.jpg)
វិចិត្រករ សាឆា ចា្រហ្វី និងគំនូរឈ្មោះថា «ដំណើរមនុស្សជាតិ»។ រូបថត AFP
ក្រុងឌូបៃ៖ ស្នាដៃគំនូររបស់វិចិត្រករអង់គ្លេស សាឆា ច្រាហ្វី ដែលមានរូបភាពក្រវេមក្រវាមដ៏ធំបំផុតក្នុងលោកត្រូវបានដាក់លក់តម្លៃ ៦២ លានដុល្លារ ក្នុងពិធីដេញថ្លៃមួយក្នុងទីក្រុងឌូបៃ។ នេះបើយោងតាមក្រុមអ្នករៀបចំព្រឹត្ដិការណ៍ដេញថ្លៃបានឱ្យដឹងកាលពីថ្ងៃអង្គារ។
គំនូរ «ដំណើរមនុស្សជាតិ» ត្រូវបានគូរឡើងជា ៧០ ផ្នែក ដែលលាតសន្ធឹង ១ ៥៩៥,៧៥ ម៉ែត្រការ៉េ ស្មើនឹងទីលានបាល់បោះជិត ៤ ផ្គុំគ្នា។
ក្រុមអ្នករៀបចំបានឱ្យដឹងក្នុងសេចក្ដីថ្លែងការណ៍ថា ស្នាដៃគំនូរនេះលក់ក្នុងតម្លៃ ៦២ លានដុល្លារ ដែលលើសទ្វេដងពីការរំពឹងទុក ខណៈទឹកប្រាក់នឹងផ្ដល់ឱ្យអង្គការកុមារ។
Andre Abdoune ជនជាតិបារាំងដែលរស់នៅក្នុងក្រុងឌូបៃ ជាទីក្រុង ១ ចំណោមក្រុងធំៗទាំង ៧ ដែលបង្កើតបានជាសាធារណរដ្ឋអារ៉ាប់រួមបានទិញគំនូរ ៧០ ផ្នែក ផ្គុំគ្នានេះ កាលពីថ្ងៃចន្ទ ក្នុងពិធីដេញថ្លៃ «Atlantis, The Palm» នៅទីក្រុងឌូបៃ។
ស្នាដៃគំនូរធំបំផុតនេះ ដែលត្រូវបានចុះបញ្ជីកំណត់ត្រាឯកទគ្គកម្មហ្គីនណេសពិភពលោកជា «គំនូរក្រដាសធំបំផុត» ត្រូវបានដាក់តាំងបង្ហាញក្នុងសាលធំនៃសណ្ឋាគារប្រណីត និងមានបំណងដាក់លក់ទៅតាមផ្នែកនីមួយៗទាំង ៧ នោះ។
លោក Abdoune អ្នកជំនួញរូបិយប័ណ្ណឌីជីថលបាននិយាយថា៖ «ខ្ញុំមកពីគ្រួសារក្រីក្រ ហើយខ្ញុំបានដឹងថា អារម្មណ៍អត់មានអីក្នុងពោះ វាលំបាកលំបិនយ៉ាងណា។ ប៉ុន្ដែយ៉ាងហោចណាស់ ខ្ញុំមានក្ដីស្រឡាញ់ពីឪពុកម្ដាយ បានរៀនសូត្រ និងមានការឧបត្ថម្ភ។ គំនូរនេះពិតជាមានឥទ្ធិពលណាស់ ពេលខ្ញុំបានឃើញវា សម្រាប់ខ្ញុំផ្ទាល់ វាមិនអាចបំបែកផ្នែកទាំង ៧ ផ្ទាំងនោះបានឡើយ»៕ AFP/HR
