ភ្នំពេញៈ តារាសម្តែង និងតារាចម្រៀងជាផលិតករវ័យក្មេងលោក ចាន់ណា រ៉ូណាន ចូលចិត្តរំលេចវណ្ណកម្មរឿងខ្មោច ច្រើនជាងរឿងភាគដែលផ្ទុះទាំងការគាំទ្រក៏ដូចជាមានការរិះគន់ពីមហាជនថាខ្សត់ខ្លឹមសារអប់រំ ប៉ុន្តែផលិតកររូបនេះអះអាងថានៅតែមិនបោះបង់រឿងខ្មោចព្រាយ និងទំនៀមទម្លាប់ខ្មែរឡើយ។
ក្នុងថ្ងៃសម្ពោធរឿង «ឯណាខ្មោច» កាលពីថ្ងៃទី ១៩ ខែមីនា កន្លងទៅនេះ ចាន់ណា រ៉ូណាន ថ្លែងប្រាប់ ភ្នំពេញ ប៉ុស្ដិ៍ ពីការនិយមផលិតរឿងខ្មោចបែបកំប្លែងយ៉ាងដូច្នេះថា៖ «បើសិនជាយើងងាកមកផលិតកុនដែលមានអភិនិហារ ឬមួយបាញ់គ្នា វាទទួលរងនឹងហានិភ័យច្រើនណាស់ បើសិនជាយើងនិយាយតែអវិជ្ជមានក្នុងសង្គមខ្លាំងពេកអាចទទួលបានការព្រមានពីក្រសួងវប្បធម៌។ អ៊ីចឹងខ្ញុំក៏ងាកមកធ្វើរឿងខ្មោចបែបកំប្លែង បែបពញ្ញាក់លាយឡំនឹងភាពភ័យរន្ធត់ដែលជាចំណូលចិត្តរបស់ប្រជាជនមួយចំនួនធំ ទោះបីរងការរិះគន់ពីមនុស្សចំនួនតូចក៏ដោយ»។
ទោះជាលោកជ្រើសរើសយកការផលិតរឿងតម្រូវតែតាមចំណូលចិត្តទស្សនិកជនខ្មែរ អតីតប្រធានក្រុម De5inite លោក រ៉ូណាន អះអាងថាការផលិតក៏មិនងាយស្រួលដែរ។
លោកបានរៀបរាប់ពីការលំបាកថា៖ «ចំពោះរឿងខ្មោចយើងពិបាកបំផុតគឺរកទីតាំង យើងគិតថាផ្ទះហ្នឹងគួរសមអាចឲ្យយើងថតបានហើយ ប៉ុន្តែនៅពេលដែលម្ចាស់ផ្ទះគាត់បានដឹងថារឿងខ្មោចគាត់ដាច់ខាតមិនឲ្យថតបាត់ទៅហើយ តែក៏ពិបាកក្នុងរឿងនេះដែរ ព្រោះប្រពៃណីយើងជឿទៅលើជំនឿច្រើន»។
ក្នុងដំណើរលើវិថីសិល្បៈជាអ្នកផលិតខ្សែភាពយន្តលោក រ៉ូណាន បានដាក់បញ្ចាំងកុនខ្មោចចំនួន ៦ រឿងមកហើយដូចជារឿងកំណត់ហេតុនាងនាថ និងរឿងសសរកន្លោង។ រឿងទី ៧ ទើបតែដាក់សម្ពោធគឺរឿង «ឯណាខ្មោច» ជាស្នាដៃថ្មី ភ័យរន្ធត់ តក់ស្លុត ពញ្ញាក់អារម្មណ៍អ្នកទស្សនាឲ្យព្រឺព្រួចទៅតាមសាច់ភ្លេង និងការសម្តែងមានទាំងកំប្លែងធ្វើឲ្យរឿងខ្មោចរបស់លោកមានការគាំទ្រច្រើនជាងរឿងបែបមនោសញ្ចេតនា។
លោក ចាន់ណា រ៉ូណាន ក៏បានបន្ថែមទៀតដែរថា៖ «មិនមែនថាខ្ញុំមិនមានរឿងបែបមនោសញ្ចេតនានោះទេ ប៉ុន្តែខ្ញុំមិនទាន់បានលើកយករឿងដែលខ្ញុំមានមកបង្ហាញឲ្យបងប្អូនបានទស្សនាដោយសារការធ្វើអ្វីមួយយើងត្រូវតែដឹងពីទីផ្សារថា គេឥឡូវកំពុងត្រូវការអីត្រូវតម្រូវតាមទីផ្សារ»។
ផលិតដោយផលិតកម្ម LD Picture រឿង «ឯណាខ្មោច» ត្រូវបានដាក់បញ្ចាំងនៅថ្ងៃទី ២១ ខែមីនា។
សាច់រឿងនិយាយពីក្រុមនិស្សិតពេទ្យមួយក្រុមត្រូវមកចុះកម្មសិក្សានៅមន្ទីរពេទ្យបង្អែកដែលគេល្បីថាមានខ្មោចលងសាហាវ ហើយនឹងចំយប់ដែលគេបញ្ជូនសពតៃហោងកូនស្រីសេដ្ឋីម្នាក់ស្លាប់ដោយសារក្រឡាប់ឡានធ្លាក់ជ្រោះហើយយកទៅរក្សាទុកក្នុងមន្ទីរពេទ្យនោះ។ រឿងនេះក៏ឆ្លុះបញ្ចាំងពីភាពលោភលន់ដែលនាំឲ្យមនុស្សអន្តរាយខ្លួនផងដែរ៕