ភ្នំពេញៈ ខណៈរដូវបុណ្យចូលឆ្នាំប្រពៃណីខ្មែរកាន់តែខិតជិតមកដល់ និងស្របពេលដែលលោកនាយករដ្ឋមន្ត្រីជំរុញលើកទឹកចិត្តឲ្យពលរដ្ឋកម្ពុជា នាំគ្នារាំលេងជាមួយនឹងចង្វាក់បែបប្រពៃណីខ្មែរនោះ តារាចម្រៀងប្រុសឈរនៅលំដាប់កំពូលផលិតកម្មសាន់ដេលោក ឆាយ វីរៈយុទ្ធ ក៏បញ្ចេញបទចម្រៀងប្រពៃណីដែលមានចំណងជើងថា «ជូនអូនទៅម៉ែ» ភ្លែតតែម្តង ដើម្បីបំពេអារម្មណ៍ប្រិយមិត្ត។
គេស្រាប់តែឃើញ តារាចម្រៀងប្រុស ដែលបានក្រាបផ្ទឹមចូលរោងជ័យមង្គលការតាមគន្លងប្រពៃណីខ្មែរនឹងកូនក្រមុំ ជាកូនស្រីថៅកែរោងម៉ាស៊ីនកិនស្រូវនៅខេត្តកំពង់ចាម ជាថៅកែលក់អង្ករធំមានយីហោថា «ស្តេចអង្ករ» ដែលប្រើដើមទុន ១ សែនដុល្លារ និងទើបទទួលបានកាដូថ្មី កាលពីដើមឆ្នាំនេះ ក្លាយជាតារាតំណាងទូតសុច្ឆន្ទៈ រថយន្តម៉ាក ឆេវរ៉ូឡេត រយៈពេល ១ ឆ្នាំ លោក ឆាយ វីរៈយុទ្ធ ស្រូតរូតចេញបទចម្រៀងមានចំណងថា «ជូនអូនទៅម៉ែ» ភ្លាម ដោយគ្រាន់តែបានឮថា លោក ហ៊ុន សែននាយករដ្ឋមន្ត្រីខ្មែរមានប្រសាសន៍ថា «ឆ្នាំនេះ អត់រាំបទដូចកាលឆ្នាំមុនទេ គឺឆ្នាំនេះរាំបទសារ៉ាវ៉ាន់ បែបប្រពៃណី អ៊ីចឹងត្រៀមទៅ» នាពេលកន្លងមកនោះ។
តារាចម្រៀងនៅជួរមុខ លោក ឆាយ វីរៈយុទ្ធ បានបញ្ជាក់ទាំងមានក្តីរំភើបចិត្តយ៉ាងខ្លាំង នៅពេលបានឮថា លោក ហ៊ុន សែន បានជំរុញលើកទឹកចិត្តបងប្អូនខ្មែរយើងទាំងក្នុង និងក្រៅប្រទេស ឲ្យងាកមករាំលេងជាមួយបទចម្រៀងបែបជាចង្វាក់ប្រពៃណីខ្មែរនារដូវបុណ្យចូលឆ្នាំថ្មីប្រពៃណីជាតិឆ្នាំ ២០១៨ នេះ។
តារាចម្រៀងល្បីលំដាប់កំពូលនៅទ្រនំផលិតកម្មសាន់ដេ លោក ឆាយ វីរៈយុទ្ធ បានលើកឡើងថា «ខ្ញុំពិតជាសប្បាយចិត្តនៅពេលឃើញបងប្អូនយើងងាកយករាំលេងជាមួយនឹងបទបែបប្រពៃណី ពិសេសកាន់តែសប្បាយចិត្តនៅពេលបានដឹងថា សម្តេចតេជោ ហ៊ុន សែន លោកបានជំរុញឲ្យបងប្អូនខ្មែរយើង រាំលេងឲ្យបានច្រើនជាមួយនឹងបទសារ៉ាវ៉ាន់ និងចង្វាក់ប្រពៃណីខ្មែរផ្សេងៗនោះ»។
ជាមួយគ្នានេះ តាមបណ្តាញសង្គមវិញ មហាជនគ្រប់ទិសទីទាំងក្នុង និងក្រៅប្រទេស ក៏កំពុងតែចាប់អារម្មណ៍ខ្លាំងលើបទ «ជូនអូនទៅម៉ែ» ដែលមានក្បាច់រាំជាចង្វាក់សារ៉ាវ៉ាន់ និងជាបទចម្រៀងយកតាមលំនាំបទដើមតារាចម្រៀងជើងចាស់អ្នកស្រី សូ សាវឿន របស់តារាចម្រៀង ឆាយ វីរៈយុទ្ធ។
តារាចម្រៀងប្រុសមាឌល្អិត សំឡេងក្រអួនមានទឹកដម កំពុងតែស្រូបការគាំទ្រមហាជនខ្លាំងនៅលើទ្រនំផលិតកម្មសាន់ដេ ដែលបានហក់កាន់តំណែងកំពូលក្នុងវិស័យចម្រៀងមានប្រជាប្រិយភាពស្របាលៗគ្នាជាមួយនឹងលោក ព្រាប សុវត្ថិ និងខេមរៈ សិរីមន្ត ផងដែរ។
តំណាងទូតសុច្ឆន្ទៈនៃរថយន្តអាមេរិក Chevrolet លោក ឆាយ វីរៈយុទ្ធ បានបង្ហើបប្រាប់ភ្នំពេញប៉ុស្តិ៍ដែរថា៖ «ខ្ញុំសប្បាយចិត្ត ដែលក្តីស្រមៃធ្លាប់ចង់ជិះរថយន្តម៉ាក នេះកាលពីជិត ១០ ឆ្នាំមុន ឥឡូវបានសម្រេចនូវបំណងហើយ និងលើសពីក្តីរំពឹងទៀតផង ដោយសារខ្ញុំមិនត្រឹមតែទទួលបានរថយន្តពណ៌ខ្មៅក្នុងក្តីស្រមៃប្រភេទ SUV ដែលមានតម្លៃជិត ៧ ម៉ឺនដុល្លារជិះតែប៉ុណ្ណោះទេ ថែមទាំងក្លាយជាតំណាងរយៈពេល ១ ឆ្នាំថែមទៀត»៕