.jpg)
អ្នកនាង សុខ សោម៉ាវត្តី និងលោក លី វ៉ាហេដ នៅកសិដ្ឋានចិញ្ចឹមឃ្មុំក្នុងខេត្តត្បូងឃ្មុំ។ រូបថត ហ្វេសប៊ុក
ភ្នំពេញ៖ បង្កការភ្ញាក់ផ្អើលដល់មហាជន ខណៈនាពេលថ្មីៗនេះ តារាសម្តែងស្រីមេម៉ាយកូន ១ ចាយសម្រស់អ្នកនាង សុខ សោម៉ាវត្តី បង្ហោះសារដ៏ចម្លែកបែបរអ៊ូររទាំរឿងក្លាយខ្លួនជាថៅកែស្រីនៅក្នុងអាជីវកម្មក្រៅរបរសិល្បៈថា «ពេលក្លាយជាម្ចាស់ក្រុមហ៊ុន ទើបដឹងថា ខ្លួនឯងមានការងារច្រើន ដែលត្រូវធ្វើហត់តែសប្បាយចិត្ត»។
ខណៈទើបតែបានបកស្រាយរឿងរយាលពេលមិនសូវបានលេចមុខនៅក្នុងការថតកុន ដោយគ្រាន់តែថតកុនម្តងម្កាល ដើម្បីកុំឲ្យប្រិយមិត្តភ្លេចមុខនោះ ឥឡូវលេចឮរឿងក្លាយជាថៅកែស្រីលើអាជីវកម្មក្រៅសិល្បៈគួរឲ្យកោតសរសើរ។
តារាស្រី សុខ សោម៉ាវត្តី ដែលកំពុងតែល្បីថា មានសម្ព័ន្ធភាពបេះដូងនឹងកំលោះសង្ហាកីឡាបាល់ទាត់លោក លី វ៉ាហេដ នោះ បង្ហើបប្រាប់ភ្នំពេញប៉ុស្តិ៍ថា៖ «គិតមកដល់ត្រឹមឆ្នាំ ២០២០ នេះ សម្រាប់ការបើកមុខរបររកស៊ីនោះ នាងខ្ញុំមាន ២ អាជីវកម្ម។ អាជីវកម្មទី ១ បានដំណើរការយូរហើយ គឺលក់ផលិតផលរក្សាសម្រស់។ ខណៈអាជីវកម្មទី ២ ទើបតែចាប់ផ្តើមដំណើរការក្នុងឆ្នាំនេះ ផ្តោតលើការលក់ផលិតអាហារសុខភាព គឺទឹកឃ្មុំ និងទឹកត្រចៀកកាំ»។
អាជីវកម្មដល់ទៅ ២ នោះ ក៏កើតជាចម្ងល់លើកឡើងថាតើនេះគឺជាការបើករបររកស៊ីតែម្នាក់ឯង ឬមានចំណែកភាគហ៊ុនផ្សេងៗ ដូចជាលោក លី វ៉ាហេដ ដែលមហាជនម៉ៃគិតថា ជាគូស្នេហ៍នឹង សុខ សោម៉ាវត្តី។
តារាស្រីកូនមួយសម្រស់ក្រមុំមិនដូររូបនេះបញ្ជាក់ថា៖ «អូ! តាមពិតទៅការបើករបរទាំង ២ នោះ នាងខ្ញុំមិនអាចធ្វើតែឯងបានទេ គឺមានការចូលហ៊ុនពីអ្នកផ្សេងៗគ្នាផងដែរ។ សម្រាប់អាជីវកម្មទី ១ នាងខ្ញុំមានការចូលភាគហ៊ុនជាមួយបងប្រុស និងប្អូនស្រី ដែលបានដំណើរការរលូន មានអតិថិជនបានស្គាល់ជាច្រើនមកហើយ។ ចំណែកឯអាជីវកម្មទី ២ វិញ នាងខ្ញុំ និងលោក លី វ៉ាហេដ បានចូលហ៊ុនគ្នា ដោយយើងបង្កើតកសិដ្ឋានចិញ្ចឹមឃ្មុំនៅឯម្តុំតំបន់ ស្រុកក្រូចឆ្មារ ខេត្តត្បូងឃ្មុំ យើងទើបចាប់ផ្តើមដំណើរការនៅឆ្នាំ ២០២០ នេះ»។
ទោះបីជាមានការមមាញឹកនឹងការបើករបរអាជីវកម្មដល់ទៅ ២ ផ្នែក បន្ថែមលើអាជីពសិល្បៈពិធីការិនីទូរទស្សន៍ផងនោះក្តី ក៏មិនមានអ្វីបានចោទជាបញ្ហាសម្រាប់ការងារសិល្បៈឡើយ។
ដោយតារាស្រីមានភាពប៉ិនប្រសប់ក្នុងការសម្តែងអាចបត់បែនបានគ្រប់កាយវិការ តាមតម្រូវការអ្នកដឹកនាំចង់បានអ្នកនាង សុខ សោម៉ាវត្តី ប្រាប់ថា៖ «ដូចជាមិនបានប៉ះពាល់គ្នារវាងការងាររកស៊ី និងការងារសិល្បៈនោះទេព្រោះថា នាងខ្ញុំបានបែងចែកពេលច្បាស់រវាងកិច្ចការទាំង ២ នេះដែរ»៕
