ភ្នំពេញៈ បង្កការភ្ញាក់ផ្អើលយ៉ាងខ្លាំងពីមហាជនខណៈក្រោយពីវិលត្រឡប់មកពីសម្តែងនៅអាមេរិកវិញនោះ ស្រាប់តែតារាចម្រៀងស្រីបច្ចុប្បន្ន កំពុងតែជ្រកក្រោមទ្រនំ We Production ដែលជាបុត្រសម្ព័ន្ធនៃផលិតកម្មហង្សមាស កញ្ញា ចំរើន សុភ័ក្រ បង្ហើរសារចម្លែកហាក់មានភាពរារែកនៅក្នុងចិត្តពីការបន្តអាជីពជាតារាចម្រៀងរបស់ខ្លួនឬយ៉ាងណានោះ។
តារាចម្រៀងស្រី ដែលជាបេក្ខជនប្រឡងបានឈានដល់វគ្គផ្តាច់ព្រ័ត្រនៃកម្មវិធី The Voice Cambodia នារដូវកាលទី ១ ហើយមានការទទួលស្គាល់ និងគាំទ្រសំឡេងដ៏ពីរោះខ្លាំងតាមរយៈបទចម្រៀងមានចំណងជើងថា «ម៉ែ» នោះបានសរសេរសារមួយឃ្លា បង្ហោះតាមហ្វេសប៊ុកកាលពីថ្មីៗនេះថា៖ «បន្តឬមិនបន្ត? ខំប្រឹងយ៉ាងណា៎ ក៏ទៅមុខមិនចង់រួច តើខ្ញុំគួរតែបន្តឬក៏ឈប់ត្រឹមនេះ?» ដែលជាសារធ្វើឲ្យមហាជនងឿងឆ្ងល់ហើយគិតសង្ស័យថា ទំនងជានាងមានបញ្ហានៅក្នុងសង្គមសិល្បៈនៃទ្រនំកំពុងតែជ្រកកោននោះផងដែរ ក្រោយវិលពីកើបប្រាក់ដុំនៅអាមេរិក ៣ នាក់បងប្អូននោះ។
ភ្លាមៗនោះក៏មានប្រិយមិត្តក្រុមអ្នកគាំទ្រចូលទៅ Comment ដើម្បីលើកទឹកចិត្តដោយបានសរសេរថា៖ «ស៊ូៗណាបងស្រី!ពួកខ្ញុំនៅផ្តល់កម្លាំងចិត្តឲ្យបងស្រីជានិច្ច! ត្រូវតែបន្តទៅមុខទៀត My Idol» ហើយក៏មានអ្នកសរសេរបែបខឹងជំនួសតារាស្រី ដែលខ្លួនគាំទ្រផងដែរ គឺហាក់ដូចជាបានយល់ន័យ និងសេចក្តីសាររបស់កញ្ញា ចំរើន សុភ័ក្រ ថា៖ «យើងមានសមត្ថភាព តែបែរជាគេមើលរំលងទៅវិញ»។
នៅពេលសាកសួរផ្ទាល់ជាមួយតារាចម្រៀងស្រីជ្រកក្រោមទ្រនំ We Production ជាបុត្រសម្ព័ន្ធផលិតកម្មហង្សមាស កញ្ញា ចំរើន សុភ័ក្រ បានចេញដំណើរទៅកើបប្រាក់ដុល្លារដុំ នៅឯទឹកដីសហរដ្ឋអាមេរិកជាលើកទី ៤ នាឱកាសចំពេលរដូវចូលឆ្នាំខ្មែរឆ្នាំ ២០១៨ កន្លងមកនេះ រយៈពេល ២ ខែ ជាមួយបងស្រី និងប្អូនប្រុសនាង ដែលសុទ្ធតែជាអ្នកសិល្បៈដែរនោះ បានបង្ហើបប្រាប់ភ្នំពេញប៉ុស្តិ៍ថា៖ «អត់មានបញ្ហាអ្វីទេបង!តាមពិតទៅ នាងខ្ញុំគ្រាន់តែសរសេរលេងសើចជាមួយនឹងមិត្តភក្តិតែប៉ុណ្ណោះ ហើយក៏សុំទោសផងដែរ ខណៈសារនាងខ្ញុំសរសេរលេងនេះបង្កការគិតសង្ស័យ ដល់បងប្អូនមហាជន!»។
តារាចម្រៀងស្រីកញ្ញា ចំរើន សុភ័ក្រ ដែលផ្ដើមអាជីពចេញពីចម្រៀងផ្នែកបុរាណវិវត្តខ្លួនមក ជាតារាចម្រៀងសម័យតាមរយៈការប្រឡងនៃកម្មវិធី The Voice Cambodia រដូវកាលទី ១ កាលឆ្នាំ ២០១៦ នោះ។ នៅក្នុងដំណើរជីវិតលើវិថីសិល្បៈ ដែលមិនបានរើសអើងទីផ្សារការងារសិល្បៈ ដោយសូម្បីតែអតីតកាលធ្លាប់ដើរដេកច្រៀងលើឆាក ក្រាលកន្ទេលឯទីជនបទ ក៏នៅតែរក្សាដដែល ជាតារាចម្រៀងស្រីល្បីខ្លាំងទៅលើវិស័យចម្រៀងបែបសម័យ ដែលបានបំពេនូវអារម្មណ៍ប្រិយមិត្តតាមរយៈបទមានចំណងជើងថា «ម៉ែ» នោះ៕