.jpg)
ក្នុងការរចនារូបភាព ក្រុមការងារបានចុះទៅផ្ដិតយកទិដ្ឋភាពពិត ភាពលម្អិតនៃទេសភាព និងប្រើប្រាស់ពណ៌ឲ្យស៊ីទៅនឹងសាច់រឿងបែបកម្សត់។ រូបថត Youtube
ភ្នំពេញៈ ជាប្រលោមលោកល្បីល្បាញអំឡុងទសវត្សរ៍ទី ៦០ និង ៧០ ដែលប្រជាជនខ្មែរស្ទើរគ្រប់រូបសុទ្ធតែបានស្គាល់ បានអាន «រឿងកុលាបប៉ៃលិន» ស្នាដៃនិពន្ធដោយលោក ញ៉ុក ថែម ក្នុងឆ្នាំ ១៩៤៣ បានចេញជាវីដេអូគំនូរជីវចល 2D រយៈពេលជាង ៣ នាទីធ្វើឲ្យទស្សនិកជនខ្មែរមានការចាប់អារម្មណ៍ និងគាំទ្រឲ្យផលិតប្រលោមលោកនេះជាប្រភេទវីដេអូគំនូរជីវចលពេញមួយខ្សែរឿងតែម្ដង។
ប្រលោមលោក កុលាបប៉ៃលិន ស្នាដៃនិពន្ធលោក ញ៉ុក ថែម។ រូបថត ហ្វេសប៊ុក
អង្គុយក្នុងបន្ទប់មុខកុំព្យូទ័រលោក សុង ហេមគីរី ប្រធានគំនូរចលនា និងជាសមាជិក រួញស្ទូឌីយោ ដែលបានបង្កើតវីដេអូគំនូរជីវចលរឿង កុលាបប៉ៃលិន នេះបានប្រាប់ឲ្យភ្នំពេញ ប៉ុស្តិ៍ ដឹងថា៖ «ដំបូងឡើយខ្ញុំបានបង្កើតវីដេអូរឿងកុលាបប៉ៃលិននៅឆ្នាំ ២០១៤ នៅពេលនោះគ្រូដាក់ assignment ឲ្យខ្ញុំធ្វើជារឿងប្រភេទ 2D animation។ ពេលនោះខ្ញុំអត់ដឹងថា ធ្វើរឿងអីទេ ៣ ខែក្រោយបានខ្ញុំនឹកឃើញចង់ធ្វើរឿងប្រលោមលោកខ្មែរ ខ្ញុំគិតថារឿងខ្មែរល្អៗច្រើន អ៊ីចឹងក៏រើសយករឿង កុលាបប៉ៃលិន ហ្នឹងទៅ»។
ប្រធានគំនូរចលនា វ័យ ២៣ ឆ្នាំរូបនេះបានរំឭកថានៅឆ្នាំ ២០១៣ ក្រោយពីបញ្ចប់ការសិក្សាមធ្យមសិក្សាទុតិយភូមិលោកបានផ្លាស់មកភ្នំពេញ ដើម្បីសិក្សាបន្ត។ ពេលនោះលោកបានប្រឡងជាប់ផ្នែកសំណង់ស៊ីវិលនៅវិទ្យាស្ថានពហុបច្ចេកវិទ្យា។ ទន្ទឹមនឹងនោះលោកក៏បានប្រឡងជាប់អាហារូបករណ៍ ៧៥ ភាគរយផ្នែកសំណង់ស៊ីវិលនៅសាកលវិទ្យាល័យហ្សាម៉ាន់ដូចគ្នា។ ប៉ុន្តែអ្វីដែលចម្លែកលោក គិរី បានបោះបង់មុខវិជ្ជាសំណង់ស៊ីវិលដែលខ្លួនស្រឡាញ់ដោយងាកចាប់យកមុខវិជ្ជាមួយ Digital Art Design ព្រោះតែសាលាបានប្រកាសផ្តល់អាហារូបករណ៍ ១០០ ភាគរយលើមុខវិជ្ជាថ្មីនេះ។
រូបភាពដកស្រង់ពីវីដេអូគំនូរជីវចលរឿង កុលាបប៉ៃលិន។ រូបថត Youtube
