ភ្នំពេញៈ នាពេលថ្មីៗនេះ ស្រាប់តែលេចចេញវត្តមានស្វាមីក្មេងជាគ្រូផ្សំថ្នាំឱសថបុរាណ និងតារាសម្តែងស្រីសម្បូរទេពកោសល្យអ្នកនាង ស្វែង សុជាតា ដែលទើបតែបាននាំគ្នាទៅកាន់សីលដូចជាតាបស និងយាយជី នៅតំបន់ទីទួលវិបស្សនាមួយ សិ្ថតនៅភូមិជន្ទល់ ឃុំឃ្លាំងមឿង ស្រុកខ្សាច់កណ្តាល ខេត្តកណ្តាល ក្រោយពីជានាគ្នាវិញមកនោះ បានផ្សាយលក់ឱសថបុរាណ តាមបណ្តាញសង្គមយ៉ាងផុសផុល។
គេឃើញបុរសជាស្វាមីរបស់អ្នកនាង ស្វែង សុជាតា បាន Lives វីដេអូ ហ្វេសប៊ុកប្រកាសផ្សាយពីដំណឹងនៅតែបន្តលក់ថ្នាំឱសថបុរាណ ដូចមុន តែគ្រាន់តែជាការប្រកបរបរកំប៉ិកកំប៉ុកលក្ខណៈគ្រួសារតែប៉ុណ្ណោះ។ នេះបើតាមការបង្ហើបពីសំណាក់ តារាសម្តែងស្រី ដែលផុសនូវភាពល្បីខ្លាំងឡើងវិញ និងកើបប្រាក់ដុំនៅក្នុងខ្សែភាពយន្តខ្នាតធំលំដាប់ពិភពលោក ដែលបានដឹកនាំសម្តែងដោយតារាហូលីវូដអ្នកនាង អេនជេលីណា ជោលី នៅក្នុងរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» កន្លងមកនោះ។
តារាសម្តែងសម្បូរទេពកោសល្យសម្តែងកុនបានច្រើនរសជាតិទៅតាមសាច់រឿងអ្នកដឹកនាំផងនោះ ប្រាប់ភ្នំពេញប៉ុស្តិ៍បន្តថា៖ «តាមពិតទៅ ការ Lives វីដេអូហ្វេសប៊ុករបស់ប្តីខ្ញុំនេះ មានគោលបំណង ២ យ៉ាង។ ទី ១ ចង់ប្រាប់ទៅដល់បងប្អូនមួយចំនួន ចំពោះដំណឹងលេចឮថា ប្តីប្រពន្ធយើងនៅមិនទាន់ជុំគ្នាវិញទេ ហើយទី ២ ចង់ប្រាប់ថា ស្វាមីខ្ញុំ ក៏គាត់នៅបន្តផ្សំថ្នាំឱសថបុរាណលក់ជូនបងប្អូនដែលធ្លាប់ជាវយកទៅប្រើសម្រាប់ព្យាបាលជំងឺក្រពះ និងពោះវៀននោះដដែលទេ តែគ្រាន់តែជាការលក់ដូរបែបគ្រួសារប៉ុណ្ណោះ មិនមានការបើកក្រុមហ៊ុន ឬសាខា ឬសេវាកម្មដឹកជញ្ជូនតាមខេត្តក្រុងនោះដែរ។ ពេលនេះលោកគ្រូ នៅតែទទួលផ្សំថ្នាំព្យាបាលរោគក្រពះ និងពោះវៀន ដូចមុន ជាលក្ខណៈគ្រួសារ ដែលមានអាសយដ្ឋានផ្ទាល់ខ្លួននៅផ្ទះក្នុងបុរីពិភពថ្មីចម្ការដូង។ ក្រៅពីនេះ គាត់ក៏ចេះទស្សន៍ទាយពីជោគតារាសីតាមឆ្នាំនីមួយៗ ដែលមើលសម្រាប់រយៈពេល ១ ឆ្នាំ និងប្រាប់ពីវិធីដើម្បីរៀបចំគ្រឿងរណ្តាប់កាត់គ្រោះ និងនាំលាភផងដែរ»។
ឯតារាសម្តែងស្រី អ្នកនាង ស្វែង សុជាតា ក៏បង្ហើបឲ្យដឹងពីគម្រោងផែនការលក់ផលិតផលក្រែមលាបបបូរមាត់ ដែលផលិតដោយក្រុមកូនខ្មែរ នាពេលឆាប់ៗនេះផងដែរថា៖ «អាចនឹងកៀកថ្ងៃចូលឆ្នាំថ្មីនេះ ឬអាចក្រោយចូលឆ្នាំ នាងខ្ញុំនឹងលក់ផលិតផលក្រែមលាបបបូរមាត់របស់ ខ្មែរមួយប្រភេទ ដោយនាងខ្ញុំបានដាក់ឈ្មោះថា «ក្រែមសុជាតា» ដែលខ្ញុំចង់បង្ហាញឲ្យគេបានស្គាល់ពីផលិតផលរបស់ខ្មែរ ហើយក៏គិតថាជាផលិតផលមួយមិនមានផលប៉ះពាល់អ្វីទៅដល់បញ្ហាសុខភាពរបស់អ្នកប្រើប្រាស់នោះឡើយ សម្រាប់របរមួយនេះ។ ដោយនាងខ្ញុំមិនទាន់មានពេលរៀបចំទាន់ទើបមិនទាន់បានផ្សាយប្រាប់បងប្អូនយើង»៕