ភ្នំពេញៈ ខណៈដែលកូនស្រីទី ៣ ឈ្មោះ ជា សុជាតិនារី ជាបុត្រីដំបូងនៃចំណងស្នេហ៍របស់លោក ជា វិបុល និងអ្នកនាង គង់ សុជាតិ បានចាប់កំណើតកាលពីខែមករា ឆ្នាំ ២០១៧ មក ហើយបច្ចុប្បន្នមានវ័យជាងមួយខួបទៅហើយនោះ ពិធីការិនីទូរទស្សន៍ជើងចាស់អ្នកនាង គង់ សុជាតិ ក៏ស្រាប់តែលេចវត្តមាននៅក្នុងកម្មវិធីរបស់ទូរទស្សន៍ហង្សមាសគឺនៅរួមទ្រនំជាមួយនឹងស្វាមីវ័យក្មេង គួរឲ្យភ្ញាក់ផ្អើលពីមហាជនតែម្តង នៅចំថ្ងៃរដូវចូលឆ្នាំថ្មីប្រពៃណីខ្មែរឆ្នាំ ២០១៨។
រំពេចនោះ ក៏មានការលើកឡើងពីមជ្ឈដ្ឋានខាងក្រៅ ពីអ្នកតាមដាននូវជីវិតឯកជន ក៏ដូចជាដំណើរវិវឌ្ឍន៍នៃសង្គមសិល្បៈរបស់ក្រុមសិល្បករ-ការិនី នានានោះថា៖ «ទំនងជាអ្នកនាង គង់ សុជាតិ មកតាមខ្សែស្វាមីក្មេងលោក ជា វិបុល ហើយមើលទៅព្រោះថា លោកគឺជាពិធីករល្បីប្រចាំផលិតកម្មហង្សមាស និងមានមុខស្ទើរតែគ្រប់កម្មវិធីទៀតផង ដូច្នេះទើបឆ្នាំថ្មីនេះគាត់សម្រេចចិត្តមកធ្វើការជាពិធីការិនីនៅហង្សមាសតែម្តង និងមានពេលជួបជុំគ្នាច្រើនទៀតផង»។
ថ្លែងប្រាប់មុនពេលបង្ហាញវត្តមាននៅក្នុងកម្មវិធីផ្សាយផ្ទាល់នៅហង្សមាស សម្រាប់ផ្សព្វផ្សាយនូវផលិតផលមួយ ដែលជាការចាប់ផ្តើមការងារនៅកន្លែងថ្មី ក្នុងអាជីពចាស់ជាពិធីការិនី អ្នកនាង គង់ សុជាតិ បញ្ជាក់ប្រាប់នូវដំណឹងដែលប្តូរការងារទៅទូរទស្សន៍ហង្សមាស ក្រោយផុតកុងត្រានៅកន្លែងចាស់ឲ្យភ្នំពេញប៉ុស្តិ៍ដឹងថា៖ «ចាស!នាងខ្ញុំពិតជាបាន មកបម្រើការងារនៅប៉ុស្តិ៍ទូរទស្សន៍ហង្សមាស មែន គឺនៅចំថ្ងៃរដូវកាលចូលឆ្នាំថ្មីនេះតែម្តង ក្រោយពីនាងខ្ញុំបានចប់កុងត្រាជាមួយនឹងទូរទស្សន៍ MyTV ហើយ!»។
ពិធីការិនីដែលមានវ័យច្រើនជាងស្វាមី តែសម្រស់មិនបានចាស់ទៅតាមវ័យ គង់ សុជាតិ និងជាម្ចាស់សាលាបណ្តុះបណ្តាលវិជ្ជាជីវៈកែសម្ផស្សបានបោះទុនរាប់ម៉ឺនដុល្លារ ហើយនៅតែក្តាប់ឱកាសយ៉ាងណែនក្នុងការរកចំណូលពីការងារសិល្បៈនេះដដែលទាំងប្តីប្រពន្ធនោះ ក៏បានបញ្ជាក់ពីការលើកឡើងរបស់មជ្ឈដ្ឋានមហាជនខាងលើដែរថា៖ «ចំពោះរឿងមកចាប់ការងារជាពិធីការិនីទូរទស្សន៍ហង្សមាសនេះ នាងខ្ញុំស្ម័គ្រចិត្តមកតាមការងារ ដែលខ្លួនឯងស្រឡាញ់ខ្លាំងជាមួយនឹងអាជីពបានប្រកបជាមុខរបរតាំងពីយូរណាស់មកហើយ គឺពុំមានការជួយជ្រោមជ្រែងពីស្វាមីនោះទេ»។
ទោះជាយ៉ាងណា នាឱកាសថ្ងៃបុណ្យចូលឆ្នាំប្រពៃណីខ្មែរឆ្នាំ ២០១៨ កន្លងផុតទៅថ្មីៗនេះ គេក៏បានឃើញវត្តមានរបស់ប្តីប្រពន្ធ ដែលមានអាជីពជាពិធីករ និងពិធីការិនី ១ គូនេះ បង្ហាញវត្តមានជាដៃគូនៃកម្មវិធីប្រគំតន្ត្រីតាមខេត្តរួចមកហើយផងដែរ តែសម្រាប់កម្មវិធីផ្សេងៗទៀតនៅប៉ុស្តិ៍ទូរទស្សន៍ហង្សមាសនោះនៅមិនទាន់ដឹងច្បាស់នៅឡើយដែរទេថា តើប្តីប្រពន្ធគូនេះ នឹងត្រូវធ្វើការជាដៃគូសន្ទនាទៀតឬយ៉ាងណា? អ្នកនាង គង់ សុជាតិ បន្ថែមទៀតឲ្យដឹងដែរថា៖ «សម្រាប់រឿងនេះ នាងខ្ញុំក៏មិនដឹងច្បាស់ដែរ គឺអាស្រ័យលើការសម្រេចរបស់ម្ចាស់ប៉ុស្តិ៍ទូរទស្សន៍។ តែនៅរៀងរាល់ល្ងាចថ្ងៃអាទិត្យ នាងខ្ញុំ ត្រូវកាន់កម្មវិធីមួយជាមួយនឹងលោក រ៉ាស៊ី ក្នុងកម្មវិធីផ្សាយផ្ទាល់ត្រន្តីបាតាន់ ហើយអាចជាដៃគូជាមួយគាត់ [ស្វាមី] ម្តងម្កាលដែរខណៈពេលលោក រ៉ាស៊ី រវល់នោះ»៕