.jpg)
ស្នាដៃរបស់លោករួមមានចម្លាក់ នាគសន្តិភាព ធ្វើពីកាំភ្លើង AK-47 និងចម្លាក់តារាបាល់ទាត់ ដេវីដ បេកខេម។ រូបថត សហការី, លោក អ៊ុក ជឹមវិចិត្រ និងស្នាដៃចម្លាក់ បេះដូងបក្សី។ រូបថត ហុង មិនា
ភ្នំពេញ៖ ទម្រង់សត្វបក្សីអើតក្បាលងើយមើលមេឃ តភ្ជាប់ជាមួយកដ៏វែង ខណៈរាងកាយផ្គុំពីគ្រឿងបន្លាស់ដែកតូចៗជាច្រើនរំលេចជារូបរាងបេះដូង ហើយជើងត្រូវបានទ្រដោយទម្ររាងដូចថូផ្កាចំនួន ៤។
នេះគឺជា «បេះដូងបក្សី» ហើយវាជាចម្លាក់សត្វស្លាបកម្រដែលត្រូវបានរចនាឡើងពីគ្រឿងលោហៈធាតុសម្រាប់ទាក់ទាញអ្នកទស្សនាឲ្យមានការស្រឡាញ់ចូលចិត្ដសត្វស្លាបនានា។
សិល្បករចម្លាក់សម័យទំនើប លោក អ៊ុក ជឹមវិចិត្រ បានឲ្យដឹងថា៖ «បេះដូងបក្សីនេះ ខ្ញុំចង់សំដៅលើសត្វស្លាបគ្រប់ប្រភេទដែលជិតផុតពូជ ពីព្រោះវាជាការច្នៃប្រឌិតដើម្បីឲ្យមហាជនមានការស្រឡាញ់ និងចាប់អារម្មណ៍បក្សីមានទម្រង់បេះដូង និងសម្រាប់តាំងលម្អ»។
ស្នាដៃចម្លាក់បេះដូងបក្សី របស់សិល្បករ អ៊ុក ជឹមវិចិត្រ ជាផ្នែកមួយនៃស្នាដៃចម្លាក់លោហៈជាច្រើនទៀតរបស់លោក ដែលស្ថិតក្នុងចំណោមស្នាដៃអ្នកសិល្បៈជាច្រើនរូបត្រូវបានចងក្រងប្រមូលផ្ដុំ ដោយវិចិត្រសាលក្បាច់ ក្រោមចំណងជើងថា «ក្បាច់ប្រមូលផ្ដុំឆ្នាំ ២០២០»។
លោក អ៊ុក ជឹមវិចិត្រ ដែលទើបបានចូលរួមបង្ហាញស្នាដៃនៅស្ថានទូតបារាំងនាពេលថ្មីៗ ជាអតីតនិស្សិតនៃគម្រោងសិល្បៈសន្ដិភាពកម្ពុជា និងបានសិក្សាចម្លាក់បែបទំនើបនៅសាកលវិទ្យាល័យភូមិន្ទវិចិត្រសិល្បៈក្នុងឆ្នាំ ២០០៦។
ចម្លាក់សត្វស្លាប ជាស្នាដៃរបស់លោកត្រូវបានដាក់តាំងបង្ហាញនៅវិចិត្រសាលក្បាច់។ហុង មិនា
នៅក្នុង «ក្បាច់ប្រមូលផ្ដុំ» លោក ជឹមវិចិត្រ ត្រូវបានចងក្រងស្នាដៃចម្លាក់លោហៈ ចំនួន ៦ ឈុត ចាប់ពីចម្លាក់ដំរីមាស បក្សីផុតពូជ គ្រួសារក្រសា បេះដូងបក្សី រហូតដល់ចម្លាក់រូបតារាវាយកូនហ្គោល ថៃហ្គ័រ វូដ និងតារាបាល់ទាត់ ដេវីដ បេកខេម។
លោក អ៊ុក ជឹមវិចិត្រ អាយុ ៣៨ ឆ្នាំ បានប្រាប់ ភ្នំពេញប៉ុស្ដិ៍ ថា៖ «ចំពោះចម្លាក់បក្សី ខ្ញុំមានការផលិតឡើងច្រើនជាងចម្លាក់ផ្សេងៗ និងត្រូវបានដាក់តាំងបង្ហាញ និងលក់នៅក្រៅប្រទេស ដូចជា ហាង សណ្ឋាគារ និងវិចិត្រសាលនានា។ ចម្លាក់បក្សីទាំងនោះ រួមមាន សត្វឥន្ទ្រីនៅសារមន្ទីរសិង្ហបុរី ចម្លាក់ក្រសា ត្រដក់ បក្សីសន្ដិភាព និងគ្រួសារក្រសារជាដើម»។
