.jpg)
កញ្ញា ពីយ៉ា គ្រងឈុតលឿង កញ្ញា ឈិញលីន និងដៃគូសម្ដែង ឈុនលី។ សហការី
ភ្នំពេញៈ តារាសម្តែងស្រីវ័យក្មេងកុមារី ជី ឈិញលីន ដែលជាចៅស្រីបង្កើតតារាកំប្លែងជើងចាស់នាយ កុយ កំពុងទទួលបានប្រជាប្រិយភាពខ្លាំងក្នុងវិស័យសម្តែងពីទេពកោសល្យក្នុងខ្សែភាពយន្តធំរបស់ផលិតកម្មរស្មីហង្សមាស «ផ្កាថ្ម» បានបង្ហាញវត្តមានក្នុងឈុតពណ៌ក្រហមឆើត និងវត្តមានដៃគូសម្ដែង ម៉ក់ ឈុនលី នៅថ្ងៃសម្ពោធហាងសម្លៀកបំពាក់ Color ជប៉ុន កាលពីថ្ងៃទី ១៩ ខែសីហាកន្លងមក។
តារាស្រីវ័យកុមារមានសមត្ថភាពក្នុងការសម្តែងខ្ពស់នេះបានចូលប្រឡូកក្នុងវិស័យសិល្បៈតាំងពីមានវ័យទើបតែ ៨ ឆ្នាំមកម្ល៉េះ ដែលចាប់ផ្តើមដំបូងដោយការថតផ្សព្វផ្សាយពាណិជ្ជកម្ម ថតរឿងខ្លីៗ និងចាប់ផ្តើមថតរឿងភាគលើកដំបូងឲ្យផលិតកម្មរស្មីហង្សមាស កាលពីឆ្នាំ ២០១៨ ក្នុងរឿង «ផ្កាថ្ម» ជាតួអង្គកាចឆ្នាសឆ្នើមផងដែរ។
កុមារី ជី ឈិញលីន បានថ្លែងមកភ្នំពេញ ប៉ុស្តិ៍ ពីការនិយមម៉ូដសម្លៀកបំពាក់នៅហាង Color របស់ជប៉ុននោះថា៖ «ទោះបីជា Color ទើបតែដាក់សម្ពោធលើកដំបូងពិតមែន ប៉ុន្តែខ្ញុំមើលទៅដូចជាមានកេរ្ដិ៍ឈ្មោះលើទីផ្សារ វាមានម៉ូដស្អាតៗ មានទាំងខោអាវ និងខោអាវស្រី អាចឲ្យខ្ញុំពាក់ចូលក្នុងកម្មវិធីផ្សេងៗបាន»។
កុមារីជី ឈិញលីន បានបន្តពីការចូលចិត្តសម្លៀកបំពាក់ក្នុងហាង Color ទៀតថា៖ «សម្រាប់សម្លៀកបំពាក់ដែលខ្ញុំចូលចិត្តក្នុង Color គឺខ្ញុំចូលជារ៉ូបបែបសំយេះដៃនៅស្មា ហើយជាពិសេសវាមានតម្លៃមិនថ្លៃដូចជាហាងប្រ៊េនផ្សេងៗ គឺមានតម្លៃចាប់ពី ៣ ដុល្លារ ដល់ ១៥ ដុល្លារប៉ុណ្ណោះ ដែលយើងគ្រប់គ្នាអាចមានលទ្ធភាពក្នុង ការប្រើសម្លៀកបំពាក់ល្អៗទាំងនេះ»។
តារាសម្តែងជំនាន់ក្រោយដែលតែមានវ័យ ១៤ ឆ្នាំ និងសិក្សាទើបតែថ្នាក់ទី ៨ រូបនេះមិនត្រឹមតែអាចមានសមត្ថភាពក្នុងការសម្តែងខ្ពស់រហូតទទួលបានប្រជាប្រិយភាពពីអ្នកគាំទ្របាននោះទេ ដោយនាងបានបង្ហើបថា ចង់ក្លាយទៅជាតារាចម្រៀងនៅពេលដែលមានឱកាស និងចង់ក្លាយទៅជាពិធីការិនីថែមទៀតផង។
ក្រោយពីបានបញ្ចប់ខ្សែភាពយន្តរឿង «ផ្កាថ្ម» តារាសម្តែងស្រីវ័យក្មេងរូបនេះក៏បានចូលរួមសម្តែងរឿងភាគជាច្រើនបន្តបន្ទាប់ដូចជារឿង «រវាងយើង» ជាដើម។ នៅបច្ចុប្បន្នកុមារីជាចៅស្រីបង្កើតតារាកំប្លែងនាយ កុយ កំពុងតែថតរឿងថ្មីចំនួន ២ ដែរ មានរឿង «ដើម្បីកូន និងសព្វសិទ្ធ»។
ទោះបីជាតារាសម្តែងស្រីវ័យក្មេងរូបនេះទទួលបានការគាំទ្រក្នុងសមត្ថ-ភាពនៃការសម្តែង និងមានការមមាញឹកក្នុងវិស័យសិល្បៈយ៉ាងណាក៏ដោយ ក៏នាងនៅគិតគូរពីការរៀនសូត្រសំខាន់ដូចគ្នា ដោយកុមារី ឈិញលីន បានបញ្ជាក់ថា មិនទាន់ទទួលកុនថ្មីទៀតនោះទេ នៅពេលបញ្ចប់រឿង «ដើម្បីកូន និងសព្វសិទ្ធ» ព្រោះចង់ទុកពេលវេលាសម្រាប់ការសិក្សារៀនសូត្រខ្លះ ដោយសារឆ្នាំក្រោយចូលថ្នាក់ទី ៩ ជាឆ្នាំប្រឡងឌីប្លូម៕
