែកជាង ១០០០ ដង អ្នកស្រី ដេឡូស អេនហ្គេឡេស នៅតែមានទឹកមុខញញឹម ខណៈកំពុងដើរលុយទឹកដ៏ល្អក់គ្រងរ៉ូបពណ៌ស អមដោយសំឡេងទះដៃសាទរពីភ្ញៀវកិត្ដិយស។
អ្នកស្រី បានប្រាប់ AFP ថា៖ «ទោះមានព្យុះភ្លៀង ឬទឹកជំនន់ គ្មានអ្វីបញ្ឈប់ខ្ញុំបានទេ។ យើងមានឱកាសរៀបការបានតែម្ដងតើគួរតែត្រូវពន្យារពេលឬ? នេះជាអាពាហ៍ពិពាហ៍ជាមួយមនុស្សដែលខ្ញុំស្រឡាញ់។ រ៉ូបខ្ញុំទទឹកអស់ តែខ្ញុំប្រាប់ខ្លួនឯងថា នេះជាការដើរលើកម្រាលព្រំក្រហម»។
ហ្វីលីពីន ទទួលរងនូវឥទ្ធិពលខ្យល់ព្យុះយ៉ាងតិច ២០ ដងរៀងរាល់ឆ្នាំ។ ព្យុះភ្លៀងចុងក្រោយបំផុតបានបង្កជាវិនាសកម្មយ៉ាងច្រើនបណ្តាលឲ្យពលរដ្ឋ ២ ម៉ឺននាក់ត្រូវភៀសខ្លួនពីលំនៅឋានតំបន់មាត់ទន្លេម៉ារីគីណា។
អេនហ្គេឡេស បន្ដថា ទាំងនាង និងមិត្ដប្រុសស្គាល់គ្នា ៧ ឆ្នាំ មិនដឹងថានឹងជួបឧបសគ្គអាកាសធាតុអាក្រក់បែបនេះទេ តែក៏មិននឹកគិតចង់រំសាយ ឬពន្យារពេលថ្ងៃមង្គលឡើយ។
ម្ដាយមីងកូនក្រមុំ បានបង្ហោះវីដេអូមង្គលការពួកគេលើបណ្ដាញសង្គម និងទាក់ទាញចំណាប់អារម្មណ៍អ្នកប្រើប្រាស់អ៊ីនធឺណិតជាច្រើន។ បូទីស្ដា បានប្រាប់ AFP ថា៖ «ខ្ញុំសោកស្ដាយ ពួកគេជួបបទពិសោធអាក្រក់នេះ តែខ្ញុំក៏រីករាយដែលឃើញពួកគេឆ្លងកាត់ការលំបាកនេះ»៕