ការសិក្សា ២ ឆ្នាំដំបូងលោកធ្វើមិនបានល្អនោះទេ ព្រោះលោកមិនមានជំនាញគូររូប និងមិនដឹងច្រើនពីផ្នែកនេះ។ ការសិក្សាចុះខ្សោយបានធ្វើឲ្យលោកមានកូនចិត្តគិតចង់បោះបង់ការសិក្សា។ យ៉ាងណាមិញក្រោមការលើកទឹកចិត្តពីឪពុកខ្លួន លោក គិរី បានខិតខំតស៊ូរៀនបន្តរហូតដល់ឆ្នាំទី ៣ នៅពេលដែលគ្រូដាក់កិច្ចការឲ្យសិស្សធ្វើវីដេអូជាគំនូរជីវចល ពេលនោះលោកក៏បានសម្រេចកិច្ចការជាវីដេអូខ្លីនៃគំនូរជីវចលរឿងប្រលោមលោកកុលាបប៉ៃលិននេះឡើង។
នៅខាងក្រៅបន្ទប់សមាជិកចំនួន ៩ នាក់ដែលមានជំនាញផ្សេងៗគ្នាកំពុងមមាញឹកធ្វើការលើកុំព្យូទ័រដូចជា រចនាក្រាហ្វិករៀបគំនូរដំណើររឿង និងដំឡើងចលនារូបភាពជាដើម។
លោក ម៉េងគាត ថាគំនូរជីវចលយកលំនាំបែបជប៉ុន។ រូបថត Yousos Apdoulrashim
សមាជិកក្រុមម្នាក់លោក ឡុង ម៉េងគាត សិក្សាផ្នែករចនាសិល្បៈឌីជីថលបានបញ្ជាក់ថា៖ «ការគូរគំនូរក្នុងរឿងកុលាបប៉ៃលិនហ្នឹងពិបាកណាស់។ ទី ១ ធ្វើយ៉ាងណាកុំឲ្យទេសភាពខុសពីរូបដើម ព្រោះថាយើងបានថតរូបទេសភាពនៅបាត់ដំបងតែម្តង។ បើសិនយើងធ្វើឲ្យមានបញ្ហាខុសជាមួយទេសភាពពិត អ៊ីចឹងអ្នកមើលចាប់ផ្តើមមានអារម្មណ៍ថា រឿងយើងខុសពីធាតុដើម អ៊ីចឹងយើងត្រូវប្រយ័ត្ន»។
ដោយយកលំនាំតាមគំនូរជីវចលស្ទីលជប៉ុនរបស់ Hayao Miyazaki លោក ម៉េងគាត បន្តទៀតថា៖ «មួយទៀតគឺការដាក់ពណ៌ឲ្យស៊ីទៅតាមសាច់រឿង ដើម្បីឲ្យអ្នកមើលមានអារម្មណ៍ដូចនោះដែរ។ ឧទាហរណ៍រឿងដែលយើងចេញវាបង្ហាញពីភាពសោកសៅ អ៊ីចឹងពណ៌ក៏ត្រូវដាក់បែបកម្សត់ដែរ»។
លោក គីរី កំពុងធ្វើកិច្ចការនៅ រួញ ស្ទូឌីយោ។ រូបថត Yousos Apdoulrashim
មកដល់ពេលនេះរួញ ស្ទូឌីយូ បង្កើតបាន ២ ឆ្នាំ និងបានធ្វើការលើជំនាញគំនូរជីវចល 2D ក្រាហ្វិកចលនា និងរចនាក្រាហ្វិក ហើយបានបង្កើតវីដេអូរឿងកុលាបប៉ៃលិនចំនួន ៣ វីដេអូខ្លីរួចមកហើយ។
លោក គីរី និយាយថា៖ «កុលាបប៉ៃលិនគ្រាន់តែជាវីដេអូសាកល្បងទេតែពួកយើងនឹងប្តេជ្ញាថានឹងធ្វើរឿងឲ្យចេញជារឿងទាំងមូល ហើយបើមានអ្នកចាប់អារម្មណ៍ជួយពួកខ្ញុំអាចទាក់ទងបានតាមហ្វេសប៊ុក Rounh creative studio និងលេខទូរស័ព្ទ ០១៧ ៣៧៧ ៣៥៦»៕
វីដេអូ៖
