ក្រុងប៉េកាំង៖ ជាង ១ សតវត្សរ៍ក្រោយពីនាវាទីតានិកជួបគ្រោះអាក្រក់ក្នុងប្រវត្តិសាស្ត្រ នាវាសង់ថ្មីនឹងរំលេចរូបរាងនៅឧទ្យានកម្សាន្ដចិន ជាទីដែលភ្ញៀវអាចចំណាយលុយស្នាក់នៅ និងលេងកម្សាន្តដោយមិនខ្វល់ពីគ្រោះលិចលង់នោះឡើយ។
អ្នកឧបត្ថម្ភគម្រោងដ៏សំខាន់មានបំណងផលិតនាវាកម្សាន្ដដ៏អសោចបំផុតក្នុងលោកឡើងវិញ ដែលភាពយន្ដត្រូវបានបង្កើតឡើងក្នុងឆ្នាំ ១៩៩៧ និងមានការគាំទ្រខ្លាំងនៅប្រទេសចិន ផងដែរ។
នាវាកម្សាន្ដប្រណីតគំរូដើម ជានាវាធំបំផុតកាលពីជំនាន់នោះ និងមិនអាចលេច ដែលអះអាងដោយម្ចាស់នាវា បានក្លាយជាប្រធានបទសំខាន់តាំងពីវាបានលេចទៅបាតសមុទ្រអាត្លង់ទិកក្នុងឆ្នាំ ១៩១២ ក្រោយពីបុកភ្នំទឹកកក ដែលបានឆក់យកជីវិតជាង ១ ៥០០ នាក់។
វិនិយោគិន ស៊ូ សាវជុន បាននិយាយថា លោកមានបំណងផ្ដល់ប្រាក់ឧបត្ថម្ភគម្រោងផលិតនាវាចម្លងប្រវែង ២៦០ ម៉ែត្រ ដើម្បីរំឭកពីការចងចាំរបស់នាវាទីតានិក។
លោក ស៊ូ និយាយថា៖ «ខ្ញុំសង្ឃឹមថា នាវាថ្មីនេះនឹងបន្ដស្ថិតនៅទីនេះពី ១០០ ទៅ ២០០ ឆ្នាំទៀត»។
វាត្រូវការពេល ៦ ឆ្នាំ យូរជាងការកសាងនាវាទីតានិកគំរូដើម បន្ថែមគ្រឿងដែក ២៣ ០០០ តោន កម្មករជាង ១០០ នាក់ និងលុយ ១៥៣,៥ លានដុល្លារ។ វាបង្កើតជាវត្ថុទាក់ទាញចម្បងសម្រាប់ឧទ្យានជាតិក្នុងខេត្ដស៊ីឈួន ចម្ងាយប្រមាណ ១ ពាន់គីឡូម៉ែត្រពីសមុទ្រ។
ឧទ្យានជាតិនេះក៏រំលេចនូវកំពង់ផែសោតថាមតុនចម្លង ដែលបានកើតហេតុការណ៍មហន្ដរាយក្នុងភាពយន្ដរបស់ផលិតករ James Cameron នៅឆ្នាំ ១៩៩៧ ជាទីដែលតួអង្គ ជេក សម្ដែងដោយលោក ឡេអូណាដូ ឌីកាប្រ៊ីយ៉ូ បានឡើងនាវាក្រោយឈ្នះរង្វាន់ដំណើរកម្សាន្ដ។
លោក ស៊ូ បន្ដថា ភ្ញៀវត្រូវចំណាយប្រាក់ ១៥០ ដុល្លារ ក្នុង ១ រាត្រីលើនាវាកម្សាន្ដជាមួយ «សេវាកម្មនាវាកម្សាន្ដប្រណីតលំដាប់ផ្កាយ ៥»។ ម៉ាស៊ីនចំហាយនឹងធ្វើឱ្យភ្ញៀវមានអារម្មណ៍ដូចជាស្ថិតនៅលើសមុទ្រពិតៗ។
លោកថា៖ «យើងនឹងអញ្ជើញតួអង្គ ជេក រ៉ូស និងលោក ចេមស៍ កាមេរ៉ុន មកសម្ពោធនាវានេះ»៕ AFP/HR