.jpg)
ក្បួនរថយន្ត និងម៉ូតូដង្ហែក្រុមចុងភៅជាប់ជយលាភីពីការប្រកួតចម្អិនម្ហូបលំដាប់អន្តរជាតិនៅប្រទេសថៃ។ រូបថត សហការី
សៀមរាប: ម៉ូតូប៉ូលិសបរនាំមុខបើកផ្លូវ បន្ដដោយរថយន្ដក្រុមវង់ភ្លេងឆៃយ៉ាំ ប្រគំចង្វាក់ប្រពៃណីពីរោះរន្ថាន់។ ក្បួនរថយន្ដ និងម៉ូតូជាច្រើនគ្រឿងដែលអ្នកខ្លះលើកទង់ជាតិ ខ្លះលើកបដាជយលាភី និងបង្អួតមេដាយយ៉ាងមានមោទនភាពក្រោមសំឡេងឧគ្ឃោសនស័ព្ទបន្ទរកងរំពងជាសញ្ញាអបអរសាទរក្រុមចុងភៅកម្ពុជាបានឈ្នះពានមាស និងមេដាយជាច្រើនគ្រឿងជូនជាតិមាតុភូមិ។
ក្រុមចុងភៅកម្ពុជា ២៦ នាក់ និងអ្នកហែហម ៦ នាក់ដែលដឹកនាំដោយប្រធានសមាគមចុងភៅកម្ពុជាបានឈ្នះពានរង្វាន់មាស ១ មេដាយមាស ៣ គ្រឿង ចំពោះការប្រកួតចម្អិនម្ហូបប្រភេទ the Best Asian Gourmet Challenge រួមជាមួយមេដាយប្រាក់ ៦ និងសំរឹទ្ធ ១៧ គ្រឿងក្នុងប្រភេទផ្សេងៗនៃព្រឹត្ដិការណ៍ Thailand Ultimate Chef Challenge 2019 ដែលរៀបចំឡើងពីថ្ងៃទី ២៧ ខែឧសភាដល់ថ្ងៃទី ១ ខែមិថុនាក្នុងប្រទេសថៃ។
លោក ឡុង ប៊ុនហោ ប្រធានសមាគមចុងភៅកម្ពុជា (CCA) បានឲ្យដឹងថា៖ «ប្រាកដណាស់ក្រុមចុងភៅចង់បានសញ្ញាបត្រ កិត្ដិនាម ចំណេះដឹងទូលំទូលាយ និងយល់ដឹងពីម្ហូបជាតិសាសន៍ដទៃក្នុងការប្រកួតអន្ដរជាតិនេះ។ ប៉ុន្ដែពួកគាត់ក៏ចង់នាំយកម្ហូបខ្មែរទៅបង្ហាញនៅក្រៅប្រទេសដើម្បីលើកមុខមាត់ប្រទេសជាតិផងដែរ»។
លោក ប៊ុនហោ ដែលជាម្ចាស់ភោជនីយដ្ឋានម្ហូបខ្មែរ អង្គារដី ផងនោះបានប្រាប់ ភ្នំពេញ ប៉ុស្ដិ៍ថា៖ «ពានរង្វាន់នេះពិតជាមានសារៈសំខាន់ណាស់ក្នុងវិស័យម្ហូបអាហាររបស់ប្រទេសកម្ពុជាក៏ដូចជាបុគ្គលដែលមានអាជីពជាចុងភៅ។ វិស័យម្ហូបអាហារខ្មែររឹតតែមានការទទួលស្គាល់ពីឆាកអន្ដរជាតិ ដោយសារយើងជ្រើសរើសយកមុខម្ហូបខ្មែរចូលរួមប្រកួតរៀងរាល់ឆ្នាំ»។
ជាប្រធានក្រុមក្នុងចំណោមបេក្ខភាព ៣ រូបដែលដណ្ដើមពានមាស ១ និងមេដាយមាស 3 លោក ឈន ប៊ុនឈូ បម្រើការនៅក្រុមហ៊ុនហ្គោលឌិន ធេមភលគ្រុប តែងតែមានការចូលរួមប្រកួតលើឆាកអន្ដរជាតិនានាដើម្បីលើកមុខមាត់ប្រទេសជាតិ។
ចុងភៅកម្ពុជា ២៦ នាក់ឈ្នះពានរង្វាន់មាស ១ មេដាយមាស ៣ ។ រូបថត សហការី
ចុងភៅដែលមានបទពិសោធការងារ ១១ ឆ្នាំរូបនេះបានឲ្យដឹងថា៖ «ជាមួយចិត្ដស្រឡាញ់ និងចង់លើកស្ទួយម្ហូបអាហារខ្មែរ ខ្ញុំក៏ដូចជាក្រុមរបស់ខ្ញុំផ្ទាល់មានការប្ដេជ្ញាខ្ពស់ ដោយសម្រេចចិត្ដថា ទោះបីជាជាប់ ឬធ្លាក់ក៏ត្រូវតែយកម្ហូបខ្មែរទៅកាន់ឆាកអន្ដរជាតិ ដើម្បីឲ្យគេបានស្គាល់ និងភ្លក្សរសជាតិផងដែរ»។
