ក្រុងប៉េកាំង៖ ប្រព័ន្ធផ្សព្វផ្សាយរដ្ឋចិនបានរាយការណ៍កាលពីថ្ងៃអង្គារថា ចិនបានធ្វើការដកសត្វពង្រូលចេញជាផ្លូវការពីបញ្ជីឱសថបុរាណ ប៉ុន្មានថ្ងៃបន្ទាប់ពីមានការរឹតបន្តឹងលើកិច្ចការពារស្របច្បាប់ចំពោះសត្វជិតផុតពូជ។
ការសែត Health Times របស់រដ្ឋចិន បានរាយការណ៍ថា ឆ្នាំនេះសត្វពង្រូលត្រូវបានដកចេញជាផ្លូវការពីឱសថចិន Pharmacopoeia បូករួមទាំងគ្រឿងផ្សំឱសថផ្សេងៗ ដែលលាយជាមួយអាចម៌ប្រចៀវផងដែរ។
សត្វពង្រូល ដែលជាថនិកសត្វ ត្រូវបានជួញដូរច្រើនបំផុតក្នុងលោក និងត្រូវបានអ្នកវិទ្យាសាស្ត្រមួយចំនួនគិតថា អាចជាមូលហេតុចម្បងនៃការកើតឡើងនៃវីរុសកូរ៉ូណា នៅលើទីផ្សារក្នុងទីក្រុង វូហាន ប្រទេសចិន កាលពីឆ្នាំមុន។
សរីរាង្គខ្លះរបស់វាមានតម្លៃខ្ពស់នៅលើទីផ្សារងងឹត ដោយសារវាត្រូវបានគេប្រើជាទូទៅនៅក្នុងឱសថបុរាណចិន ទោះបីជាអ្នកវិទ្យាសាស្ត្រនិយាយថា ពួកវាមិនបានព្យាបាលរោគណាមួយក៏ដោយ។
អាជ្ញាធរព្រៃឈើរបស់ប្រទេសចិន កាលពីថ្ងៃសុក្រ បានផ្តល់កិច្ចការពារយ៉ាងពិសេសដល់សត្វពង្រូលក្នុងចំណោមសត្វជាច្រើនក្នុងប្រទេសដោយសារតែលក្ខណៈគំរាមកំហែងដ៏គួរឲ្យព្រួយបារម្ភ។
ការសែត Health Times បានឲ្យដឹងថា «ការរិចរិលនៃធនធានព្រៃ» បានធ្វើឲ្យខើចដល់ប្រភពឱសថបុរាណ បើទោះជាមូលហេតុជាក់លាក់ពី ការកាត់ពង្រូលចេញពីបញ្ជីឱសថ មិនទាន់ច្បាស់ក៏ដោយ។
ប៉ុន្មានខែចុងក្រោយនេះ ប្រទេសចិន បានហាមឃាត់ការលក់សត្វព្រៃសម្រាប់ម្ហូបអាហារ ដោយលើកឡើងពីហានិភ័យនៃជំងឺដែលអាចរាលដាលដល់មនុស្ស ប៉ុន្តែពាណិជ្ជកម្មនៅតែស្របច្បាប់សម្រាប់គោលបំណងផ្សេងៗទៀតរួមទាំងការស្រាវជ្រាវ និង ឱសថបុរាណ។
កាលពីថ្ងៃសៅរ៍ មូលនិធិសត្វព្រៃពិភពលោកសម្រាប់ធម្មជាតិ បានឲ្យដឹងថា ខ្លួនបានស្វាគមន៍យ៉ាងខ្លាំងចំពោះវិធានការរបស់ប្រទេសចិន ក្នុងការពង្រឹងកិច្ចការពារសត្វពង្រូលដោយហៅវាថា «ការបញ្ឈប់ដ៏មានសារសំខាន់» ពីជំនួញពង្រូលខុសច្បាប់៕ AFP/RS