ភ្នំពេញៈ ដោយសារខ្លាចចំហាយនៃការកត់សម្គាល់ពីមហាជនរវាងខ្លួន និងតារាចម្រៀងប្រុសមាឌដាំងលោក នួន សុធារ័ក្ស ចំពោះភាពស្និទ្ធស្នាល ដែលមានកម្រិតលើសពីមិត្តរួមអាជីពសិល្បៈនោះ តារាចម្រៀងស្រីរូបសម្ផស្សកាន់តែស្រស់ស្អាត ជ្រកទ្រនំ We Production កញ្ញា ចំរើន សុភ័ក្ត្រ ក៏បង្ហាញមុខគូដណ្តឹង បន្សាបមន្ទិលសង្ស័យ នាពេលថ្មីៗនេះ។
នេះបើតាមសារដ៏ខ្លីកំប៉ិតឡិត តែមានន័យបញ្ជាក់ការពិតពីកញ្ញា ចំរើន សុភ័ក្ត្រ បេក្ខជនប្រឡងដល់វគ្គផ្តាច់ព្រ័ត្រនៃកម្មវិធី The Voice Cambodia នារដូវកាលទី ១ បង្ហើរសារអមរូបថតបណ្តើរគូស្នេហ៍លើនាវាកម្សាន្តលើផ្ទៃសមុទ្រនៅតំបន់កោះរ៉ុង ក្នុងខេត្តព្រះសីហនុថ្មីៗនេះថា៖ «ក្តីសុខ» នោះ។
គួរបញ្ជាក់ថា ចំរើន សុភ័ក្ត្រ បានក្លាយជាតារាចម្រៀងសម័យក្រោយពីប្រឡងកម្មវិធី The Voice Cambodia រដូវកាលទី ១ ដែលអភិវឌ្ឍខ្លួនពីតារាចម្រៀងប្រពៃណីត្រូវបានគេទម្លាយឲ្យដឹងថា បានភ្ជាប់ពាក្យនឹងគូស្នេហ៍ជាបុរសអាណិកជនខ្មែរអូស្ត្រាលីតាំងពីមុនពេលនាងបានឡើងគេហដ្ឋាន និងសម្ពោធហាងសាឡនឈ្មោះ «ចំរើន សុភ័ក្ត្រ សាឡាន»- មក ដោយឃើញមានក្រុមគ្រួសារបងប្អូនមកចូលរួមយ៉ាងកុះករ ជាពិសេសវត្តមានគូដណ្តឹងនាងទៀតផង។
គេនៅពុំទាន់ទទួលបានការបកស្រាយបញ្ជាក់ច្បាស់ពីពេលកំណត់ចូលរោងជ័យរបស់តារាចម្រៀងស្រីដែលល្បីខ្លាំងតាមរយៈសំនៀងបទ «ម៉ែ» នៅឡើយនោះទេ ខណៈភ្នំពេញប៉ុស្តិ៍បានទាក់ទងតាមប្រព័ន្ធទូរស័ព្ទកញ្ញា ចំរើន សុភ័ក្ត្រ តេចូល តែគ្មានអ្នកលើកទទួល។ ខណៈនាងគ្រាន់តែបានតបសារវិញនៅតាម Messenger ប្រាប់ភ្នំពេញប៉ុស្តិ៍យ៉ាងខ្លីបញ្ជាក់ពីសម្ព័ន្ធភាពរវាងខ្លួន និងបុរសក្នុងរូបស្លៀកឈុតពណ៌លឿងនៅលើនាវាកម្សាន្តនោះថា៖ «គាត់ជាគូដណ្តឹង»។
បើតាមព័ត៌មានបែកធ្លាយពីសង្គមនៃក្រុមអ្នកសិល្បៈនោះបានឲ្យដឹងថា កញ្ញា ចំរើន សុភ័ក្ត្រ ចង់ពន្យារពេលរៀបការ ព្រោះតែនាងចង់ពង្រឹងអាជីពចម្រៀងឲ្យបានរឹងមាំជាងនេះសិន តែត្រូវបានគូដណ្តឹងរបស់នាងមិនព្រមនោះឡើយគឺលោកចង់រៀបការឲ្យបានឆាប់ៗ ហើយក៏ធ្លាប់បានបង្ហើបដែរថា អាចដឹកដៃគ្នា ចូលរោងការចុងឆ្នាំ ២០១៩ ឬដើមឆ្នាំ ២០២០ នេះតែម្តង។
ចំពោះភាពមន្ទិលពីមហាជនរងសម្ព័ន្ធភាពលើសពីមិត្តក្នុងអាជីពនៃសិល្បៈរវាងកញ្ញា ចំរើន សុភ័ក្ត្រ និងតារាចម្រៀងប្រុសមាឌធំដាំង សំឡេងធ្ងន់ ដែលជាតារាចម្រៀងប្រុសជ្រកទ្រនំភ្លេងរីខត គឺលោក នួន សុធារ័ក្ស ក៏ធ្លាប់បានបញ្ជាក់ប្រាប់ឲ្យដឹងថា សម្ព័ន្ធភាពរវាងលោក និងកញ្ញា ចំរើន សុភ័ក្ត្រ គឺមិនមានអ្វីលើស ឬហួសពីមិត្តភក្តិឡើយ ហើយពួកគេថែមទាំងជាមិត្តជិតសិ្នទ្ធនឹងគ្នាយូរយារណាស់មកហើយដែរ៕