លោក ប៊ុនឈូ ដែលបានចូលរួមប្រកួតក្នុងព្រឹត្ដិការណ៍មុខម្ហូបនៅប្រទេសថៃចំនួន ៤ លើកមកហើយបានបន្ដថា៖ «គោលបំណងរបស់ខ្ញុំក្នុងការចូលរួមប្រកួតនោះគឺចង់ឲ្យអន្ដរជាតិទទួលស្គាល់ថា កម្ពុជាមានសមត្ថភាពក្នុងការអភិរក្ស អភិវឌ្ឍវិស័យម្ហូបអាហារឲ្យមានការរីកចម្រើនដូចប្រទេសនានាក្នុងតំបន់អាស៊ី និងសកលលោក»។
ស្ថិតក្រោមការវាយតម្លៃពីសំណាក់គណៈកម្មការមកពីថៃ តៃវ៉ាន់ ម៉ាឡេស៊ី ឥណ្ឌូនេស៊ី និងបណ្ដាប្រទេសដទៃទៀតពួកគេបានផ្ដល់ពិន្ទុទៅលើសោភណភាព រសជាតិ អនាម័យ និងពេលវេលា ជាពិសេសសាមគ្គីភាពក្នុងក្រុមទៅលើបេក្ខជនប្រកួតមកពី ១៤ ប្រទេសដែលមានអ្នកចូលរួមប្រមាណ ១៤០០ នាក់។
លោក ឡុង ប៊ុនហោ ដែលតែងតែផ្ដល់មតិយោបល់ គំនិត និងបច្ចេកទេស បានលើកឡើងថា៖ «ចុងភៅដែលចូលរួមប្រកួត សុទ្ធតែជាបុគ្គលិកតាមសណ្ឋាគារ និងភោជនីយដ្ឋាន ហើយអ្នកខ្លះមានហាងផ្ទាល់ខ្លួនទៀត។ គណៈកម្មការវាយតម្លៃមើលលើការងារជាក្រុមថា តើពួកគេមានសាមគ្គីភាព ឬក៏អត់ ហើយពេលប្រកួតកន្លែងប្រកួតមានអនាម័យ និងសណ្ដាប់ធ្នាប់ល្អ ឬក៏អត់?។ រសជាតិបានដល់កម្រិតដែលគណៈកម្មការអាចឲ្យពិន្ទុបានកម្រិតណា?»។
ក្រៅពីការចម្អិន ក្រុមចុងភៅត្រូវរ៉ាប់រងដឹកសម្ភាររាប់រយគីឡូក្រាម។ រូបថត សហការី
ចុងភៅមានបទពិសោធការងារជាង ១ ទសវត្សរ៍រូបនេះបាននិយាយថា៖ «ទោះបីជាពេលខ្លះ យើងមានការប៉ះទង្គិចនូវពាក្យសម្តីគ្នាខ្លះយ៉ាងណាក៏ដោយ ក៏ពួកយើងបានសម្របសម្រួលគ្នាដើម្បីរួមសម្រេចគោលដៅ និងក្ដីស្រមៃតែមួយ»។
ពីក្រោយសម្រស់ និងក្លិនឈ្ងុយប្រហើរនៃមុខម្ហូបលើចាន ជាទូទៅពេលចេញដំណើរទៅក្រៅ កីឡាករបាល់ទាត់មិនចាំបាច់វេចខ្ចប់បាល់ឡើងយន្ដហោះឡើយ។ កីឡាករប្រដាល់យ៉ាងច្រើនណាស់ ស្ពាយតែសម្ភារមួយបង្វេចជាការស្រេច។
ប៉ុន្ដែភាពងាយស្រួលទាំងអស់នេះមិនមែនសម្រាប់ក្រុមចុងភៅ ពេលចេញទៅប្រកួតក្នុងព្រឹត្ដិការណ៍ Thailand Ultimate Chef Challenge 2019 នោះឡើយ។
លោក ឡុង ប៊ុនហោ បានប្រាប់ថា៖ «ក្រុមចុងភៅយើងត្រូវដឹកជញ្ជូនសម្ភារប្រកួតច្រើនណាស់ រាប់ចាប់ពីខ្ទះគ្រប់ប្រភេទ កាំបិត ចានឆ្នាំង និងសម្ភារផ្ទះបាយចាំបាច់ដែលមានទម្ងន់រាប់រយគីឡូក្រាមឯណោះ។ នៅកន្លែងប្រកួត គេផ្ដល់ឲ្យតែបរិក្ខារធំៗមួយចំនួនដូចជា ទូក្លាស្សេសាច់ ម៉ាស៊ីនម៉ៃក្រូវេវ និងចង្ក្រានជាដើម»។