ចម្លាក់បក្សីត្រូវបានរចនាឡើងពីកម្ទេចអាវុធយុទ្ធភណ្ឌសុទ្ធសាធ ដែលជារាជរដ្ឋាភិបាលកម្ពុជាបានធ្វើការប្រមូល និងកម្ទេចចោលនូវអាវុធខុសច្បាប់នៅទូទាំងប្រទេស។
សិល្បករ ជឹមវិចិត្រ បានឲ្យដឹងថា សិល្បករអង់គ្លេស Sasha Constable បានបង្កើតក្រុមការងារមួយជាមួយសិល្បករខ្មែរ ដោយផ្ដោតសំខាន់លើការស្វែងរកសន្ដិភាពដែលចាប់ផ្ដើមឡើងពីខ្លួនឯងមុនគេ។
សិល្បករខ្មែរដែលផលិតចម្លាក់នាគសន្ដិភាពពីកាំភ្លើង AK-47 ចាស់ៗចំនួន ៣ ០០០ ដើម ទម្ងន់ ៣ តោន កាលពីឆ្នាំ ២០០៧ រូបនេះ បានឲ្យដឹងថា គំនិតក្នុងការបង្កើតស្នាដៃសិល្បៈនេះ គឺមានតាំងពីដូនតាខ្មែរមកម្ល៉េះ។
លោកបានឲ្យដឹងថា៖ «ប៉ុន្ដែចម្លាក់ច្នៃពីកាំភ្លើងមិនសូវមានច្រើននោះទេ។ ដោយសារយុទ្ធសាស្ដ្រចតុកោណរបស់រាជរដ្ឋាភិបាលក្នុងការស្វែងរកសន្ដិភាពជូនប្រជាជនតាមរយៈការកម្ទេចកាំភ្លើងយុទ្ធភណ្ឌទូទាំងប្រទេស ទើបការកែច្នៃចម្លាក់កាំភ្លើងនេះលេចចេញជារូបរាងឡើងនៅអំឡុងឆ្នាំ ២០០៣ និងឆ្នាំ ២០១០ ដែលកម្ពុជាលែងមានកាំភ្លើងខុសច្បាប់»។
កិច្ចការផ្សាបំណែកលោហៈបង្កើតជាស្នាដៃសិល្បៈ។ រូបថត សហការី
លោក អ៊ុក ជឹមវិចិត្រ បានបង្កើតស្នាដៃជាច្រើនទាក់ទងនឹងចម្លាក់ផ្គុំឡើងពីលោហៈធាតុអាវុធយុទ្ធភណ្ឌ ដែលមានបំណងផ្សព្វផ្សាយអំពីផលលំបាកដោយសារសង្គ្រាម។ ស្នាដៃទាំងនោះត្រូវបានដាក់តាំងបង្ហាញទាំងក្នុង និងក្រៅប្រទេស ក៏ដូចជាធ្វើការលក់ថែមទៀតផង។
លោកបានអះអាងទៀតថា៖ «មានស្នាដៃធំៗផ្សេងទៀតត្រូវបានតាំងបង្ហាញនៅក្នុងសួនច្បារនានា ដូចជា នៅរមណីយដ្ឋានប្រវត្ដិសាស្ដ្រវត្ដភ្នំ នោះគឺជាបក្សីសន្ដិភាព ត្រីសន្ដិភាព នៅកំពង់ធំ ព្រមទាំងនាគសន្ដិភាព និងអប្សរាសន្ដិភាពនៅបាត់ដំបង»។
ដោយត្រូវបានជ្រើសរើសជាស្នាដៃឆ្នើមប្រចាំឆ្នាំពីវិចិត្រសាលក្បាច់ ចម្លាក់លោហៈទាំង ៦ ឈុតត្រូវបានដាក់តាំងបង្ហាញនៅវិចិត្រសាលក្បាច់ និងដាក់លក់សម្រាប់អ្នកស្រឡាញ់ស្នាដៃសិល្បៈច្នៃប្រឌិត និងបង្កអត្ថន័យចន្លោះតម្លៃពី ៥ ៥០០ ដុល្លារដល់ ១៨ ៥០០ ដុល្លារ។
វិចិត្រសាលក្បាច់ ស្ថិតនៅក្នុងអគារ Phnom Penh Factory លើផ្លូវជាតិលេខ ២ នៃសង្កាត់ចាក់អង្រែ ខណ្ឌមានជ័យ រាជធានីភ្នំពេញ។
សម្រាប់ព័ត៌មានលម្អិតសុំចូលទៅកាន់ហ្វេសប៊ុក @KBachArts៕
