ភ្នំពេញៈ ថ្មីៗនេះស្នាដៃគំនូរឌីជីថលរបស់តារាចម្រៀងស្រីដ៏ល្បីអាមេរិក នាង ប៊ីយ៉ុនសេ ដែលគូរដោយវិចិត្រករខ្មែរមាឌមាំធំលោក ថៃ នរៈបណ្ឌិត ហៅ បេននី កំពុងតែទទួលបានការចាប់អារម្មណ៍ខ្លាំងពីសំណាក់ខាងភាគីម្ចាស់រូប និងមានគម្រោងសហការធ្វើកិច្ចការមួយធំនៅក្នុងវិស័យវិចិត្រកម្មនេះទៀតផង។
លោក ថៃ នរៈបណ្ឌិត ហៅ បេននី វិចិត្រករ វ័យ ២៥ ឆ្នាំដែលមានបងប្អូនបង្កើត ៣ នាក់ដោយលោកគឺជាកូនទី ២ មានដុងសិល្បៈគំនូរនៃគ្រួសារលោកស្រី ងិន ម៉ានីយ៉ា អតីតជាកវីនិពន្ធល្បីម្នាក់ ខណៈបងប្រុស និងប្អូនស្រីលោក គឺជាតារាសម្តែងនោះបានរៀបរាប់ឲ្យដឹងពីភាពល្បីសាយភាពពីស្នាដៃគំនូររបស់លោកនាពេលថ្មីនេះផងដែរ។ លោក បេននី ឲ្យដឹងថា៖ «ខ្ញុំក៏មិនដឹងទេថា តើមានអ្វីនៅពីក្រោយនៃការចាប់អារម្មណ៍នឹងស្នាដៃគំនូរនោះទេ។ ខ្ញុំគ្រាន់តែគូររូបនោះដោយក្តីស្រឡាញ់ និងម្យ៉ាងទៀតគាត់ ក៏ជាតារាចម្រៀងស្រីជាទីពេញចិត្តរបស់ខ្ញុំផងដែរ។ ខ្ញុំក៏មិនរំពឹងថា មានអ្នកចូលចិត្តស្នាដៃខ្ញុំច្រើនបែបនេះដែរ ជាពិសេសនោះមនុស្ស ៣ នាក់ដែលពាក់ព័ន្ធនឹងតារាចម្រៀងស្រីអាមេរិក ប៊ីយុនសេ តែម្តងបានចាប់អារម្មណ៍ និងគាំទ្រគំនូររបស់ខ្ញុំ។ ទី ១ អ្នកតុបតែងកាយផ្ទាល់ខ្លួន ទី ២ អ្នកជំនាញរៀបចំម៉ូដ ឬស្ទីល និងអ្នកទី ៣ គឺជាម្តាយបង្កើតរបស់ ប៊ីយុនសេ»។
លោកបន្តថា៖ «ការចាប់អារម្មណ៍នេះហើយបញ្ជាក់ថា ស្នាដៃខ្ញុំពិតជាទទួលការគាំទ្រលំដាប់ពិភពលោក ខណៈអ្នកតុបតែងកាយផ្ទាល់ខ្លួនរបស់ ប៊ីយុនសេ ប្រាប់ខ្ញុំថាគាត់ចង់ទំនាក់ទំនងខ្ញុំ ដើម្បីធ្វើគម្រោងមួយនាពេលអនាគតដោយសារពេញចិត្តស្នាដៃរបស់ខ្ញុំ។ ខ្ញុំគិតថាខ្លួនឯងមានសំណាងដែលបានការចាប់អារម្មណ៍ពីក្រុមមនុស្សនៅប្រទេសមានឧស្សាហកម្មរីកចម្រើន ហើយជាបទពិសោធដ៏អស្ចារ្យមួយដែរ»។
ដោយសារពីកេ្មងវ័យចូលចិត្តគូររូបគំនូរតុក្កតា តែមិនដែលបានចូលរៀនជំនាញសិល្បៈគំនូរពីសាលាណាមួយនោះឡើយគឺគ្រាន់តែបានស្វែងយល់រៀនតាមយូធូប សិក្សាដោយខ្លួនឯងពីសិល្បៈគំនូរនេះប្រើពេលប្រមាណ ៦ ឆ្នាំក៏អាចបង្កើតសា្នដៃបាន ខណៈគំនូរឌីជីថលទើបតែរៀនប្រមាណ ៥ ខែចុងក្រោយនេះក៏បង្កើតបានស្នាដៃគំនូរឌីជីថលទាក់អារម្មណ៍ខាងម្ចាស់រូបគឺតារាចម្រៀងស្រី ប៊ីយ៉ុនសេ តាមរយៈចម្រៀងថ្មីបទ «Lion King»។
ចំពោះស្នាដៃគំនូរលោក បេននី ប្រភេទគំនូរខ្មៅដៃអាចលក់បានតម្លៃចន្លោះពី ១០០ ដុល្លារ ទៅ ៥០០ ដុល្លារក្នុង ១ ផ្ទាំងដែលជាគំនូរគូរលើក្រដាសប្រភេទ A3 & A4 ខណៈគំនូរប្រេងវិញមានតម្លៃនៅចន្លោះពី ១០០ ដុល្លារឡើងដល់ខ្ទង់ពាន់ដុល្លារឯណោះគឺតាមការកុម្ម៉ង់។ លោក បេននី បញ្ជាក់ថា៖ «ឯវេលាគូរវិញតិចបំផុត ២-៣ ម៉ោង (ចំពោះគំនូរធម្មតា) រហូតដល់ ៣-៤ ថ្ងៃ (ជាគំនូររឿងលម្អិត)។ ដោយឡែកស្នាដៃគំនូរប្រេងវិញខ្ញុំធ្លាប់តែបង្កើតស្នាដៃប្រភេទសាមញ្ញៗទេ ខណៈគំនូររឿងលម្អិតនោះនៅមិនទាន់ធ្លាប់ទេ»។
យ៉ាងណាលោក ថៃ នរៈបណ្ឌិត ហៅ បេននី ដែលមាន IG ឈ្មោះថា @bennie_bd មិនទាន់ដែលបានគូររូបរបស់សិល្បករ-សិល្បការិនីខ្មែរណាម្នាក់នោះឡើយ តែលោកក៏មានគម្រោងជ្រើសរើសរូបតារាណាមួយមកគូរផងដែរនាពេលអនាគតឆាប់ៗនេះ៕