ក្រុងមែលប៊ន៖ ចៀមព្រៃ ១ ក្បាល ដែលត្រូវបានប្រទះឃើញត្រាច់ចរក្នុងព្រៃនៃប្រទេសអូស្ដ្រាលី ត្រូវបានចាប់កោររោមដ៏ក្រាស់ទម្ងន់ ៣៥ គីឡូក្រាម ក្រោយពីស្ថិតនៅឯកោ ៥ ឆ្នាំ។
ដោយពិបាកនឹងរោមខ្លួនដ៏ក្រាស់ និងធ្ងន់ ដោយជាប់ទាំងភក់ជាច្រើនឆ្នាំ បាររ៉េក ត្រូវបានប្រទះឃើញក្នុងព្រៃនៃរដ្ឋវិកតូរៀ និងត្រូវបាននាំមកមជ្ឈមណ្ឌលសង្គ្រោះសត្វភាគខាងជើងក្រុងមែលប៊ន។
ផាម អាហ៊ើន ស្ថាបនិក Edgar''s Mission Farm Sanctuary បានថ្លែងថា៖ «ខ្ញុំមិនជឿថា វាជាសត្វចៀមដែលអាចរស់នៅក្រោមស្ថានភាពទ្រទម្ងន់រោមដ៏ក្រាស់នេះឡើយ»។
អាហ៊ើន បានប៉ាន់ប្រមាណថា រោមដ៏គួរឱ្យខ្លាចរបស់វាត្រូវបានទុកដុះតាមធម្មជាតិដោយគ្មាននរណាកាត់កោរអស់រយៈពេល ៥ ឆ្នាំ។
លោកនិយាយថា៖ «ខ្ញុំគិតថា គាត់ [ចៀមឈ្មោល] គ្រាន់តែជាចៀមតូចដ៏ច្រឡឺម ១ ក្បាល ដែលរត់លេងដោយមិនត្រឡប់ចូលមកក្នុងកសិដ្ឋានវិញប៉ុណ្ណោះ»។
ចៀមដែលអត់កោររោមពិបាកទាំងការដើរក្រោមទម្ងន់ជាច្រើនគីឡូក្រាម ហើយពេលអត់កោររោមយ៉ាងតិចឱ្យបានម្ដងក្នុង ១ ឆ្នាំ ចៀមភាគច្រើនអាចមិនរស់នៅក្នុងព្រៃយូរនោះទេ ជាពិសេសទឹកដីអូស្ដ្រាលីដែលស្ងួត និងក្ដៅខ្លាំងនារដូវប្រាំង។
ទោះបីជា បាររ៉េក មានរោមដ៏ក្រាស់ឃ្មឹកយ៉ាងណាក៏ដោយ ក៏វានៅមិនទាន់ផ្ដួលកំណត់ត្រាពិភពលោកចាស់របស់អតីតចៀមឈ្មោះ គ្រីស ដែលឡើងទំព័រមុខកាសែត ពេលវាត្រូវបានកោររោមទម្ងន់រហូតដល់ ៤១ គីឡូក្រាម ក្នុងឆ្នាំ ២០១៥។
ការប្រែកាយឱ្យ បាររ៉េក ពីចៀមចម្លែកមកជាចៀមគួរឱ្យស្រឡាញ់ ក៏បានផ្ដល់ពន្លឺជីវិតថ្មី និងទទួលបានភាពល្បីល្បាញជាមួយអ្នកទស្សនាលើ TikTok រាប់លានដង៕ AFP/HR