ភ្នំពេញៈ តារាចម្រៀងប្រុសមាឌល្អិត សំឡេងក្រអួនមានទឹកដមស្រូបបានប្រជាប្រិយភាពខ្លាំងនៅលើទ្រនំផលិតកម្មសាន់ដេ លោក ឆាយ វីរៈយុទ្ធ ត្រូវបានមហាជនក៏លាន់មាត់សរសើរពីភាពប៉ិនប្រសប់ និងទេពកោសល្យឧត្តមភរិយារបស់លោកដែលតែងតែឆ្លៀតនិពន្ធទំនុកច្រៀងឲ្យប្តី រឿយៗ ហើយកាន់តែសម្បូរការគាំទ្រខ្លាំងឡើងៗថែមទៀត។
ថ្មីៗនេះភរិយារបស់កំពូលតារាចម្រៀងប្រុសប្រចាំផលិតកម្មសាន់ដេ ឆាយ វីរៈយុទ្ធ ក៏បាននិពន្ធទាំងទំនុកច្រៀង និង Melody សម្រាប់បទថ្មីមានចំណងជើងថា៖ «នឹកអូនស្ទើរដាច់ខ្យល់» ចេញផ្សាយជា Audio Official ដែលបង្ហាញឈ្មោះច្បាស់ថា សែ ចាន់ឌី ជាអ្នកនិពន្ធទំនុកច្រៀង និង Melody តាមគេហទំព័ររបស់ផលិតកម្មនោះក៏ទទួលបានការកោតសរសើរពីប្រិយមិត្តតាមបណ្តាញសង្គមមួយរំពេចតែម្តង។
កំពូលតារាចម្រៀងប្រុសលោក ឆាយ វីរៈយុទ្ធ ក៏បានបង្ហើបប្រាប់អំពីអារម្មណ៍សប្បាយចិត្តចំពោះការយកចិត្តទុកដាក់របស់ភរិយាដែលកើតពីសេចក្តីស្រឡាញ់ចូលចិត្តនឹងវិស័យសិល្បៈនិពន្ធទំនុកច្រៀង បើទោះបីជាខ្លួនមានតួនាទីភរិយាផង និងមមាញឹកនឹងរបររកស៊ីជាថៅកែហាងលក់អង្គរដែលមានយីហោថា «ស្តេចអង្ករ» នោះមែនក្តី តែនៅតែឆ្លៀតពេលមកនិពន្ធទំនុកច្រៀងឲ្យស្វាមីបានជារឿយៗ។
លោក ឆាយ វីរៈយុទ្ធ ក៏បង្ហើបពីអត្ថន័យនៃបទចម្រៀងថ្មីដែលមានភរិយាជាអ្នកនិពន្ធទាំងទំនុកច្រៀង និងនិពន្ធ Melody នោះថា៖ «បទនេះ គាត់ [ប្រពន្ធ ឆាយ វីរៈយុទ្ធ] ចង់បង្ហាញពីមនោសញ្ចេតនាស្នេហ៍ជ្រាលជ្រៅរបស់យុវវ័យនាសម័យបច្ចុប្បន្នក្នុងរឿងស្នេហា»។
តារាចម្រៀងប្រុសមាឌល្អិត សំឡេងក្រអួនមានទឹកដមដែលបានក្លាយជាតំណាងទូតសុច្ឆន្ទៈរថយន្តម៉ាកឆេរ៉ូឡេត ២ ឆ្នាំជាប់គ្នារូបនេះក៏បានរំឭកឲ្យដឹងពីការនិពន្ធរបស់ភរិយាខ្លួនតាំងពីមុនពេលចាប់ដៃគ្នាជាគូស្វាមីភរិយាម្ល៉េះ ដោយសារភរិយាមានចំណូលចិត្តខាងតែងនិពន្ធទំនុកច្រៀងនេះថា៖ «ជាការពិតទៅនោះគាត់បាននិពន្ធទំនុកច្រៀងច្រើនសម្រាប់ខ្ញុំតាំងពីពេលពួកយើងជាគូស្នេហ៍នឹងគ្នាម្ល៉េះ ហើយសម្រាប់បទចម្រៀងក្រោយនេះវាមានលក្ខណពិសេសជាងគេបន្តិចត្រង់ គាត់ជាអ្នកនិពន្ធទំនុកច្រៀងផង និងនិពន្ធ Melody ផង»។
គួររំឭកថាក្រោយពីបានក្រាបផ្ទឹមចូលរោងជ័យមង្គលការតាមគន្លងប្រពៃណីខ្មែរនឹងកូនក្រមុំជាកូនស្រីថៅកែរោងម៉ាស៊ីនកិនស្រូវខេត្តកំពង់ចាម និងបានធ្វើជាថៅកែលក់អង្ករធំមួយមានយីហោថា «ស្តេចអង្ករ» ដែលប្រើដើមទុន ១ សែនដុល្លារ ខណៈមង្គលការរៀបចំកាលពីថ្ងៃអាទិត្យទី ២១ ខែឧសភា ឆ្នាំ ២០១៧ មានលក្ខណៈឱឡារិកបំផុត៕