ក្រុងកូឡុំបូ៖ បវរកញ្ញាស្ត្រីមេផ្ទះ (Mrs Sri Lanka) អ្នកស្រី Caroline Jurie ដែលបានដោះមកុដ ម្ចាស់ពានបវរកញ្ញាស្ដ្រីមេផ្ទះស្រីលង្កា ដោយសារតែជម្លោះលើឆាក ត្រូវបានប៉ូលិសចាប់ខ្លួន ក្រោយពីម្ចាស់ពានរង្វាន់ ត្រូវបានប្រគលល់មកុដ និងប្រកាសជ័យលាភីឡើងវិញ។
អ្នកស្រី ភូសពីកា ដេ ស៊ីវ៉ា ដែលត្រូវចូលពេទ្យក្រោយពីឧប្បត្ដិហេតុព្រឹត្ដិការណ៍ប្រកួតបវរកញ្ញាស្ដ្រីមេផ្ទះកាលពីថ្ងៃអាទិត្យ បានគ្រង «Mrs Sri Lanka» ជាថ្មីម្ដងទៀតនៅព្រឹត្ដិការណ៍តូចតាចជាងមុនកាលពីថ្ងៃអង្គារ។
ស្ថិតក្នុងទឹកមុខក្ដុកក្ដួល អ្នកស្រី ដេ ស៊ីលវ៉ា បានប្រាប់ក្រុមអ្នកសារព័ត៌មានកាលពីថ្ងៃអង្គារថា៖ «ខ្ញុំអនុគ្រោះដល់អ្នករាល់គ្នាដែលពាក់ព័ន្ធក្នុងព្រឹត្ដិការណ៍នេះ។ បើមានអ្នកគិតថា ពួកគេអាចបង្អាក់ខ្ញុំពីទង្វើបែបនេះ ពួកគេនឹងមិនទទួលជោគជ័យឡើយ។ ខ្ញុំជាស្ដ្រីដែកថែប»។
យ៉ាងណាមិញ អ្នកស្រីនិយាយថា អ្នកស្រីគ្រោងដាក់ពាក្យបណ្ដឹងផ្លូវច្បាប់ប្រឆាំងនឹងអ្នកវាយប្រហារលើរូបអ្នកស្រី ដោយផ្ដួលម្ចាស់ពាន Caroline Jurie។
អ្នកស្រី Caroline Jurie ត្រូវបង្ខំចិត្ដចាប់ដោះមកុដពីអ្នកស្រី ដេ ស៊ីលវ៉ា នៅលើឆាក ដោយបាននិយាយថា អ្នកស្រី ដេ ស៊ីលវ៉ា បានលែងលះដែលមិនស័ក្ដិសមក្នុងការគ្រងមកុដនេះឡើយ។
ដើម្បីមានសិទ្ធិគ្រងមកុដ បេក្ខភាពត្រូវជាស្ដ្រីរៀបការ។ អ្នកស្រី ដេ ស៊ីលវ៉ា លែងរួមរស់ជាមួយស្វាមី តែពួកគេនៅមានឈ្មោះជាប្ដីប្រពន្ធស្របច្បាប់។ ក្រុមអ្នករៀបចំព្រឹត្ដិការណ៍ប្រកួត បានឱ្យដឹងថា ពួកគេបានទាមទារសំណងពី Jurie ចំពោះការខូចខាតនៅលើឆាក និងបន្ទប់សម្លៀកបំពាក់ដោយមានការបែកបាក់កញ្ចក់ជាច្រើនផ្ទាំង។
ចាន់ឌីម៉ាល់ ចាយ៉ាស៊ីញ៉េ ក្រុមហ៊ុនដែលរៀបចំព្រឹត្ដិការណ៍ប្រកួត បាននិយាយថា៖ «យើងក៏កំពុងរៀបចំសាកសួរអំពីបញ្ហានេះផងដែរ»។
អ្នកស្រី Jurie ដែលនឹងក្លាយជាបេក្ខភាពប្រកួត «Mrs World» ក៏បានរងនូវការចោទប្រកាន់ពីសំណាក់ក្រុមអ្នករៀបចំកម្មវិធីពីបទមិនគោរពដ៏ព្រឹត្ដិការណ៍ប្រកួត។ វាត្រូវបានផ្សាយផ្ទាល់តាមបណ្ដាញសង្គមផងដែរ៕ AFP/HR