.jpg)
គំនូររូបស្លឹករុក្ខជាតិដ៏រស់រវើក ដែលជាស្នាដៃរបស់វិចិត្រករ ឈុំ ចាន់ណា។ សហការី
ក្រុងសៀមរាប: ស្លឹក និងដើមរុក្ខជាតិតូចៗ ដែលអ្នកផងទាំងពួងដើរឆ្លងកាត់ទៅហួសមកហួស ដោយមិនអើពើ និងចាប់អារម្មណ៍ពីគុណតម្លៃរបស់វា បានរំលេចរូបរាងនៅលើផ្ទាំងគំនូរពណ៌ទឹកគួរឲ្យគយគន់ និងនឹកភ្នកដល់ឆាកជីវិតរបស់វិចិត្រករ។
លោក ឈុំ ចាន់ណា ជាអតីតសិស្សហ្វារពន្លឺសិល្បៈខេត្ដបាត់ដំបង បាននិយាយថា៖ «ខ្ញុំជ្រើសរើសការគូរប្រភេទគំនូរពណ៌ទឹកពីព្រោះវាល្អ និងងាយស្រួល។ វារំលេចភាពស្រស់ស្អាត ដែលញ៉ាំងចិត្ដខ្ញុំឲ្យចង់គូរ។ គំនូរនីមួយៗឆ្លុះបញ្ចាំងពីឆាកពីជីវិតពិតរបស់ខ្ញុំ ដោយបានឆ្លងកាត់ការរើសអើង ធ្វើទុក្ខបុកម្នេញ និងបង្អាប់ទឹកចិត្ដ»។
លោកបានបន្ដថា៖ «ខ្ញុំចង់ឲ្យមនុស្សគ្រប់គ្នាយល់នូវអ្វីដែលស្ថិតនៅពីក្រោមឫសគល់នៃទឹកចិត្ដ និងអារម្មណ៍ផ្លូវចិត្ដខិតខំពុះពារ ដែលហាក់បីដូចជារុក្ខជាតិខំដុះប្រជ្រៀតគ្នាដើម្បីស្វែងរកពន្លឺដូច្នោះដែរ»។
ពិព័រណ៍ក្រោមប្រធានបទ «ជីវិតខ្ញុំ» ដែលរំលេចនូវគំនូរពណ៌ទឹកស្ដីពីរុក្ខជាតិតាមចិញ្ចើមផ្លូវរបស់លោក ឈុំ ចាន់ណា នឹងត្រូវបានតាំងបង្ហាញនៅសាលវិចិត្រថ្មីរបស់ MIRAGE Contemporary Art Space ក្នុងក្រុងសៀមរាបចាប់ពីថ្ងៃសុក្រ ទី ១៦ វិច្ឆិកាតទៅ។ វានឹងក្លាយជាពិព័រណ៍ដំបូងសម្រាប់ទីតាំងថ្មីរបស់សាលវិចិត្រស្ថិតនៅលើវិថីឧកញ៉ា អ៊ុំ ឆាយ និងជាការប្រារព្ធខួប ២ ឆ្នាំរបស់សាលវិចិត្រនេះផងដែរ។
«ជីវិតខ្ញុំ» ជាពិព័រណ៍ស្នាដៃគំនូរថ្មីសន្លាងរបស់វិចិត្រករមកពីខេត្ដបាត់ដំបងចំនួន ៦ ផ្ទាំង និងជាការផ្លាស់ប្ដូរដ៏សំខាន់ក្នុងការបង្ហាញពីឆាកជីវិតផ្ទាល់ខ្លួនតាមរយៈការប្រើប្រាស់រុក្ខជាតិមកប្រៀបធៀបនឹងជីវិតរបស់ខ្លួន។
វិចិត្រករ ឈុំ ចាន់ណា អតីតសិស្សហ្វារពន្លឺសិល្បៈ។ ហ្វេសប៊ុក
យុវជនដែលធ្លាប់រស់នៅក្នុងជំរំជនភៀសខ្លួនរូបនេះ បានលើកឡើងថា៖ «គំនូររបស់ខ្ញុំបច្ចុប្បន្ននេះមានលក្ខណៈខុសប្លែកពីគំនូរមុនៗ ទាំងទំនាក់ទំនងរវាងផ្លូវចិត្ដ និងរូបរាង។ ខ្ញុំចង់ផ្ដោតលើស្លឹក និងដើមឈើដែលអ្នកផងទាំងពួងដើរឆ្លងកាត់ដោយមិនចាប់អារម្មណ៍ពីដំណើររស់រានរបស់វា»។
លោកបានរៀបរាប់បន្តថា៖ «ការគូររូបដើមឈើ ឬរុក្ខជាតិតូចៗ ខ្ញុំចាប់ផ្ដើមយល់ពីបម្រែបម្រួលរូបរាងរបស់វា ដែលហាក់បីដូចជាដំណើរសន្សឹមៗរបស់ជីវិតខ្ញុំ»។
លោក ស៊ី សិរី ជានាយក និងសហស្ថាបនិកសាលវិចិត្រ MIRAGE បាននិយាយថា៖ «ស្នាដៃរបស់លោក ឈុំ ចាន់ណា បានរំលេចនូវភាពលម្អិតនិងពណ៌សម្បុរ ដែលជួយឲ្យសិល្បៈគំនូរពណ៌ទឹកបោះជំហានឈានឡើងមួយកម្រិតទៀត។ យើងសន្យាថា មហាជននៅសៀមរាបនឹងបានឃើញនូវស្នាដៃល្អវិចិត្រនេះ។ លោកឲ្យដឹងទៀតថា៖ «មិនគួរឲ្យជឿថា អ្នកខ្លះនៅតែបន្ដជីវិតរស់ពីការលក់កាតប៉ូស្ដាល់ច្នៃដោយដៃជូនភ្ញៀវទេសចរនៅសៀមរាបទៀតសោះ»។
លោកបន្ដថា៖ «ក្នុងឱកាសនេះ យើងក៏បានអបអរការបើកសម្ពោធសាលវិចិត្រនូវទីតាំងថ្មីដោយផ្ដើមពិព័រណ៍របស់លោក ឈុំ ចាន់ណា។ នៅសាលវិចិត្រ MIRAGE យើងចង់ឲ្យវិចិត្រករខ្មែរ ដូចជារូបលោក ចាន់ណា យកទីតាំងនេះបង្កើតស្នាដៃសិល្បៈជំនាន់ថ្មី និងឲ្យពិភពលោកបានស្គាល់»។
ពិព័រណ៍ «ជីវិតខ្ញុំ» របស់លោក ឈុំ ចាន់ណា នៅសាលវិចិត្រ MIRAGE ស្វាគមន៍មហាជនដោយសេរីចាប់ពីល្ងាចថ្ងៃសុក្រ ទី១៦ ខែវិច្ឆិការហូតដល់ថ្ងៃទី ១០ ខែធ្នូ៕
