ក្រុងអាំស្ទែដាំ៖ ឡានស្ទូចបានលើកទូរថភ្លើងក្រោមដីចេញពីចម្លាក់កន្ទុយបាឡែនយក្សកាលពីថ្ងៃអង្គារ នៅទីក្រុងនៃប្រទេសហូឡង់ ប្រកបដោយសុវត្ថិភាព គឺ ១ ថ្ងៃក្រោយពីចម្លាក់សិល្បៈនេះបានទប់ទូរថភ្លើងពីការរលាក់ធ្លាក់ទៅដី។
រថភ្លើងបានបុកទម្លុះរនាំងការពារនៅចុងផ្លូវរត់ឯទីក្រុង Spijkenisse ក្បែរក្រុងរុតធើដាំ កាលពីព្រលឹមថ្ងៃចន្ទ និងបន្សល់ទុកទូរថភ្លើងប្រវែង ១០ ម៉ែត្រ ជាប់ទើរលើចម្លាក់កន្ទុយត្រីបាឡែនយក្ស។
ក្នុងប្រតិបត្ដិការទម្លាក់ទូរថភ្លើងដ៏គួរឱ្យស្រៀវឆ្អឹងខ្នង ក្រុមសេវាកម្មសង្គ្រោះបានកាត់ទូផ្នែកខាងមុខទម្ងន់ ២២ តោន ពីតួទូរថភ្លើងកាលពីថ្ងៃអង្គារ មុនពេលឡានស្ទូច ២ គ្រឿងបានលើកវាចុះមកដី។
លោក ខាលី ហ្គូធ័រ អ្នកនាំពាក្យអង្គភាពសុវត្ថិភាពរុតធើដាំរីនម៉ុង បានប្រាប់ទីភ្នាក់ងារ AFP នៅកន្លែងកើតហេតុថា៖ «វាត្រូវការពេលវេលាយូរជាងការរំពឹងទុក។ វាដោយសារតែយើងមិនអាចមើលឃើញអ្វីនៅពីក្រោមទូរថភ្លើង ហើយយើងបានឃើញរបស់ខ្លះ ដែលមិនអាចវាយតម្លៃច្បាស់បាន ដូច្នេះយើងត្រូវប្រថុយប្រតិបត្ដិការទម្លាក់វាចុះ»។
សកម្មភាពនេះនាំឱ្យមានការខូចខាតខ្លះចំពោះចម្លាក់បាឡែនអាយុកាល ២០ ឆ្នាំ ដែលឈរត្រដែតនៅឧទ្យានក្នុងស្រុក និងត្រូវបានដាក់រហស្សនាមថា «កន្ទុយសង្គ្រោះ»។
អ្នកបើកបររថភ្លើងមិនមានគ្រោះថ្នាក់អ្វីឡើយក្នុងឧប្បត្ដិហេតុនោះ ហើយសំណាងល្អក៏គ្មានអ្នកដំណើរនៅលើនោះដែរ។
លោក ហ្គូធ័រ បាននិយាយថា មូលហេតុបង្កឱ្យជួបគ្រោះថ្នាក់នោះនៅមិនទាន់ដឹងច្បាស់ តែអាជ្ញាធរហូឡង់រំពឹងថា ទិន្នន័យក្នុង «ប្រអប់ខ្មៅ» ដែលស្ថិតនៅទូរថភ្លើងខាងមុខ នឹងបង្ហាញពីតម្រុយនាំឱ្យមានហេតុការណ៍នេះកើតឡើង៕ AFP/HR