.jpg)
ទេសភាពប្រាសាទខ្មែរ នៅមជ្ឈមណ្ឌលថតរូប Pre Wedding ចិន។ រូបថត AFP
ក្រុងប៉េកាំង: គូស្នេហ៍ក្នុងទឹកមុខរីកដូចគ្រាប់ជីរ បានផ្លាស់ប្ដូរស្នាមថើបនៅចំពោះមុខកាមេរ៉ា ដោយកូនក្រមុំក្នុងឈុតរ៉ូបសំយេះស្មា ដៃកាន់ផ្កាមួយបាច់ រីឯកូនកំលោះ សេរ៉េឈុតអាវធំយ៉ាងហំហាន ឈរលើវាលស្មៅបៃតងអមដោយបុប្ផាពណ៌ផ្កាឈូក។
សកម្មភាពដូចពិធីមង្គលការដ៏មានសេចក្ដីសុខបំផុតនេះ តាមការពិតគ្រាន់តែផ្នែកមួយនៃឧស្សាហកម្មកំពុងរីកចម្រើនរបស់ចិនចំពោះការផ្ដិតយករូបថតមុនអាពាហ៍ពិពាហ៍ ខណៈគូស្នេហ៍វ័យក្មេងចំណាយពេល និងចាយលុយនាំគ្នាមកតម្រង់ជួរថតរូបនៅថ្ងៃពិសេសរបស់ខ្លួន។
ប៉ុន្ដែសម្រាប់អ្នកដែលមិនអាចលៃលកប្រាក់កាក់ធ្វើដំណើរទៅក្រៅប្រទេស ឬគោលដៅទេសចរណ៍សំខាន់ៗក្នុងប្រទេសដោយមានបំណងស្វែងរករូបភាពផ្ទៃក្រោយប្លែកៗ ក្រុមហ៊ុនជាច្រើន ដូចជា Love Story ក្នុងស្ទូឌីយោទីក្រុងរ៉ូម បាននាំយកទិដ្ឋភាពផ្ទៃក្រោយ ប្រពៃណី គ្រឿងតុបតែងខ្លួន និងរចនាប័ទ្មដទៃជុំវិញពិភពលោកមកកាន់អគារក្នុងទីក្រុងប៉េកាំងតែមួយ។
កូនក្រមុំ ហ្សាវ ធៀនយូ អាយុ ២៥ ឆ្នាំ ដែលមកថតរូបតាំងពីម៉ោង ៨ ព្រឹក បាននិយាយថា៖ «ការថតរូបនៅក្រៅស្ទូឌីយោធ្វើឲ្យមានការនឿយហត់ខ្លាំង ដោយត្រូវរើពីមួយកន្លែងទៅមួយកន្លែងទៀត។ មជ្ឈមណ្ឌលថតរូបអាពាហ៍ពិពាហ៍នេះស្ថិតក្នុងអគារ ហើយវាផ្ដល់នូវទស្សនីយភាពសព្វគ្រប់តាមតម្រូវការ»។
មជ្ឈមណ្ឌលថតរូបក៏មានទេសភាពទឹកជ្រោះសិប្បនិម្មិតផងដែរ។ រូបថត AFP
គូស្នេហ៍ជាច្រើននាំគ្នាបង្ហោះរូបជាមួយទិដ្ឋភាពផ្ទៃក្រោយប្លែកៗ ដូចជា ឧទ្យានត្រូពិក វាលផ្កា ទឹកធ្លាក់ ផ្ទៃមេឃ រួមទាំង ប្រាង្គប្រាសាទបុរាណខ្មែរផងដែរ។ ក្នុងសកម្មភាពផ្ដិតយករូបភាពដ៏ប្រុងប្រយ័ត្នបំផុត កូនក្រមុំក្នុងឈុតរ៉ូបពណ៌ស ចុះទឹកពាក់កណ្ដាលខ្លួន និងក្រេបស្រាទំពាំងបាយជូរមួយកែវ។
នាយកគ្រប់គ្រងទូទៅ ហ្សាវ រ៉ុងឆាង បាននិយាយថា៖ «ការថតរូបអាពាហ៍ពិពាហ៍របស់ពលរដ្ឋចិនក្លាយទៅជាជម្រើសអាទិភាព។ ពលរដ្ឋចិនពេលនេះមានបំណងចង់ថតរូបក្នុងបន្ទប់ និងលេងស្ទីលប្លែកៗ»។
ការចំណាយលើឧស្សាហកម្មអាពាហ៍ពិពាហ៍ក្នុងប្រទេស ចិន បាននឹងកំពុងហក់ឡើងយ៉ាងខ្លាំង ដោយក្រុមស្រាវជ្រាវ ASKCI បានទស្សន៍ទាយថា នៅដំណាច់ឆ្នាំ ២០១៩ នេះ ការចំណាយនឹងកើនដល់ប្រមាណ ៣២១ ពាន់លានដុល្លារអាមេរិក។
លោក ហ្សាវ និយាយថា គូស្នេហ៍ពី ៥០ ទៅ ៦០ គូ មកកាន់មជ្ឈមណ្ឌលថតរូបនេះរៀងរាល់ថ្ងៃដើម្បីផ្ដិតយករូបភាពដ៏ស្រស់បំផុត។ ក្រុមជំនួយការជាច្រើននាក់មានភារកិច្ចថតរូប និងរៀបចំឈុតឆាក សេរ៉េសេរ៉ង់សម្លៀកបំពាក់ និងបន្ថែមគ្រឿងតុបតែងខ្លួនដល់គូស្នេហ៍ឲ្យកាន់តែឥតខ្ចោះ។
កូនក្រមុំត្រកូល វូ អាយុ ២៦ ឆ្នាំ បាននិយាយថា៖ «ខ្ញុំចូលចិត្ដគ្រប់ស្ទីលនៅទីនេះដែលពួកគេបានរៀបចំឲ្យខ្ញុំ។ វាហាក់ដូចជានឿយហត់បន្ដិច តែខ្ញុំពេញចិត្ដ»៕ AFP/HR
