.jpg)
ឆ្កែញី និងកូនឆ្មាមួយហ្វូង ត្រូវបានប្រទះឃើញឱបក្រសោបគ្នាតាមដងផ្លូវ។ រូបថត AFP
ក្រុងអូតាវ៉ា៖ ឆ្កែអនាថា ១ ក្បាល ត្រូវបានប្រទះនៅតាមដងវិថីដ៏ត្រជាក់នៅប្រទេស កាណាដា ខណៈវាកំពុងតែឱបក្រសោបផ្ដល់ភាពកក់ក្ដៅដល់កូនឆ្មាតូចៗនារាត្រីដ៏រងារណ្ដំថ្គាម។
ឆ្កែញីអាយុប្រមាណ ២ ឆ្នាំ ឈ្មោះ Serenity ត្រូវបានប្រទះឃើញនៅវិថីស្ថិតនៅក្បែរតំបន់ឆាហាម ក្នុងទីក្រុងអនតារីយោ កាលពីសប្ដាហ៍មុន។
នារាត្រីដែលសីតុណ្ហភាពធ្លាក់ដល់ ៣ អង្សាសេក្រោមសូន្យ ឆ្កែញីនេះបានឱបក្រសោបកូនឆ្មាខ្មៅតូចៗ។
អ្នកនាំពាក្យអង្គការសង្គ្រោះសត្វព្រៃ និងសត្វចិញ្ចឹម ម៉ាយរៀម អាមស្ត្រង បានឲ្យដឹងថា អ្នកដំណើរឆ្លងកាត់មានការភ្ញាក់ផ្អើលយ៉ាងខ្លាំងដោយឃើញឆ្កែញីនេះឱបកូនឆ្មាដល់ទៅ ៥ ក្បាល។
ក្រោយការសង្គ្រោះ ពួកវានៅតែបង្ហាញកាយវិការស្និទ្ធស្នាល។ រូបថត AFP
ពួកវាត្រូវបាននាំយកមកកាន់កន្លែងថែទាំ ដោយរឿងរ៉ាវដ៏ចម្លែកដែលឆ្កែញីមើលថែកូនឆ្មាដូចម្ដាយនេះ បានធ្វើឲ្យមនុស្សមកពីជុំវិញពិភពលោកដាក់ពាក្យសុំវាយកទៅចិញ្ចឹម។
អ្នកនាំពាក្យអង្គការសង្គ្រោះសត្វព្រៃ និងសត្វចិញ្ចឹម ម៉ាយរៀម បានឲ្យដឹងថា៖ «កូនឆ្មាទាំងនោះមុខជាមិនរស់ទេ ប្រសិនបើមិនមានមេឆ្កែនៅផ្ដល់ភាពកក់ក្ដៅដល់ពួកវា»។
ទោះបីជាក្រុមអ្នកជំនាញសត្វនៅមិនច្បាស់ថា តើហេតុអ្វីបានជាឆ្កែញីមកនែបនិត្យកូនឆ្មាយ៉ាងដូច្នេះ ប៉ុន្តែ ម៉ារៀម បានបញ្ជាក់ថា ក្រោយពីយកពួកវាមកថែទាំនៅមណ្ឌល ឆ្កែញី និងកូនឆ្មា នៅតែបង្ហាញកាយវិការស្រឡាញ់គ្នាដូចគ្រួសារតែមួយ។
ក្រោយពីបំប៉នចំណី និងព្យាបាលជំងឺរួចរាល់ សត្វទាំងនេះនឹងត្រូវបានប្រគល់ទៅម្ចាស់ជាអ្នកស្រឡាញ់សត្វយកទៅចិញ្ចឹមបន្ត៕ AFP
