The Phnom Penh Post Search

Search form

Logo of Phnom Penh Post newspaper Phnom Penh Post - គ្រូទាយ​បារមី​លោកតា​ថ្មអណ្ដែត​បង្រៀន​វិធី​គណនា​ហោរាសាស្ត្រ




គ្រូទាយ​បារមី​លោកតា​ថ្មអណ្ដែត​បង្រៀន​វិធី​គណនា​ហោរាសាស្ត្រ

លោក ឡុង បូរ៉ា បង្ហាញពី​ភាព​ឡើង​ចុះ​នៃ​ខ្សែ​ជីវិត​។
លោក ឡុង បូរ៉ា បង្ហាញពី​ភាព​ឡើង​ចុះ​នៃ​ខ្សែ​ជីវិត​។ រូបថត Kimberley Mccosker

គ្រូទាយ​បារមី​លោកតា​ថ្មអណ្ដែត​បង្រៀន​វិធី​គណនា​ហោរាសាស្ត្រ

ភ្នំពេញ: អង្គុយ​ជំទើត​ខ្ពស់​ផុត​ពី​កម្រាល​ដោយ​កល់​កូន​តុ និង​ខ្នើយ​ជា​ទ្រនាប់​ក្នុង​គេហដ្ឋាន​​តុបតែង​លម្អ​​គ្រឿង​សក្ការ​បូជា​សឹង​ពេញ​មួយ​​បន្ទប់​ទទួល​ភ្ញៀវ អម​ដោយ​រូប​ចម្លាក់​ពណ៌​មាស​ព្រះសិវ​នៃ​ព្រហ្មញ្ញ​សាសនា ស្ថិត​នៅ​ក្បែរ​វត្ដ​និរោធិ៍ លោក ឡុង បូរ៉ា វ័យ​​ ៣៧​ ឆ្នាំ នាម​ហៅ​​ «​លោកតា​ថ្មអណ្ដែត» គឺជា​គ្រូ​ទស្សន៍ទាយ​ដ៏ល្បី​ឈ្មោះ​​ម្នាក់​ក្នុង​ប្រទេស​កម្ពុជា​។

កម្មវិធី​បង្រៀន​​រយៈពេល​ ៦ ​ខែ​របស់​លោក ដែល​រដូវកាល​ទី​ ២ ​ចាប់ផ្ដើម​កាលពី​ពេល​ថ្មីៗ​នេះ បាន​បង្ហាញ​វិធីសាស្រ្ត​ប្លែក​ពី​បទដ្ឋាន​អប់រំ​មិន​​ផ្លូវការ​ក្នុង​​ជំនឿ​​អរូបី​។ ថ្នាក់​សិក្សា​របស់​លោក បូរ៉ា អនុវត្ដ​តាម​​កាលវិភាគ​ដ៏តឹងរ៉ឹង និង​​មាន​តម្លៃ​ ៣០០ ដុល្លារ​សម្រាប់​វគ្គ​សិក្សា​នេះ​។

អតីត​ព្រះសង្ឃ​រូប​នេះ បាន​​និយាយ​ថា វគ្គ​បង្រៀន​​របស់​លោក​​ផ្ដោត​លើ​​ជំនាញ​ប្រាកដប្រជា​ត្រឹមត្រូវ​។

លោក​ប្រាប់​ថា​៖ «​គ្រូទាយ​នៅ​តាម​ផ្សារ​​មិន​ដែល​រៀន​ក្បួន​ខ្នាត​ទស្សន៍ទាយ​ទេ​។ ពួកគេ​គ្រាន់តែ​ស្មានៗ​ប៉ុណ្ណោះ​។ ពួកគេ​ខ្លះ​មាន​បទពិសោធ​ទាយ​តាម​អាជីព ឬ​រៀន​តាម​​សៀវភៅ ប៉ុន្ដែ​នៅ​មិន​ទាន់​គ្រប់គ្រាន់​ទេ​»។

លោកគ្រូ បូរ៉ា បាន​ឲ្យ​ដឹង​ថា គ្រូទាយ​គ្មាន​ជំនាញ​ភាគច្រើន​ប្រើ​សន្លឹក​បៀរ ជា​ទិចនិក​ទស្សន៍ទាយ​ដ៏​បុរាណ​បំផុត ហើយ​វា​ជា​វិធី​ដែល​លោក​មិន​យក​មក​បង្រៀន​សិស្ស​ឡើយ​។ ផ្ទុយ​ទៅវិញ គ្រូទាយ​បារមី​លោកតា​ថ្មអណ្ដែត​រូប​នេះ ប្រាប់​ថា គោលដៅ​របស់​លោក គឺ​បង្រៀន​សិស្ស​ដោយ​ប្រើ​វិធី​គណនា​ស៊ី​ជម្រៅ​​មក​ទស្សន៍ទាយ​ហោរាសាស្ដ្រ​។

