ក្រុងប៊ែរឡាំង៖ ប៉ូលិសអាល្លឺម៉ង់កំពុងស៊ើបអង្កេតឧប្បត្ដិហេតុបាត់ចម្លាក់លិង្គឈើដ៏អាថ៌កំបាំង ដែលជាវត្ថុកម្សាន្ដចិត្ដដល់ក្រុមអ្នកឡើងភ្នំនៅជួរភ្នំបារ៉ារែន រយៈពេលជាច្រើនឆ្នាំ។
លោក Holger Stabik អ្នកនាំពាក្យប៉ូលិសបាវ៉ារែននិយាយថា៖ «យើងបានបើកការស៊ើបអង្កេតចំពោះការបាត់ចម្លាក់លិង្គនេះ»។
យោងតាមកាសែត Allgaeuer Zeitung ក្នុងស្រុកបានឱ្យដឹងថា គល់ និងសំណល់ឈើតិចតួច នៅសេសសល់កន្លែងចម្លាក់លិង្គយក្ស ដែលមានកម្ពស់ជិត ២ ម៉ែត្រ នៅភូមិ Alpine ក្រុង Rettenberg។
ស្ដ្រីម្ចាស់ស្រុកម្នាក់បានប្រាប់កាសែតនេះថា៖ «ច្បាស់ជាមាននរណាម្នាក់អារផ្ដាច់នាពេលយប់»។
លោក Stabik បានឱ្យដឹងថា ប៉ូលិសមិនច្បាស់ថា តើវាជាអំពើឧក្រិដ្ឋ ហើយក៏មិនច្បាស់ថា នរណាជាអ្នកដំឡើងលិង្គយក្សនោះ ឬដាក់វាយ៉ាងដូចម្ដេចពីមុនមកនោះទេ។
លោកបន្ដថា៖ «បញ្ហានេះទំនងជាមិនស្ថិតក្នុងរបៀបវារៈនៃការស៊ើបអង្កេតនោះទេ តែវាអាចជាម្ចាស់ ដែលអារកាត់លិង្គនោះយកទៅវិញ»។
ចម្លាក់លិង្គឈើត្រង់ឆ្កឹងបានបង្កការភ្ញាក់ផ្អើលនៅតាមបណ្ដាញផ្សព្វផ្សាយក្នុងប្រទេសអាល្លឺម៉ង់ កាលពីប៉ុន្មានសប្ដាហ៍មុននៅពេលវាត្រូវបានគេដំឡើងឡើងវិញ ក្រោយពីមានសត្វរុញផ្ដួល។
អភិបាលក្រុង Rettenberg បាននិយាយថា វាពិតជាគួរឱ្យសោកស្ដាយដែលបាត់បង់ «វិមានវប្បធម៌» ដ៏ចម្លែកនេះ ដែលជួយផ្សព្វផ្សាយទេសចរណ៍តំបន់យើង។
ស្នាដៃសិល្បៈនេះក៏ត្រូវបានចាត់ទុកជា «វិមានវប្បធម៌» នៅលើផែនទីរបស់ហ្គូហ្គល (Google Map) ផងដែរ៕ AFP/HR