ភ្នំពេញៈ នាថ្មីៗនេះ បង្កការភ្ញាក់ផ្អើលដល់ក្រុមអ្នកលេង បណ្តាញសង្គមហ្វេសប៊ុក ពេលឃើញបណ្តុំរូបភាពជាច្រើនរបស់ចិត្តវិទូខ្មែរ ហឿ សេធុល ដែលបាននិពន្ធ និងបោះពុម្ពសៀវភៅចិត្តសាស្ត្រកុមារដំបូងឈ្មោះថា «បុត្រតូចសំណព្វចិត្ត» បង្ហោះនូវរូបថត និងសារបញ្ជាក់ថា ខ្លួនឯងអាចជាជនជាតិខ្មែរដំបូងដែលបានឈានជើងឡើងលើកំពូលភ្នំដ៏ខ្ពស់មួយនៅហ្វីលីពីន និងមានគោលបំណងចង់ឈានជើងឡើងភ្នំខ្ពស់ជាងគេនៅប្រទេសកម្ពុជាផងដែរ។
តាមរយៈសារ និងរូបភាព ដែលមានក្រុមអ្នកឡើងភ្នំជាជនបរទេស បានទៅជាមួយលោកផងដែរនោះ លោក ហឿ សេធុល បានសរសេរថា៖ «កម្ពស់ ២៩២៦ ម៉ែត្រ នៅលើភ្នំ Pulag ស្ថិតនៅក្នុងប្រទេសហ្វីលីពីន។ ហើយប្រហែលជាខ្ញុំជាជនកម្ពុជាទី ១ បានមកឡើងលើកំពូលភ្នំនេះ» រំពេចនោះ ក៏មានអ្នកចូលទៅចុច Likes និងចូល Comments យ៉ាងព្រោងព្រាតតែម្តង។
ដោយសារតែឃើញថាទើបតែបានបង្ហោះរូបភាពថ្មីៗ ទើបភ្នំពេញប៉ុស្តិ៍ បានទំនាក់ទំនងសាកសួរនាំពីដំណើរដើមទងនៃការឡើងភ្នំដ៏ខ្ពស់ជិត ៣ គីឡូម៉ែត្រ នោះផងដែរ តែមិនមែនហេតុការណ៍ដែលទើបកើតឡើងថ្មីៗនោះឡើយ។
លោក ហឿ សេធុល បានបង្ហើបប្រាប់ថា៖ «អូ!តាមពិតទៅរូបទាំងនោះ ខ្ញុំបានឡើងភ្នំតាំងពីខ្ញុំនៅរៀនប្រទេសហ្វីលីពីន កាលពីឆ្នាំ ២០១០ មកម្ល៉េះ! តែដោយសារតែមានការស្រឡាញ់លើវិស័យកីឡា បែបផ្សងព្រេងឡើងភ្នំនេះ ទើបខ្ញុំយករូបចាស់ មកផូស្តលេងៗទៅ ដែលជាពេលវេលាខ្ញុំនៅរៀននៅក្នុងប្រទេសនេះ ហើយមានភ្នំមួយទៀត ដែលមានកម្ពស់ខ្ពស់ជាងភ្នំ Pulag នេះទៅទៀត។ ជាការពិតទៅ ខ្ញុំចូលចិត្តនូវដំណើរកម្សាន្តបែបផ្សងព្រេងដូច្នេះ ហើយក៏មានបំណងចង់ឡើងភ្នំឱរ៉ាល់ ដែលជាភ្នំខ្ពស់ជាងគេ នៅក្នុងស្រុកខ្មែរយើងផងដែរ»។
គួរបញ្ជាក់ថា ចិត្តវិទូខ្មែរ ដែលបានបញ្ចប់ថ្នាក់បរិញ្ញាបត្រជាន់ខ្ពស់ផ្នែកចិត្តវិទ្យាមកពីហ្វីលីពីន លោកហឿ សេធុល បាននិពន្ធ និងបោះពុម្ពសៀវភៅចិត្តសាស្ត្រកុមារដំបូងជិត ៣០០០ ក្បាល ដែលស្តីពីការយល់ដឹងពីការរីកលូតលាស់ និងការគ្រប់គ្រងលើអាកប្បកិរិយារបស់កុមារ ដោយយកថវិកាទាំងអស់នេះទៅចូលរួមចំណែកដើម្បីធ្វើសកម្មភាពសប្បុរសធម៌នានានៅក្នុងសង្គម។
ម្ចាស់ស្នាដៃសៀវភៅកុមារ «ព្រះអង្គម្ចាស់តូច» ក៏បានបន្ថែមទៀតថា៖ «ខ្ញុំបានផ្តោតពន្យល់លម្អិតលើ ៣ ចំណុចសំខាន់ៗដូចជាការរីកលូតលាស់របស់កុមារនាពេលដំបូងមានអ្វីខ្លះតាមរយៈវិធីថែទាំ ការលេង ការប្រាស្រ័យទាក់ទងគ្នា ចំណង់ចំណូលចិត្ត ចំណាប់អារម្មណ៍ តាមរយៈការលើកទឹកចិត្តដោយប្រើវិធីលួងលោមបែបវិជ្ជមាន និងការគ្រប់គ្រងអាកប្បកិរិយា ពេលកុមារធ្វើទង្វើខុសឆ្គងឲ្យមានការផ្លាស់ប្តូរអាកប្បកិរិយាខ្លួនគេដោយវិធីលើកទឹកចិត្តបែបវិជ្ជមានជាងការប្រើវិធីក្តៅគឺសម្លុតកូន ឬគំរាមកូននោះ»៕