.jpg)
គំនូរជ្រូកព្រៃអាយុកាល ៤៥៥០០ឆ្នាំ ត្រូវបានរកឃើញនៅរូងភ្នំ ដែនកោះស៊ូឡាវេស៊ី ប្រទេសឥណ្ឌូនេស៊ី។ រូបថត AFP
ក្រុងហ្សារកាតា: ក្រុមអ្នកជំនាញបុរាណវិទ្យាបានរកឃើញគំនូរមួយដ៏ចំណាស់បំផុតក្នុងលោកនៅរូងភ្នំឯប្រទេសឥណ្ឌូនេស៊ី ជារូបជ្រូកព្រៃទំហំប៉ុនខ្នាតសត្វរស់មានជីវិត ហើយវាត្រូវបានគេប៉ាន់ស្មានថាជាគំនូររូងភ្នំមានអាយុកាលយ៉ាងហោច ៤៥ ៥០០ ឆ្នាំ។
ការស្រាវជ្រាវនេះត្រូវបានបរិយាយក្នុងព្រឹត្តិបត្រវិទ្យាសាស្ត្រ Science Advances កាលពីសប្ដាហ៍មុន ដោយផ្ដល់នូវភស្ដុតាងពីការរស់នៅរបស់មនុស្សយុគសម័យដើម ក្នុងតំបន់នោះផងដែរ។
សហអ្នកនិពន្ធការសិក្សា ម៉ាហ្ស៊ីម អូប៊ើត (Maxime Aubert) នៃសាកលវិទ្យាល័យហ្គ្រីហ្វហ្វីធ (Griffith University) នៅប្រទេសអូស្ត្រាលី បានថ្លែងប្រាប់ទីភ្នាក់ងារព័ត៌មាន AFP ថា ការរកឃើញគំនូរថ្មភ្នំដ៏ចំណាស់បំផុតនេះ ស្ថិតនៅកោះស៊ូឡាវេស៊ី (Sulawesi) តាំងពីឆ្នាំ ២០១៧ ដោយនិស្សិតថ្នាក់បណ្ឌិត បាស្រាន ប៊ើរហាន (Basran Burhan) ជាមួយអជ្ញាធរឥណ្ឌូនេស៊ី។
គំនូរជ្រូកព្រៃ ១៣៦ សង់ទីម៉ែត្រ គុណនឹង ៥៤ សង់ទីម៉ែត្រ នៅរូងភ្នំឯដែនកោះស៊ូឡាវេស៊ី ប្រទេសឥណ្ឌូនេស៊ី។ រូបថត AFP
រូងភ្នំ Leang Tedongnge ស្ថិតនៅតំបន់ជ្រលងភ្នំដាច់ស្រយាលដែលបិទបាំងដោយកំពូលភ្នំថ្នស្រួចៗច្រូងច្រាង ហើយទីនោះទាមទារការធ្វើដំណើរដោយថ្មើរជើងរយៈពេលមួយម៉ោងពីផ្លូវថ្នល់។
រូងភ្នំនេះអាចធ្វើដំណើរទៅដល់បានតែនៅរដូវប្រាំងប៉ុណ្ណោះ ព្រោះជារៀងរាល់រដូវវស្សាវាត្រូវបានជន់ជោរដោយទឹកជំនន់។
គំនូររូបសត្វជ្រូកព្រៃនៅលើជញ្ជាំងរូងភ្នំ មានទំហំ ១៣៦ សង់ទីម៉ែត្រ គុណនឹង ៥៤ សង់ទីម៉ែត្រ។
គំនូរជ្រូកបុព្វបុរសនេះត្រូវបានគូរឡើងដោយប្រើល័ក្តក្រហមក្រមៅ មានទ្រូងខ្លី រោមបះឡើង និងមានទម្រង់ខាងមុខស្រួចដូចខ្នាយទំនងជាអាឈ្មោល។
រូងភ្នំ Leang Tedongnge ស្ថិតនៅតំបន់ជ្រលងភ្នំដាច់ស្រយាលដែលបិទបាំងដោយកំពូលភ្នំថ្នស្រួចៗច្រូងច្រាង។ រូបថត AFP
នៅពីលើផ្នែកខាងក្រោយនៃគំនូរជ្រូកព្រៃនេះ ក៏មានស្នាមបាតដៃដែលរលប់បាត់ខ្លះៗ។
សហអ្នកនិពន្ធ អាដាម ប្រាមម៍ (Adam Brumm) បានលើកឡើងថា៖ «ជ្រូកនេះទំនងជាឈរមើលការប្រកួត ឬក៏ប្រាស្រ័យទាក់ទងនឹងជ្រូកព្រៃពីរក្បាលទៀត»។
មនុស្សបានប្រមាញ់ជ្រូកព្រៃពូជស៊ូឡាវេស៊ីអស់រយៈពេលរាប់ម៉ឺនឆ្នាំមកហើយ ហើយគំនូរជ្រូកព្រៃនេះគឺជាស្នាដៃ សិល្បៈបុរេប្រវត្តិដ៏ចំណាស់បំផុតនាយុគ្គសម័យទឹកកកនៅតំបន់នោះ៕ AFP/HR
គំនូរជ្រូកបុព្វបុរសនេះត្រូវបានគូរឡើងដោយប្រើល័ក្តក្រហមក្រមៅ ទ្រង់ទំនងជាអាឈ្មោល។ រូបថត AFP
