ក្រុងឡុងដ៍៖ រាត្រីដ៏ស្ងប់ស្ងាត់ រាត្រីដ៏ពិសិដ្ឋបានបង្កើតបទពិសោធដ៏មានន័យថ្មីសម្រាប់ភ្ញៀវដែលហ៊ានបង់ប្រាក់គេងក្នុងបរិយាកាសបែបប្លែកក្នុងព្រះវិហារបុរាណរបស់អង់គ្លេស។
ការដើរចូលទីស្មសាននាអាធ្រាត្រ និងឱកាសបានលេងឧបករណ៍តន្ដ្រីក្នុងព្រះវិហារ អ្នកគេងក្នុងជំរំព្រះវិហារពិតជាបង្កើតបរិយាកាសព្រឺព្រួចដែលអ្នកខ្លះស្ទើរតែមិនហ៊ានធ្មេចភ្នែក។
និស្សិតសាកលវិទ្យាល័យ កែ អូណូ បាននិយាយដោយងក់ក្បាលសំដៅទៅកាន់ថ្មស្លាកព្រលឹង មុនពេលកញ្ញា និងមិត្ដភក្ដិ ៣ នាក់ទៀត រំពឹងថា វាជាបទពិសោធដំណេកដ៏ប្លែកអារម្មណ៍ក្នុងព្រះវិហារសតវត្សរ៍ទី ១៣ នៅទីឋានជនបទប្រទេស អង់គ្លេស។
កញ្ញានិយាយថា៖ «វាបានបន្ថែមនូវអារម្មណ៍ប្លែក ដោយពេលធ្មេចភ្នែក យើងនឹកស្រមៃដល់អ្នកណានៅគេងក្នុងដីនៅពីក្រោមយើង»។
ការដាក់ជួលបរិវេណព្រះវិហារសម្រាប់ស្នាក់ពេលរាត្រីត្រូវបានផ្ដល់សេវាកម្មដោយព្រះវិហារជាច្រើននៅអង់គ្លេស និងស្កុតឡេនក្នុងបំណងស្វែងរកថវិកាបន្ថែមសម្រាប់ការចំណាយផ្សេងៗ។
«អ្នកគេងក្នុងព្រះវិហារ» ចំណាយប្រាក់ ៦២ ដុល្លារម្នាក់ សម្រាប់ការជួលបរិវេណព្រះវិហារ St Mary នៅភូមិ Edlesborough ចម្ងាយជាង ៦៤ គីឡូម៉ែត្រភាគខាងជើងក្រុងឡុងដ៍ ដោយបានចែករំលែកបរិវេណអគារជាមួយហ្វូងប្រចៀវដ៏ច្រើន។
អង្គការអភិរក្សព្រះវិហារ (CCT) ដែលបើកដំណើរការសេវាកម្មជួលព្រះវិហារនេះបានផ្ដល់គ្រែជំរំ និងកម្រាលគេង សម្រាប់ភ្ញៀវទទួលបទពិសោធប្លែកក្នុងអគារបុរាណនេះ។
នៅពេលមកដល់ ភ្ញៀវដើរទស្សនាគ្រប់ច្រកល្ហកនៃអគារដែលធ្វើឲ្យពួកគេមានអារម្មណ៍ព្រឺព្រួចដោយសារទិដ្ឋភាពទាំងនោះអាចប្រទះឃើញញឹកញាប់នៅក្នុងឈុតឆាកភាពយន្តបែបតក់ស្លុត។
អង្គការសប្បុរសធម៌អភិរក្ស ដែលមើលការខុសត្រូវព្រះវិហារ ៣៥៤ នៅចក្រភពអង់គ្លេស បានការស្នាក់នៅពេលរាត្រីចំនួន ១៩ ទីតាំង។
កញ្ញា អូណូ មកពីជប៉ុន បានឲ្យដឹងថា៖ «ខ្ញុំគិតថា វាជួយផ្សព្វផ្សាយដំណេះដឹង ហើយវាជាការស្នាក់នៅដ៏មានអត្ថន័យ»។
មិត្ដភក្ដិរបស់កញ្ញា ឈ្មោះ លីងបូ ហ៊្សូ បាននិយាយថា វាគួរឲ្យសង្វេគណាស់ដែលព្រះវិហារត្រូវបានទុកចោល ហើយនេះជាវិធីដ៏ល្អដែលធ្វើឲ្យទីឋាននេះទាក់ទាញភ្ញៀវមកកោតស្ញប់ស្ញែងចំពោះរចនាប័ទ្មព្រះវិហារ និងមកភ្លក្សបទពិសោធដ៏ព្រឺសម្បុរ។
កញ្ញានិយាយថា៖ «វាជារាត្រីកាលដ៏គួរឲ្យខ្លាចបំផុតចំពោះពួកយើង ស្រមៃដល់ព្រលឹងខ្មោចនៅពីក្រោមកន្លែងដំណេកយើង ពិតជាពិបាកធ្មេចភ្នែកគេងមែនទែន»៕ AFP/HR