.jpg)
ស្នាដៃគំនូរលើកញ្ចក់មានសោភណភាពល្អប្លែក តែបែរជាមិនសូវពេញនិយម និងខ្វះអ្នកគាំទ្ររបស់លោក ថៃ សាន។ រូបថត ហ្វេសប៊ុក
ភ្នំពេញៈ ស្នាដៃគំនូរសិល្បៈមានលក្ខណៈល្អប្លែក និងត្រូវប្រើពេលវេលាយូរ ទើបអាចសម្រេចបានទៅជាសមិទ្ធផលរបស់វិចិត្រករខ្មែរលោក ថៃ សាន ខិតខំរិះរកគំនិតច្នៃនោះ បែរជាខ្វះការគាំទ្រទៅវិញ ទើបមិនសូវហ៊ានបង្កើតស្នាដៃប្រភេទនេះឲ្យបានច្រើនបន្តទៀត។
លោក ថៃ សាន អតីតនិស្សិតវិចិត្រកម្មនៃសាកលវិទ្យាល័យភូមិន្ទវិចិត្រសិល្បៈ ដែលបានបញ្ចប់ការសិក្សាតាំងពី ២០០៧ និងបច្ចុប្បន្ននេះកំពុងតែបម្រើការងារជាសមាជិកម្នាក់នៃក្រុមគណៈកម្មការនៅវិទ្យាស្ថានអប់រំពិសេសសម្រាប់កុមារគ-ថ្លង់ បានបង្ហើបប្រាប់ថា៖ «ចំពោះស្នាដៃគំនូរលើកញ្ចក់នេះ មិនសូវកាក់កបឡើយ ដោយសារតែខ្វះការគាំទ្រ ហើយយូរៗម្តងទើបមានអ្នកកុម្ម៉ង់ឲ្យធ្វើ។ ដូច្នេះហើយបានជាខ្ញុំបង្កើតវាតែនៅពេលណាមានអ្នកកុម្ម៉ង់ប៉ុណ្ណោះ។ ជាការពិតសម្រាប់ស្នាដៃគំនូរលើកញ្ចក់នេះមានសោភណភាពល្អប្លែក ហើយអាចដាក់តាំងនៅតាមសណ្ឋាគារ ឬភោជនីយដ្ឋាននានាគឺមើលទៅឃើញស្រស់ស្អាត មិនចាញ់គំនូរលើផ្ទាំងឈើ ឬក្រណាត់នោះឡើយ។ តែមិនដឹងយ៉ាងម៉េចទេបានជាស្នាដៃប្រភេទនេះ បែរជាមិនសូវទទួលបាននូវការពេញនិយមទៅវិញ»។
វិចិត្រករខ្មែរលោក ថៃ សាន ក៏បង្កើតស្នាដៃសិល្បៈខ្មុកម្រ័ក្សណ៍ដែរ។ រូបថត ហ្វេសប៊ុក
លោក ថៃ សាន វិចិត្រករ ដែលធ្លាប់មានស្នាដៃលេចធ្លោទទួលបានការចាប់អារម្មណ៍ និងកោតសរសើរខ្លាំងក្រោយពីដឹងថា រូបលោកគឺជាអ្នករចនាម៉ូដសម្លៀកបំពាក់សម្រាប់អតីតបវរកញ្ញាចក្រវាលកម្ពុជាឆ្នាំ ២០១៨ គឺកញ្ញា រឿន ណាត នោះក៏បង្ហើបពីការសន្និដ្ឋាននាំឲ្យស្នាដៃគំនូរលើកញ្ចក់ ដែលមិនសូវមានគេជាវ ឬគាំទ្រផងដែរថា៖ «ខ្ញុំក៏មានការឆ្ងល់ដែររឿងនេះ!តែប្រសិនបើខ្ញុំគិតស្មាននោះគឺថាអាចមកពីគេគិតរឿងតម្លៃនោះហើយមើលទៅ តាមខ្ញុំគិត»។
បើតាមការបង្ហើបស្នាដៃគំនូរលើកញ្ចក់ ១ ផ្ទាំងតម្លៃ ៣០០ ដុល្លារដែលមានទំហំ ៦០ សង់ទីម៉ែត្រ x១០០ សង់ទីម៉ែត្រ ខណៈវាក៏មិនមែនចំណាយពេលត្រឹម ១ ឬ ២ ម៉ោងហើយនោះឡើយ។ វិចិត្រករខ្មែរមានស្រុកកំណើតនៅឯខេត្តបន្ទាយមានជ័យលោក ថៃ សាន បានបញ្ជាក់ប្រាប់ថា៖ «ស្នាដៃគំនូរលើកញ្ចក់សម្រាប់ទំហំខាងលើ [៦០ សង់ទីម៉ែត្រ x១០០ សង់ទីម៉ែត្រ] ត្រូវប្រើពេល ១ ខែ ឯណោះទើបអាចផលិតបាន ១ ផ្ទាំងនេះ។ ដោយឡែកការបង្កើតគំនូរលើកញ្ចក់ ដូច្នេះក៏ត្រូវការភាពអត់ធ្មត់ខ្លាំងដែរ»។
យ៉ាងណាការបង្កើតស្នាដៃសិល្បៈគំនូរទាំងឡាយនោះគឺជាការឆ្លៀតពីពេលទំនេរពីការងារពេញម៉ោងរបស់លោក ថៃ សាន ប៉ុណ្ណោះ ខណៈលោកមិនបានបោះបង់ចោលជំនាញវិចិត្រកម្មខ្លួនបានរៀនឡើយគឺមានស្នាដៃសិល្បៈដូចជាគ្រឿងខ្មុកម្រ័ក្សណ៍ និងការច្នៃប្រឌិតដើម្បីបង្កើតជាស្នាដៃសិល្បៈថ្មីៗ។
តែទោះជាយ៉ាងណាស្នាដៃគំនូរលើកញ្ចក់នេះលោក ថៃ សាន មិនបានបង្កើតច្រើនឡើយ ដោយសារតែខ្សត់ការគាំទ្រដោយលោកក៏មានបង្កើតស្នាដៃប្រចាំគ្រួសារដែរគឺចម្លាក់ខ្មុកម្រ័ក្សណ៍នានាដូចជាស្រោមមុខល្ខោនខោលគ្រប់រូបភាពតួអង្គ និងក្រៅពីនេះលោករចនាស្នាដៃរូបប្លែកៗ សម្រាប់ដាក់លើអាវយឺត ពែងទឹក ហើយកាន់តែពិសេសទៅទៀតនោះ លោកតែងតែប្រើពេលគូររូបសម្រាប់កម្រងសៀវភៅរឿងដែលមានរំលេចរូបភាពទៀតផង។
សម្រាប់ប្រិយមិត្តចង់បានស្នាដៃគំនូរលើកញ្ចក់ល្អប្លែក ដើម្បីទុកដាក់តាំងលម្អគេហដ្ឋាន សណ្ឋាគារ ឬភោជនីយដ្ឋានអាចទំនាក់ទំនងតាមទូរស័ព្ទលេខ ០៦៩ ៦៧៣ ៨៧៧ ឬតាមហ្វេសប៊ុកឈ្មោះ ថៃ សាន៕
