.jpg)
កញ្ញា ចាន់ ស្រីនាថ កំពុងតែថត Cover បទ «កូនស្រីអ្នកនេសាទ»។ ហ្វេសប៊ុក
ភ្នំពេញៈ តារាចម្រៀងស្រីដែលមានទឹកមុខស្រគត់ស្រគំ តែទឹកដមសំនៀងពីរោះដែលទទួលបានប្រជាប្រិយភាពពីអ្នកគាំទ្រតាមរយៈការច្រៀងឡើងវិញបទចាស់ៗកញ្ញា ចាន់ ស្រីនាថ កំពុងតែល្បីខ្លាំងក្នុងបណ្តាញសង្គមនៃប៉ុស្តិ៍យូធូប ជាពិសេសលេចវត្តមានក្នុងផលិតកម្មអនឡាញ ២ គឺ មយូរា និងប្លេកក្ល។
កញ្ញា ចាន់ ស្រីនាថ ជាតារាចម្រៀងស្រីដែលជាដៃគូចម្រៀងដ៏ស័ក្តិសមនឹងតារាចម្រៀងប្រុសលោក យុទ្ធ និស្ស័យ ដោយប្រិយមិត្តឧស្សាហ៍ឃើញបង្ហើរសំនៀងតាមរយៈផលិតកម្មអនឡាញប្លេកក្ល (BlackClaw) តែម្តងដោយមហាជនលាន់មាត់សរសើរថា ច្រៀងពីរោះ និងសម្តែងសមតាមបទចម្រៀង ដែលនាងបានច្រៀង Cover ទាំងច្រៀងទោល និងច្រៀងឆ្លើយឆ្លង។
តារាចម្រៀងស្រីទើបតែល្បីតាមបណា្តញសង្គម ចាន់ ស្រីនាថ។ រូបថត ហ្វេសប៊ុក
កន្លងមកតារាចម្រៀងស្រីរៀមច្បងត្រកូលចាន់ កញ្ញា ចាន់ ស្រីនាថ ដែលមានប្អូនស្រីបង្កើត ២ រូបគឺកញ្ញា ចាន់ ស្រីណា និង ចាន់ ស្រីខួច ក៏ជាតារាចម្រៀងដែរ ហើយក៏មានប្អូនស្រីជីដូនម្នាក់ឈ្មោះកញ្ញា ចាន់ នីកា ដែលជាពិធីការិនីនៃទូរទស្សន៍ Fresh News និង Khmer Talking នាពេលកន្លងមកក៏ធ្លាប់បានបញ្ចេញស្នាដៃបទចម្រៀងអូរីជីណលបំពេអារម្មណ៍ទស្សនិកជនដូចជា បទចម្រៀង «មនុស្សប្រុសគ្មានអ្នកណាស្មោះទេ» និងបទ «ម្នាក់ឯងជាថ្មី» ជាដើម តែហាក់មិនសូវលេចភាពល្បីនោះទេ ខណៈបានប្រឡូកអាជីពចម្រៀងនេះប្រហែល ៧-៨ ឆ្នាំមកហើយ។
តែនារយៈពេលជិត ២ ឆ្នាំចុងក្រោយនេះ កញ្ញា ចាន់ ស្រីនាថ មិនត្រឹមតែមានរាសីឡើងទេ ថែមទាំងផ្ទុះការគាំទ្រពីមហាជនទៀតផងតាមរយៈបទចម្រៀងមរតកដើមនានាដែលកញ្ញាបានយកមកច្រៀងឡើងវិញតាមផលិតកម្មអនឡាញ មយូរា និងប្លេកក្ល គឺមានទាំងបទទោល និងបទឆ្លើយឆ្លងជាមួយតារាចម្រៀងប្រុសលោក យុទ្ធ និស្ស័យ នោះ។
កញ្ញា ចាន់ ស្រីនាថ បង្ហើបប្រាប់ថា៖ «សម្រាប់អាជីពចម្រៀងនោះ នាងខ្ញុំបានចាប់វាអស់រយៈពេលប្រហែលជា ៧-៨ ឆ្នាំ ហើយដោយគ្រាន់តែជាតារាចម្រៀងអាហ្វែរតាមកម្មវិធីជប់លៀង និងមង្គលការនានាគឺមិនសូវមានបងប្អូនស្គាល់ទេ។ តែរយៈពេលជិត ២ ឆ្នាំចុងក្រោយសប្បាយចិត្តខ្លាំងពេលឃើញបងប្អូនគាំទ្រ និងស្គាល់ខ្ញុំតាមរយៈប៉ុស្តិ៍ Channel YouTube នោះ។ លើសពីនេះនាងខ្ញុំក៏មមាញឹកនឹងការងារសិល្បៈចម្រៀងខ្លាំងជាងមុនផងដែរ ក្រោយពីមានបងប្អូនស្គាល់ និងផ្តល់តម្លៃសម្រាប់ខ្ញុំ»។
ខណៈដែលទើបផុសភាពល្បីតាមយូធូប ប្រជាប្រិយមិនសូវចាញ់ក្រុមតារាចម្រៀងល្បីនៅផលិតកម្មនានានោះមែនក្តីកញ្ញា ចាន់ ស្រីនាថ ហាក់ដូចមិនទាន់មានក្តីប្រាថ្នាចង់ស្វែងរកទ្រនំផលិតកម្មជ្រកកោនដែរទេ។ កញ្ញា ស្រីនាថ វ័យ ២៦ ឆ្នាំប្រាប់ភ្នំពេញ-ប៉ុស្តិ៍ថា៖ «ចង់ច្រៀងបែបនេះសិន មិនទាន់ចង់មានផលិតកម្មទេ ព្រោះគិតថាខ្លួនឯងមានសេរីភាព»៕
