ភ្នំពេញ៖ ទើបតែពញ្ញាក់អារម្មណ៍មហាជនរឿងវិលត្រឡប់ទៅកាន់សង្វៀនអាជីពដំបូងជាតារាចម្រៀងមុននេះសោះ ស្រាប់តែតារាសម្តែងស្រីសាច់សខ្ចី ទ្រលុកទ្រលន់ អ្នកនាង ឆ័យលី ដាឡែន មកបែកធ្លាយរូបភាពបង្ហាញភាពស្និទ្ធស្នាលខ្លាំងជាមួយបុរសក្មេង បង្កើតភាពមន្ទិលសង្ស័យថា អ្នកនាងកំពុងតែបង្កាត់ភ្លើងស្នេហ៍ថ្មីមួយរំពេចតែម្តង។
បណ្តុំរូបភាពកៀកកើយជាមួយប្រុសសង្ហាវ័យក្មេងម្នាក់ ដែលមើលទៅពិបាកសន្និដ្ឋានថាជាមិត្តនោះ ក៏ត្រូវបានមហាជន និងតារារួមអាជីពលាន់មាត់ថា៖ «អីយ៉ា! អ្នកមេម៉ាយ ឆ័យលី ដាឡែន បង្ហាញរូបឱបរឹតគ្នាស្អិតល្មួតជាងស្ករតាំងម៉ែទៅទៀត ពិតជាមិនធម្មតាមែន! ព្រោះគាត់ទើបតែបែកប្ដីបានប៉ុន្មានខែសោះ ឥឡូវស្រាប់តែរកបានសង្សារថ្មី ជាប្រុសក្មេងរូបសង្ហាមិនចាញ់ប្ដីចាស់នោះឡើយ»។
លើសពីនេះក៏មានការចូលទៅ Comment បន្ថែមថា៖ «បានប្រុសក្មេងនៅជិតនិយាយពីបិទមាត់មិនជិតហ្មងបងខ្ញុំ! ច្រណែនណាស់។ តើបុរសក្មេងនេះជាគូស្នេហ៍ថ្មីមែនទេ?»។
យ៉ាងណាសម្ព័ន្ធភាពស្និទ្ធស្នាលទៅនឹងប្រុសក្មេងពីសំណាក់តារាចម្រៀង និងសម្តែងស្រីវ័យជិតចូល ៤០ ឆ្នាំ មេម៉ាយកូន ១ តែសម្រស់នៅតែខ្ញង់អ្នកនាង ឆ័យលី ដាឡែន មិនបានបកស្រាយច្បាស់លាស់ ដោយប្រព័ន្ធទូរស័ព្ទអ្នកនាងដែលធ្លាប់ទំនាក់ទំនងពីមុននោះ មិនអាចទាក់ទងបានទេ។
តែគេក៏ឃើញសារតបពីតារាចម្រៀង ឆ័យលី ដាឡែន វិញដែរ ចំពោះការចម្អន់លេងអំពីប្រិយមិត្តបណ្តាញសង្គមវិញថា៖ «ងាយបានប្រុសក្មេងនៅជិតអ្ហី! កុំច្រណែនអី!»។
ក្នុងមួយរយៈចុងក្រោយនេះ មជ្ឈដ្ឋានមហាជនតែងតែសង្កេតឃើញថា តារាចម្រៀង និងសម្តែងស្រី ធ្លាប់ល្បីដោយសារការបញ្ចេញភាពសិចស៊ីខ្លាំង អ្នកនាង ឆ័យលី ដាឡែន ឧស្សាហ៍បង្ហោះសារពីស្ថានភាពខ្លួនក្នុងការខំតស៊ូរស់នៅដោយខ្លួនឯង ជាពិសេសការវិលត្រឡប់រកឆ្នាំងបាយចាស់ គឺជាតារាចម្រៀងក្រោយពីលែងលះស្វាមីថ្មីថ្មោងមកនោះ។
តារាចម្រៀងស្រីយេយេ ឆ័យលី ដាឡែន និងស្វាមីបានបញ្ចប់ផ្លូវស្នេហាជាប្តីប្រពន្ធ ក្រោមហេតុផលរស់នៅមិនចុះសម្រុងគ្នា ចំណែកឯកូនប្រុសពួកគេវិញ គឺមានសិទ្ធិមើលថែរួមគ្នា តែត្រូវសា្វមីនាងលោក រិទ្ធី ឧត្តមស៊ីដារ៉ា គឺជាអ្នកទទួលបន្ទុកមើល។
តារាសម្តែងស្រីពេញនិយមជាតួម៉ែ មានសាច់ទ្រលុកទ្រលន់ ឆ័យលី ដាឡែន បង្ហោះសារតាមហ្វេសប៊ុកថា៖ «កូនហ្នឹងចូលចិត្ត ប្លង់ក្នុងបន្ទប់ទឹក! ទោះឈឺ ក៏មកធ្វើការដែលព្រោះតែ..! អរគុណ The drum pub ផ្តល់ការងារឲ្យអូនមានមកលេងអូនផងចា៎ នៅលើដងផ្លូវឯ.ឧត្តម ជា សុផារ៉ា ទល់មុខស្នងការនគរបាល»៕