.jpg)
បុរសពស់សាក់ទាំងរាងកាយ អណ្ដាត និងកែវភ្នែក។ AFP
ក្រុងប៉ារីស៖ ពេលយប់ជា Freaky Hoody ជាមនុស្សសាក់សុសសាច់នៅបារាំង សូម្បីតែអណ្ដាត និងកែវភ្នែកក៏មិនលើកលែង។ ពេលថ្ងៃ លោក ហេឡែន ជាគ្រូបង្រៀនម្នាក់។
លោក ស៊ីលវែន ហេឡែន សារភាពថា៖ «រាងកាយលោកធ្វើឱ្យមនុស្សម្នាស្រឡាំងកាំងខ្លាំង ពេលជួបសិស្ស និងឪពុកម្ដាយរបស់ពួកគេ។ តែពេលខ្ញុំណែនាំខ្លួន ហើយពួកគេយល់ថា ខ្ញុំជាគ្រូបង្រៀនម្នាក់ដូចគ្រូដទៃទៀតប៉ុណ្ណោះ»។
លើរាងកាយបុរសវ័យ ៣៥ ឆ្នាំ គ្មានសល់ ១ សង់ទីម៉ែត្រ ដែលគ្មានស្នាមម្ជុលសាក់នោះទេ។ អ្នកខ្លះដាក់រហស្សនាមថា «បុរសពស់» ដែលរូបគេត្រូវធ្វើដំណើរទៅកាន់ប្រទេសស្វ៊ីស ដើម្បីសាក់កែវភ្នែក ពីព្រោះវាជាទង្វើខុសច្បាប់នៅបារាំង។
លោកថា៖ «វាជាទារុណកម្ម។ ពួកគេចាប់ហែកភ្នែកខ្ញុំ ហើយសាកគិតមើលថា គេយកម្ជុលមកដាក់ភ្នែក វាឈឺដល់កម្រិតណា? គ្មាននរណាដឹងថា វានឹងមានរឿងអ្វីកើតឡើងខាងមុខទេ។ នេះជាអ្វីដែលខ្ញុំនិយាយប្រាប់គេថា កុំធ្វើតាមខ្ញុំ»។
លោក ហេឡែន ដែលបានចំណាយ ៦៦ ០០០ ដុល្លារចាក់សាក់លើរាងកាយ ៨ ឆ្នាំ ចុងក្រោយថា៖ «ប៉ុន្ដែចំពោះរូបខ្ញុំ ខ្ញុំនៅតែមានអារម្មណ៍មិនទាន់គ្រប់គ្រាន់»។
លោក ស៊ីលវែន ហេឡែន ចំណាយពេល ៨ ឆ្នាំ ចាក់សាក់ពេញរាងកាយ។ រូបថត AFP
ស្គាល់ជា Freaky Hoody លើបណ្ដាញសង្គម ដែលមានអ្នកគាំទ្រជិត ៦ ម៉ឺននាក់ លោក ហេឡែន បានទទូចថា លោកមិនសោកស្ដាយចំពោះការសម្រេចចិត្ដសាក់ពេញខ្លួននេះឡើយ ដោយមានទាំងពណ៌ផ្កាលើក្បាលកោរត្រងោល រហូតដល់ក្បាលបិសាចលើខ្នង។
លោកបានបន្ថែមថា៖ «ខ្ញុំប្រហែលជាត្រូវសាក់ពណ៌ខ្មៅពេញខ្លួននៅអាយុ ៨០ ឆ្នាំហើយមើលទៅ»។
ស្លាកស្នាមសាក់គ្រប់កន្លែង មិនបានបិទបាំងឱកាសចំពោះរូបលោក។
លោកបាននិយាយទៀតថា៖ «ទីភ្នាក់ងារម៉ូដែលបានទាក់ទងខ្ញុំថតភាពយន្ដ និងល្ខោនភាគទូរទស្សន៍»។
លោកគ្រូ ហេឡែន ធ្វើឲ្យសិស្ស និងឪពុកម្ដាយភ្ញាក់ផ្អើលខ្លាំង។ AFP
លោក ហេឡែន ជាប់ងារជានិម្មិតរូបសិល្បៈលើរាងកាយនៅសាលារៀនកាលពី ៣ ឆ្នាំមុន ពេលលោករស់នៅជាមួយម្ដាយ ពីព្រោះវាជាមធ្យោបាយតែ ១ គត់ដែលលោកអាចចំណាយថ្លៃសាក់រាងកាយពីប្រាក់ខែគ្រូបង្រៀន។
លោកថា រូបរាងរបស់ខ្លួនជាឧទាហរណ៍ជាក់ស្ដែងសម្រាប់សិស្សដែលរៀនចេះទទួលយក និងគោរពអ្នកដទៃ។
លោកបន្ដថា៖ «សិស្សដែលមើលឃើញខ្ញុំចេះរៀនអត់ឱនឱ្យអ្នកដទៃ។ នៅពេលពួកគេធំឡើង ពួកគេអាចមិនប្រកាន់គំនិតរើសអើង ឬខ្លបខ្លាចគេ ហើយពួកគេនឹងមិនសម្លឹងក្នុងក្រសែភ្នែកមិនល្អដាក់អ្នកមានពិការភាព»៕ AFP/HR
