.jpg)
ក្រុងកំប៉ាឡា: នៅពេលគេនិយាយអំពីពាក្យ រ៉ូឡិច (Rolex) នៅប្រទេសអ៊ូហ្គង់ដា មនុស្សភាគច្រើនច្បាស់ជានឹកដល់ម៉ាកនាឡិកាដៃប្រណីតតម្លៃកប់ពពកជាមិនខាន ។
ប៉ុន្តែនៅពិធីបុណ្យ រ៉ូឡិច ប្រចាំឆ្នាំលើកទីបីលើកំពូលភ្នំនៅរដ្ឋធានី Kampala នៃប្រទេស អ៊ូហ្គង់ដា កាលពីថ្មីៗនេះ មិនមានស្តង់លក់ម្ហូបអាហារណាមួយ មានតាំងលក់នាឡិកាដៃម៉ាកប្រណីតនេះឡើយ។
នៅក្នុងប្រទេសអ៊ូហ្គង់ដា រ៉ូឡិច គឺជាអាហារសម្រន់ដែលគេចូលចិត្តបំផុតនៅក្នុងប្រទេសនេះ គឺជាសាំងវិច ដែលធ្វើពីស៊ុតចៀនជាមួយនឹងម្សៅនំប៉័ងចាប៉ាទី បង្កើតបានជា «ស៊ុតរមូរ»។
អ្នករៀបចំពិធីបុណ្យនេះសង្ឃឹមថា បុណ្យនេះនឹងប្រែក្លាយអ្វីដែលមនុស្សជាច្រើនចាត់ទុកថាជាអាហារពេលយប់របស់បុរសអ្នកក្រ ទៅជាការទាក់ទាញទេសចរ។
លោក ប៉ាទ្រីក មូហ័ររី (Patrick Muhire) មន្រ្តីក្រុមប្រឹក្សាទេសចរណ៍ បានប្រាប់ទីភ្នាក់ងារ AFP ថា៖ «រ៉ូលិច គឺជាភាពប្រណីតមួយនៅក្នុងប្រទេសអ៊ូហ្គង់ដា»។
អាហារនេះ ដែលមានប្រភពនៅក្នុងទីក្រុងប៊ូសូហ្គា (Busoga) ភាគខាងកើត បានក្លាយជាមានប្រជាប្រិយភាពយ៉ាងលឿនក្នុងចំណោមនិស្សិត នៅសាកលវិទ្យាល័យ Makerere ក្នុងរដ្ឋធានីកំប៉ាឡា គឺប្រហែល ២៦ សេនដុល្លារអាមេរិក វាមិនមែនតែផ្តល់អាហារល្អនោះទេ ប៉ុន្តែតម្លៃក៏មិនថ្លៃដែរ។
បណ្ដាភោជនីយដ្ឋាន និងសណ្ឋាគារនៅអ៊ូហ្គង់ដា មានបម្រើអាហាររ៉ូឡិច បែបប្រណីត។
ភាពទាក់ទាញរបស់វាបានរីករាលដាលយ៉ាងលឿនពីទីនេះ។
លោក មូហ័ររី បានថ្លែងថា៖ «មនុស្សភាគច្រើនបំផុតចាត់ទុកវាជាអាហាររបស់បុរសក្រម្នាក់។ ប៉ុន្តែ ពិធីបុណ្យនេះ ក៏ត្រួវបានទទួលយកដោយអ្នកមានផងដែរ... ជាភាពប្រណីតមួយរបស់ជាតិ»។
លោកបន្តថា៖ «ចាប់តាំងពីនោះមក យើងបានចាប់ផ្តើមពិធីបុណ្យ រ៉ូឡិច ប្រចាំឆ្នាំ ហើយមានភោជនីយដ្ឋានបានចាប់ផ្តើមធ្វើ រ៉ូឡិច ហើយសណ្ឋាគារមួយចំនួនក៏បានធ្វើវាផងដែរ»។
នំរ៉ូឡិច មានទំហំនិងភាពខុសគ្នាទៅតាមតំបន់។
នៅអ៊ូហ្គង់ដា រ៉ូឡិច ជាអាហារដែលចម្អិនពីស៊ុត និងម្សៅនំចាប៉ាទី។ រូបថត AFP
ឧទាហរណ៍ នៅប្រទេសអ៊ូហ្គង់ដា ភាគខាងកើត ទំពាំងត្រូវបានគេលាយបញ្ចូលគ្នាជាមួយម្សៅនំចាប៉ាទី ខណៈតំបន់ភាគខាងជើង អាហារនេះត្រូវបានលាយបន្ថែមជាមួយបន្លែផ្សេងៗដែលត្រូវបានចម្អិនរួចហើយ។
វាក៏មានទំហំផ្សេងៗគ្នាផងដែរ ហើយនំទំហំដ៏ធំមានឈ្មោះ ស្វេហ្សេណេហ្គើរ រ៉ូឡិច ដែលឈ្មោះនេះដាក់តាមតួកុនហូលីវូតសាច់ដុំ អាណុល ស្វេហ្សេណេហ្គើរ (Arnold Schwarzenegger) ដែលប្រើស៊ុតពី ៦ ទៅ ១០គ្រាប់ និងធំគ្រប់គ្រាន់សម្រាប់សមាជិកគ្រួសារទាំងមូល។
នៅពិធីបុណ្យនេះ មេចុងភៅជនជាតិឥណ្ឌា ម៉ិចស៊ិកូ និងកេនយ៉ា ផ្តល់នូវភាពពិសេសរបស់ខ្លួននៅលើសាំងវិចស៊ុតរមូរ៕ AFP/PS
ចុងភៅបង្ហាញស្នាដៃចម្អិនរ៉ូឡិច ក្នុងពិធីបុណ្យប្រចាំឆ្នាំរ៉ូឡិច កន្លងទៅថ្មីៗនេះ។ រូបថត AFP
នៅអ៊ូហ្គង់ដា រ៉ូឡិច ជាអាហារដែលចម្អិនពីស៊ុត និងម្សៅនំចាប៉ាទី ដែលមានតម្លៃថោកសមរម្យ។ រូបថត AFP