លោក ឈន ប៊ុនឈូ ប្រធានក្រុមក្នុងពេលប្រកួតបានបន្ថែមថា៖ «ពិតណាស់ យើងត្រូវការចំណាយថវិកាច្រើន ហើយអ្វីដែលកាន់តែលំបាកថែមទៀតនោះ គឺការធ្វើដំណើរ ស្នាក់នៅ និងហូបចុក ហើយពេលខ្លះមានការហាមឃាត់ពីសំណាក់តម្រួតថៃនៅឯព្រំដែនទៀតផង»។
ស្ថិតក្នុងចំណោមមុខម្ហូបប្រកួតទាំង ១០ រួមទាំងបង្អែម ១ មុខដែលកម្ពុជាទទួលបានជ័យជម្នះនោះដូចជា ញាំក្រូចថ្លុងបង្គាទន្លេ សាច់គោអាំងទឹកប្រហុក សម្លប្រហើរត្រីឆ្អើរ អាម៉ុកត្រី ការីសាច់មាន់ ឆាកង្កែបម្រេចខ្ចី ខប៉េងប៉ោះ គ្រំបំពងជ្រក់ស្វាយ បាយចំហុយជាមួយសណ្ដែកខ្មៅ (ស្រដៀងក្រឡាន) និងបង្អែមសង់ខ្យាល្ពៅ ដោយទទួលបាន ៩៥ ពិន្ទុនោះការស្វែងរកបន្លែ ត្រី សាច់សម្រាប់រៀបចំជាម្ហូបទាំង ១០ មុខពិតជាសំខាន់បំផុត។
លោក ប៊ុនហោ បានប្រាប់ថា៖ «ជាក់ស្ដែងមុខម្ហូបកង្កែបឆាម្រេចខ្ចី ក្រុមចុងភៅវេចខ្ចប់ម្រេចខ្ចីពីខ្មែរ រួចទៅរកដើរទិញកង្កែបនៅផ្សារថៃ។ ពេលពួកគាត់ទៅដល់ភ្លាម ពួកគាត់ចាប់ផ្ដើមដើរផ្សារ និងគិតថា តើប៉ុន្មានផ្សារទើបគាត់អាចរកបានអីវ៉ាន់ ១០ មុខហ្នឹង។ អត់មាន ១ ផ្សារអាចរកបាន ១០ មុខទេ។ កម្មវិធីប្រកួតនេះគេឲ្យពេលវេលា ៣ ម៉ោងបើធ្វើមិនទាន់ យើងនឹងត្រូវធ្លាក់ពីការប្រកួត។ ១ មុខម្ហូបមាន ៦ ចានគឺត្រូវតែដូចគ្នា ប៉ុនគ្នា និងរសជាតិតែមួយ»។
ប្រធានសមាគមចុងភៅកម្ពុជាដែលជួយដល់សមាជិកចុះឈ្មោះចូលរួមប្រកួត ព្រមទាំងរៀបចំកិច្ចប្រជុំ និងជួបជុំធ្វើម្ហូបសាកល្បងមុនពេលចេញដំណើរបានជួយថវិកាបន្តិចបន្តួច និងស្វែងរកអ្នកឧបត្ថម្ភដោយថវិកានៅសេសសល់តិចតួចជាការរ៉ាប់រងរបស់ក្រុមចុងភៅ។
លោក ឡុង ប៊ុនហោ បានប្រាប់ថាក្រៅពីប្រទេសថៃ ក្រុមចុងភៅកម្ពុជាបានទៅប្រទេសចិន វៀតណាម ឥណ្ឌា និងសិង្ហបុរី ព្រមទាំងបានធ្វើបទបង្ហាញពីមុខម្ហូបខ្មែរនៅតាមបណ្ដាប្រទេសមួយចំនួនទៀតដូចជា កូរ៉េខាងត្បូង ឥណ្ឌូនេស៊ី ម៉ាឡេស៊ី មីយ៉ាន់ម៉ា និងថៃជាដើម។
ជាមួយសមាជិកចុងភៅ ២៦៥ នាក់សមាគមចុងភៅកម្ពុជាមានបេសកកម្មកៀរគរចុងភៅជំនាញក្នុងបំណងជួយផ្សព្វផ្សាយមុខម្ហូបខ្មែរទាំងលើឆាកជាតិ និងអន្ដរជាតិព្រមទាំងជួយគាំទ្រដល់ចុងភៅជំនាន់ថ្មីតាមរយៈការបើកវគ្គបណ្ដុះបណ្ដាល និងផ្ដល់ឱកាសចូលរួមប្រកួតគ្រប់កម្រិតថ្នាក់៕
