.jpg)
គំនូរ Flying Across ដែលតាំងនៅវិចិត្រសាល KhbachGallery។ រូបថត ហ្វេសប៊ុក
ភ្នំពេញ៖ ក្រោយពីបាននាំយកបណ្តុំស្នាដៃចម្រុះរបស់ខ្លួន ដែលមានចំនួនជិត ២០ ផ្ទាំង យកទៅដាក់តាំងនៅឯវិចិត្រសាល The Kbach Gallery ស្ថិតនៅក្នុងបរិវេណមណ្ឌលពិព័រណ៍ The Factory Phnom Penh ជិត ១ ឆ្នាំ មក ក៏មានភ្ញៀវបរទេសចូលទៅទស្សនាជាវជាបណ្តើរៗ ខណៈថ្មីៗនេះស្នាដៃឈ្មោះ «Flying Across» ក៏ត្រូវស្ថានទូតអាល្លឺម៉ង់ ប្រចាំប្រទេស កម្ពុជា បានជាវស្នាដៃរបស់វិចិត្រករស្រី ឆន ឌីណា តម្លៃជិត $២ ពាន់ ។
នេះបើតាមការប្រកាសអបអរសាទរពីគេហទំព័រផ្លូវការរបស់វិចិត្រសាល The Kbach Gallery បានបង្ហោះសារថា៖ «សូមអបអរសាទរដល់ម្ចាស់រូបគំនូរដ៏ស្រស់ស្អាតរបស់ ឆន ឌីណា ដែលមានប្រធានបទថា «Flying Across»។ គំនូរនេះជាការរុករកទិដ្ឋភាពពីអាកាសនៃប្រទេស កម្ពុជា ដែលមានពន្លឺចែងចាំងដូចជាមាសតំណាងឲ្យដំបូលវត្ត។ ឌីណា បានបន្ថែមសំណាញ់ដើម្បីតំណាងឲ្យកន្លែង ចាក់សំរាមដែលមាននៅទូទាំងប្រទេសនេះ។ ផ្ទាំងគំនូរនេះត្រូវបានគូរ នៅលើបាវស្រូវ តាមបែបប្រពៃណីរបស់ខ្មែរ»។
ថ្លែងដោយក្តីរីករាយ និងរំភើបក្នុងចិត្តសម្រាប់កម្រងស្នាដៃគំនូររបស់ខ្លួន ដែលផ្តោតសំខាន់ទៅលើខ្លឹមសារស្តីពីសត្វនៅប្រទេស កម្ពុជា បានផុសចេញឡើងក្នុងគោលបំណងបណ្តុះគំនិតកូនខ្មែរឲ្យមានការស្វែងយល់ពីសត្វស្លាបរបស់ប្រទេសខ្លួន ដែលកំពុងតែរងភាពជិតផុតពូជ និងចង់ណែនាំដល់វិចិត្រករខ្មែរជំនាន់ក្រោយឲ្យចេះប្រើស្នាដៃសិល្បៈគំនូរខ្លួនបង្កប់ន័យអប់រំទៅលើផ្នែកវប្បធម៌នានារបស់ខ្លួនផងដែរ។
ឆន ឌីណា ពន្យល់ពីអត្ថន័យគំនូរចំណងជើង «Flying Higher» ស្នាដៃគំនូរប្រើទឹកខ្មៅចិនដំបូងតាំងនៅវិចិត្រសាល The Plantation កន្លងមក។ហុង មិនា
វិចិត្រករស្រីដែលធ្លាប់ទទួលបានពានរង្វាន់ Young Artist Award នៅប្រទេស ថៃ កាលពីឆ្នាំ ២០១៦ អ្នកនាង ឆន ឌីណា បានបន្ថែមឲ្យដឹងថា៖ «ចាស! ស្នាដៃគំនូរមានចំណងជើងថា «Flying Across» ដែលដាក់តាំងនៅឯវិចិត្រសាល The Kbach Gallery នោះ ត្រូវបានខាងស្ថានទូតប្រទេស អាល្លឺម៉ង់ ប្រចាំប្រទេស កម្ពុជា បានជាវ ដោយគំនូរមួយផ្ទាំងនោះ គឺមានតម្លៃក្រោម ២ ០០០ ដុល្លារ ទេ! តែខ្ញុំសប្បាយចិត្តចំពោះស្នាដៃនេះ ដោយសារវាកើតឡើងចេញគំនិតផ្ទាល់របស់ខ្ញុំក្នុងការរំលេចជាស្នាដៃឡើង ហើយក៏ចង់ឲ្យមានការផ្សព្វផ្សាយ ស្វែងយល់ និងជួយការពារទៅលើធនធានសត្វស្លាបរបស់ប្រទេស កម្ពុជា ផងដែរ តាមរយៈស្នាដៃគំនូររបស់ខ្ញុំ»។
វិចិត្រករស្រីដែលមានបទពិសោធផ្នែកគំនូរអរូបីច្នៃប្រឌិតបែបខ្មែរជាង ១០ ឆ្នាំរូបនេះ ក៏បានបង្ហើបទៀតថា៖ «ចំពោះគោលបំណងដ៏ចម្បងធំសម្រាប់ការបង្កើតស្នាដៃនានាតាមរយៈចំណុចពិសេសផ្ទាល់ខ្លួនស្តីពីបញ្ហាបរិស្ថាន និងតែងរំលេចជារូបសត្វនានានោះ គឺចង់បង្ហាញពីក្តីរំភើបចិត្តសម្រាប់ក្រុមវិចិត្រករខ្មែរ នាពេលបានឃើញស្នាដៃគំនូរខ្លួនត្រូវបានប្រជាជនខ្មែរមានការនិយមគាំទ្រ និងលើកស្ទួយស្នាដៃវិចិត្រករខ្មែរខ្លាំងជាងមុន ជាពិសេស មានបងប្អូនខ្មែរយើងចាប់ផ្តើមមើលឃើញ និងយល់ពីតម្លៃនៃស្នាដៃគំនូររបស់វិចិត្រករខ្មែរបណ្តើរៗហើយ ដោយជាវទុកលម្អ ឬដាក់តាំងតាមគេហដ្ឋាន»៕
