.jpg)
លោក រិទ្ធី ឧត្តមស៊ីដារ៉ា ស្វាមីរបស់អ្នកនាង ឆ័យលី ដាឡែន។ វុទ្ធី
ភ្នំពេញ: ព្រមនឹងការងារសិល្បៈនៅតែសស្រាក់ធ្វើ មិនថាយប់ថ្ងៃ តារាស្រីជាប់ងារ សិចស៊ីយេៗ អ្នកនាង ឆ័យលី ដាឡែន ដែលផ្សំជីវិតនិងស្វាមីវ័យក្មេងជាង តែងទន្ទេញចង់បានកូនឆាប់ៗ តែយ៉ាងណាក្រោយសារទន្ទេញដែលមិនដែលបានបង្ហាញដំណឹងល្អនេះ ក៏ស្រាប់តែថ្មីៗនេះអ្នកនាងត្រូវបានផ្សព្វផ្សាយថា បំណងនេះ គូស្នេហ៍ស្វាមីមានវ័យក្មេងជាង ក៏បានសម្រេចស្ងាត់ៗនៅស្រុកកំណើតខាងប្តី។
ពីការផ្សព្វផ្សាយ ដែលទម្លាយពីលទ្ធផលសម្រេចបំណងស្វែងរកតំណក់ឈាមស្នងត្រកូលរបស់ អ្នកនាង ឆ័យលី ដាឡែន និងស្វាមី នេះ ក៏មានការបង្ហាញអះអាងថា «ប្រភពច្បាស់ការមួយទម្លាយឲ្យដឹងថា នាងបានសម្រាលកូនរួចហើយកាលពីជាង ២ ខែមុន ដោយដំណឹងនេះ នាងបានព្យាយាមលាក់ការមិនទម្លាយឲ្យមហាជនបានដឹងឡើយ»។
តារាចម្រៀងសិចស៊ី និងសម្តែងងារសិចស៊ីយេៗ ហើយក៏ធ្លាប់ត្រូវព្រនង់ពីក្រសួងជាអាណាព្យាបាលលើផ្នែកវប្បធម៌ ដោយសារការស្លៀកពាក់សិចស៊ីស្ទើរអាក្រាតកាយលើឆាកសម្ដែងនៅទឹកដីអាមេរិកនោះ អ្នកនាង ឆ័យលី ដាឡែន ក៏ត្រូវបានគេបង្ហាញរូបថត គេងបង្ហាញស្នាមញញឹមពព្រាយជាប់នឹងរូបថតកូនក្មេង មុខស្អាតទ្រលុកទ្រលន់។
ភ្ជាប់នឹងរូបថតនោះក៏មានការរៀបរាប់ថា៖ «ការសម្រាលកូនរបស់ ឆ័យលី ដាឡែន មិនបានធ្វើនៅមន្ទីរពេទ្យនៅទីក្រុងភ្នំពេញឡើយ គឺនាងបានទៅសម្រាលនៅឯគ្លីនិកឯកជនមួយក្នុងខេត្តកំពង់ឆ្នាំង ដែលជាស្រុកកំណើតស្វាមី។ នាងបានដាក់ឈ្មោះឲ្យកូនប្រុសថា តារា ឆៃយ៉ានុត។ បច្ចុប្បន្នកូននេះ ទុកឲ្យម្ដាយក្មេករបស់នាងនៅឯខេត្តកំពង់ឆ្នាំង ជាអ្នកមើលថែ ហើយជាញឹកញាប់នាង និងស្វាមីតែងតែឡើងចុះពីភ្នំពេញ ទៅមើលកូន»។
បញ្ជាក់ពីព័ត៌មាននៅស្ងាត់ៗសម្រាលបាន កូនប្រុសដ៏សទ្រលុកទ្រលន់់នោះ នៅរសៀលថ្ងៃទី ១៦ ខែមករា ម្សិលមិញ ភ្នំពេញ ប៉ុស្តិ៍ក៏បានព្យាយាមសុំការបកស្រាយជុំវិញការផ្សព្វផ្សាយព័ត៌មាន ពីតារាសម្ដែង និងចម្រៀង ឆ័យលី ដាឡែន សំងំប្រសូត កូនប្រុសនៅស្រុកកំណើតប្តីកាលពី ២ ខែមុន ហើយទុកកូនឲ្យឪពុកម្តាយក្មេកមើលថែនោះ មិនទទួលបានការបកស្រាយ ឬក៏ការបដិសេធច្រានចោលព័ត៌មានខាងលើថាយ៉ាងណានោះទេ។ ខណៈអ្នកនាង ឆ័យលី ដាឡែន ក៏ទទួលទូរស័ព្ទដែល ភ្នំពេញ ប៉ុស្តិ៍ទាក់ទងទៅដោយប្រាប់ថា «ចាំកន្លះម៉ោងទៀតទើបខ្ញុំទំនេរអាចនិយាយបានបង»។
លុះដល់វេលាសន្យាខលទៅកន្លះម៉ោង ទំនាក់ទំនងទៅម្តងទៀត នាងបែរជាមិនទទួលទូរស័ព្ទនិយាយថា «យ៉ាងណាទេ» បែរជាចុចផ្តាច់ រួចក៏ផ្ញើសារត្រឡប់មកវិញដោយពាក្យគួរសមថា «ខ្ញុំសូមទោស ខ្ញុំមិនអាចនិយាយបានទេ ពេលនេះ»។
ប៉ុន្តែដោយឡែកពីមជ្ឈដ្ឋានខាងក្រៅបានព្រលយថា «នាងអាចនឹងទម្លាយដំណឹងមានកូននៅថ្ងៃខួបកំណើតរបស់នាង នាថ្ងៃទី ១២ ខែ កុម្ភៈ ឆ្នាំ ២០១៨ ខាងមុខនេះតែម្ដង» ដោយក្នុងពិធីខួបកំណើតនោះ តាមប្រភពប្រាប់ថា នាងគ្រោងនឹងអញ្ជើញមិត្តអ្នកសិល្បៈច្រើននាក់»។
ជាមួយការទម្លាយលិខិតអញ្ជើញចូលរួមពិធីខួបកំណើតនាងនោះ តារាស្រីដែលពោលចង់បានកូនជារឿយៗនោះ ក៏ត្រូវបានមិត្តរួមអាជីពព្រលយពីរូបនាងថា៖ «នាងច្បាស់ជាបង្ហាញមុខកូននាងនៅក្នុងពិធីដែលគ្រោងធ្វើនៅឯភោជនីយដ្ឋានម្ដុំសង្កាត់បឹងត្របែកនោះហើយ»៕
