ភ្នំពេញ៖ ក្រោយពីចប់ភារកិច្ចបេសកកម្មជាតារាចម្រៀងទូតសុច្ឆន្ទៈនៃមហោស្រពសិល្បៈដើម្បីសន្តិភាពប្រចាំឆ្នាំ ២០១៩ របស់អង្គការសិល្បៈខ្មែរអមតៈ នៅខែវិច្ឆិកា ភ្លាម តារាចម្រៀងស្រី ដែលវិវឌ្ឍខ្លួនពីសិល្បៈបុរាណមកសម័យ ក្រោយពីប្រឡង The Voice Cambodia រដូវកាលទី ១ កញ្ញា ចំរើន សុភ័ក្រ នឹងបន្តចូលកម្មវិធីសង្គមមួយទៀត នៅក្រៅប្រទេសជាមួយនឹងកំពូលតារាចម្រៀងប្រុសរួមទ្រនំ គឺលោក ខេមរៈ សិរីមន្ត នៅប្រទេស បារាំង។
នេះជាឱកាសដំបូង ដែលឈានជើងជាន់នៅលើទឹកដីប្រទេស បារាំង សម្រាប់កញ្ញា ចំរើន សុភ័ក្រ តារាខណៈកម្មវិធីប្រគំតន្រ្តីសប្បុរសធម៌រៃអង្គាសប្រាក់ដើម្បីយកមកជួយកុមារកំព្រានៅកម្ពុជា មួយនោះដែរមានតែតារាចម្រៀងប្រុសស្រី ២ ដួង នៃផលិតកម្មហង្សមាសតែប៉ុណ្ណោះ គឺកញ្ញា ចំរើន សុភ័ក្រ និងលោក ខេរមៈ សិរីមន្ត ដែលប្រព្រឹត្តទៅនៅចុងខែ ធ្នូ ឆ្នាំ ២០១៩ នេះ។
តារាចម្រៀងស្រី កញ្ញា ចំរើន សុភ័ក្រ ដែលកំពុងតែស្រូបប្រជាប្រិយភាពខ្លាំង នៅលើវិស័យសិល្បៈចម្រៀងជ្រកទ្រនំផលិតកម្ម WeProduction ជាបុត្រសម្ព័ន្ធផលិតកម្មធំហង្សមាស បញ្ជាក់ប្រាប់ពីថ្ងៃត្រូវចូលរួមថា៖ «កម្មវិធីនេះបើតាមដឹងនោះ គឺមានវត្តមានអ្នកសិល្បៈតែរូបនាងខ្ញុំ និងបងប្រុស ខេមរៈ សិរីមន្ត ទេ ដែលជាការអញ្ជើញពីអង្គការមួយមានគោលដៅសម្រាប់ជួយរកមូលនិធិជួយដល់កុមារកំព្រានៅស្រុកខ្មែរ។
កម្មវិធីនឹងប្រព្រឹត្តទៅដល់ខែធ្នូឯណោះ ដោយមានរយៈពេលចំនួន ២០ ថ្ងៃ ហើយនាងខ្ញុំនឹងចេញដំណើរនៅថ្ងៃទី ១២ ខែ ធ្នូ និងវិលត្រឡប់មកវិញនៅថ្ងៃទី ៣០ ខែ ធ្នូ ឆ្នាំ ២០១៩»។
កញ្ញា ចំរើន សុភ័ក្រ ដែលត្រូវបានអង្គការសិល្បៈខ្មែរអមតៈជ្រើសធ្វើជាទូតសុច្ឆន្ទៈនៃមហោស្រពសិល្បៈដើម្បីសន្តិភាពឆ្នាំ ២០១៩ ខាងមុខនោះ បន្តពីអារម្មណ៍ក្នុងការចូលរួមការងារសង្គមធម៌នៅក្រៅប្រទេសនេះថា៖ «សម្រាប់វត្តមានពិសេស នៃអ្នកសិល្បៈមានរូបនាងខ្ញុំ និងលោក ខេមរៈ សិរីមន្ត នេះគឺខ្ញុំពិតជាសប្បាយចិត្ត ពេលឮថានោះគឺជាកិច្ចការមួយមានគោលដៅជួយទៅដល់កុមារកំព្រានៅកម្ពុជាតាមរយៈម្ចាស់ស្ពនស័រជាអង្គការមួយនៅបារាំង។
សម្រាប់នាងខ្ញុំ ការងារបែបនេះ គឺពេញចិត្តនឹងចូលរួម ព្រោះក្នុងនាមជាអ្នកសិល្បៈ បើមិនមានលទ្ធភាពជួយជាថវិកានោះ គឺអាចយកកម្លាំងកាយ និងជំនាញសិល្បៈជួយជំនួសបាន គឺជាសកម្មភាពខ្លួនពេញចិត្តដូចជាកាលពេលចេញដំណើរទៅកាន់ប្រទេស អូស្រ្តាលី ថ្មីៗកន្លងមកជាដើម»៕