The Phnom Penh Post Search

Search form




Logo of Phnom Penh Post newspaper Phnom Penh Post - ចូលរួម​ការ​ប្រគំ​តន្ត្រីស្នាដៃ​និពន្ធ​ថ្មី​ នៅ​សាលា​តិចណូ​ចុង​ខែ​ធ្នូនេះ​




ចូលរួម​ការ​ប្រគំ​តន្ត្រីស្នាដៃ​និពន្ធ​ថ្មី​ នៅ​សាលា​តិចណូ​ចុង​ខែ​ធ្នូនេះ​

Content image - Phnom Penh Post
សិល្បករ​ សិល្បការិនី​ចូលរួមក្នុង​សន្និសីទ​សារព័ត៌មាន​ស្ដីពីការ​រៀបចំ​ការ​ប្រគំតន្ត្រី​។ រូប សហការី

ចូលរួម​ការ​ប្រគំ​តន្ត្រីស្នាដៃ​និពន្ធ​ថ្មី​ នៅ​សាលា​តិចណូ​ចុង​ខែ​ធ្នូនេះ​

ភ្នំពេញៈ ជាមួយ​គោល​បំណង​ចម្បង​ជំរុញ​លើក​ស្ទួយ​ និង​ផ្ដល់​ឱកាស​ដល់​យុវវ័យ​ខ្មែរជំនាន់​ក្រោយ​ឲ្យ​ចេះ​បង្កើត​ស្នាដៃ​​និពន្ធ​បទ​ចម្រៀង​ទំនុក​ភ្លេង​ដោយ​ខ្លួនឯង​ ​និង​ចូល​រួម​លុបបំបាត់​ការចម្លង​ពី​បរទេស​នោះ ព្រឹត្តិ​ការណ៍​ប្រគំ​តន្ត្រី​​ដ៏​ធំ​លើក​ដំបូងឈ្មោះ​ថា​ The Mic Original Song Concert រៀបចំ​ដោយ​ Anussa Event Planner នឹង​បង្ហាញ​ខ្លួន​នៅ​វិទ្យា​ស្ថាន​បច្ចេក​វិទ្យា​នៃ​កម្ពុជា (​តិចណូ) នៅ​ថ្ងៃទី ២៧ ខែ​ធ្នូ​ឆ្នាំ ២០១៥​ ខាងមុខ​នេះ។

លោក​ សេង ពិសិដ្ឋ នាយក​ប្រតិបត្ដិនៃ​ក្រុម​ហ៊ុន​ Anussa Event Planner​ បាន​ថ្លែង​ឲ្យ​ដឹង​ក្នុង​សន្និសីទ​កាសែត​កាលពីម្សិល​មិញ​ថា​៖ «The Mic Original Song Concert ធ្វើ​ឡើង​ដើម្បី​ផ្ដល់​ឱកាស និង​លើក​ស្ទួយ​ឲ្យ​យុវជនខ្មែរ​ ដែល​មាន​ទេព​កោសល្យ និង​ក្ដី​ស្រមៃ​​ខ្ពស់អាច​ចាប់​ផ្ដើម​កសាង​នូវ​ភាពផ្ទាល់​ខ្លួន​ដើម្បី​រក​នូវភាព​ល្បី​ល្បាញ​ និង​ការ​គាំទ្រ​ពី​មហាជន»។​

Content image - Phnom Penh Post
សកម្មភាព​ត្រៀម​សម្រាប់​ព្រឹត្តិការណ៍​ប្រគំតន្ត្រី​។ រូប សហការី

ការ​ប្រគំ​តន្ត្រីនេះ​ក៏​មាន​​តារា​ចម្រៀង និង​​តន្ត្រី​ករ​ល្បីៗនៅ​ប្រទេស​កម្ពុជា​ចូល​រួម​ផង​ដែរ​ដូច​ជា តារាចម្រៀង​លោក​ ហេង ពិទូ លោក​ ហ្សូណូ តន្ត្រី​ករ និង​តារា​ចម្រៀង​ លោក សូ ស្រណោះ កញ្ញា នីកគី លោក កាន់ ពេជ្រ លោក សុខ រក្សា និង​កញ្ញា ពេជ្រ ចិន្តា។

នា​ឱកាស​ប្រគំ​តន្ត្រី​នោះផង​ដែរ​ អ្នក​ចូលរួម​ក៏​នឹងបាន​ទស្សនា​ការ​បញ្ចេញ​ទេពកោសល្យ​​សិល្បៈ​របស់បេក្ខ​ជន​បេក្ខនារី​ដែល​ឆ្លង​កាត់​ការ​សម្រិត​សម្រាំងចំនួន ១៥​ រូប​ ដែល​សុទ្ធ​​សឹង​​តែ​​បាន​និពន្ធ​បទចម្រៀង​ និង​បទ​ភ្លេង​ដោយ​ខ្លួនឯង​។​

លោក សេង ពិសិដ្ឋ ​ក៏​បាន បន្ត​​ដែរ​ថា៖ «ព្រឹត្តិ​ការណ៍ប្រគំ​តន្ត្រី​ដ៏​ធំ​នេះ​ នឹង​បើក​ឱកាសឲ្យ​អ្នក​និពន្ធ និង​ម្ចាស់​បទចម្រៀង​ Original ខ្មែ​រ​​ទាំង​អស់​ ចូលរួមប្រកួត​​បង្ហាញ​​ស្នាដៃ​ចម្រៀង​របស់​ខ្លួន​ ដើម្បី​ទទួល​បាន​​នូវ​ប្រាក់​រង្វាន់​ និង​អាច​ឈាន​ជើង​ចូល​វិស័យសិល្បៈ​ចម្រៀង​ប្រកប​ដោយ​ភាព​ថ្លៃថ្នូរ​ និង​កិត្តិយស​សម្រាប់​ខ្លួន​ឯង​»។

ចំពោះ​ម្ចាស់​ជយ​លាភី​នៃ​ការ​ប្រកួត​​ស្នាដៃ​និពន្ធ​ចម្រៀង​ក្នុងព្រឹត្តិ​ការណ៍​ប្រគំតន្ត្រីនេះ​ សម្រាប់​​ចំណាត់​ថ្នាក់​លេខ ១ នឹង​​ទទួល​បាន​ប្រាក់​​រង្វាន់​ចំនួន ​១០០០ ដុល្លារ លេខ ២ ចំនួន ​៧៥០ ដុល្លារ​ និង​លេខ ៣ ចំនួន ​៥០០ ដុល្លារ​៕

អត្ថបទគួរចាប់អារម្មណ៍