ដើម្បី​គណនា លោក​ត្រូវ​ដឹង​អំពី​ថ្ងៃ ខែ​ឆ្នាំ​កំណើត​របស់​អតិថិជន ដើម្បី​ទាយ​រក​ជោគជតា​រាសី​របស់​បុគ្គល​នោះ​។ បន្ទាប់មក លោក បូរ៉ា បង្រៀន​សិស្ស​អំពី​ដំណោះស្រាយ​ឲ្យ​សម​ទៅ​នឹង​លទ្ធផល​ក្រោយ​គន់គូរ​ជើង​លេខ ដូចជា តើ​គួរ​រៀបការ​ថ្ងៃ​ណា ឬ​ប្រើ​អាគម​អ្វី​ដើម្បី​បន្ទន់​ចិត្ដ​ដៃគូ​។

លោកគ្រូ​ថ្មអណ្ដែត បាន​លើក​ឡើង​ថា​៖ «​មនុស្ស​ភាគច្រើន​មក​រក​គ្រូទាយ​នៅពេល​ពួកគេ​ជួប​បញ្ហា​កើត​ឡើង​។ វា​សំខាន់​ណាស់​ដែល​គ្រូទាយ​ត្រូវ​ចេះ​ប្រមើល​មើល​ពី​ចិត្ដ​របស់​ពួកគេ គួប​ផ្សំ​នឹង​ក្បួន​គន់គូរ​ផង​ដែរ។ ប្រាកដ​ណាស់ វា​មាន​ក្បួន​ខ្នាត​ជាច្រើន ប៉ុន្ដែ​វា​ក៏​ត្រូវ​ចេះ​វិធី​ចិត្ដសាស្ដ្រ និង​មើល​ពី​អត្ដចរិត​របស់​​មនុស្ស​ផង​ដែរ​»។

វគ្គ​សិក្សា​របស់​លោក​មិន​បាន​ផ្ដោត​សំខាន់​​លើ​មនុស្ស​ទូទៅ​​ដែល​ចង់​ចេះ​ទស្សន៍ទាយ​នេះ ប៉ុន្ដែ​លោក​ចង់​បង្រៀន​អាចារ្យ​ច្រើន​ជាង​។

លោក ឡុង បូរ៉ា ធ្លាប់​ជា​ព្រះសង្ឃ នៅពេល​លោក​អាយុ​ ២១ ​ឆ្នាំ ប៉ុន្ដែ​គិត​ថា លោក​មិន​ពេញ​ចិត្ដ​ជីវិត​សម្ងំ​ដែល​ក្នុង​ព្រះវិហារ​នោះ​ទេ​។ មួយ​ឆ្នាំ​ក្រោយ​មក លោក​បាន​សម្រេច​ចិត្ដ​លាចាក​សិក្ខាបទ និង​ចាប់ផ្ដើម​ត្រាច់ចរ​ទៅកាន់​ថៃ និង​ឥណ្ឌា​។

ព្រះតេជគុណ សួន សឿន​ ដែល​បាន​​ចូល​រៀន​អំពី​តម្រា​ទស្សន៍ទាយ​កាលពី​ឆ្នាំ​មុន មាន​សង្ឃដីកា​ថា៖ «​ក្រោយពី​អាត្មា​បាន​រៀន​អំពី​ក្បួន​ទស្សន៍ទាយ​ អាត្មា​អាច​ជួយ​មនុស្ស​ជាច្រើន និង​​ប្រមើល​មើល​ពី​ជោគជតា​រាសី​ឲ្យ​ពួកគេ​ផង​ដែរ​។ បើ​អ្នក​ចេះ​មិន​ប្រាកដ វា​នឹង​ធ្វើឲ្យ​ប្រជាជន​បាត់​ជំនឿ​»។

ថ្នាក់​សិក្សា​របស់​លោកគ្រូ​ទទួល​បាន​ការ​គាំទ្រ​ពី​គណៈកម្មាធិការ​​ជាតិ​​រៀបចំ​បុណ្យ​ជាតិ និង​អន្ដរជាតិ ប៉ុន្ដែ​មិន​ទាន់​បាន​ឆ្លង​ក្រសួង​វប្បធម៌ និង​វិចិត្រ​សិល្បៈ​ ដែល​បច្ចុប្បន្ន​កំពុង​បើក​ថ្នាក់​បង្រៀន​តាអាចារ្យ ដែល​មិន​បញ្ចូល​ក្បួន​តម្រា​ទស្សន៍ទាយ​ទេ​។ លោក​សង្ឃឹម​ថា ការ​ឯកភាព​ពី​ស្ថាប័នរដ្ឋ​នឹង​សម្រេច​ទាន់​ពេល​។

លោក ឡុង បូរ៉ា មាន​ជំនឿ​ចិត្ដ​ថា​៖ «​នៅ​ចិន សូម្បីតែ​វិស្វករ​ក៏​ចូល​រៀន​ពី​ក្បួន​ទស្សន៍ទាយ​ហុងស៊ុយ​រក​ទីកន្លែង​ល្អ​ដើម្បី​សាងសង់​តាម​​អបិយ​ជំនឿ​ដែរ​។ នៅ​ថ្ងៃ​អនាគត ខ្ញុំ​សង្ឃឹម​ថា នឹង​​មាន​សាលា​បង្រៀន​ទស្សន៍ទាយ​​ផ្ទាល់​ខ្លួន​​»៕ HR

អត្ថបទគួរចាប់អារម្មណ៍