.jpg)
យានរបស់ Virgin Galactic មានលក្ខណៈប្រហាក់ប្រហែលទៅនឹងយន្តហោះឯកជន។ AFP
ក្រុងវ៉ាស៊ីនតោន: ក្រុមហ៊ុនអវកាសឈានមុខគេចំនួន ២ ដែលមានមហិច្ឆតានាំទេសចរទៅកាន់អវកាសបាននិយាយថា នៅតែប៉ុន្មានខែទៀតទេ ភ្ញៀវនឹងត្រូវធ្វើដំណើរចាកចេញពីភពផែនដី ប៉ុន្តែទោះជាយ៉ាងណា ក៏ក្រុមហ៊ុននោះមិនទាន់កំណត់កាលបរិច្ឆេទជាក់លាក់នៅឡើយ។
ក្រុមហ៊ុនអវកាស Virgin Galactic របស់មហាសេដ្ឋីអង់គ្លេស រីឆាដ ប្រានស៊ិន និងក្រុមហ៊ុនអវកាស Blue Origin បង្កើតឡើងដោយ ជេហ្វ ប៊ីហ្សូស៍ ជានាយកប្រតិបត្តិក្រុមហ៊ុន Amazon កំពុងបញ្ចប់ការធ្វើតេស្តដោយប្រើបច្ចេកវិទ្យាខុសគ្នាខ្លាំង។
ទោះជាយ៉ាងណាក្ដីទាំងអ្នកដំណើររបស់ក្រុមហ៊ុន Virgin និង Blue Origin នឹងមិនហោះជុំវិញផែនដីទេ ហើយឱកាសអណ្ដែតខ្លួនក្នុងបរិយាកាសសុញ្ញកាសមិនមានទំនាញ ផែនដីក៏មានរយៈពេលខ្លីតែ ប៉ុន្មាននាទីប៉ុណ្ណោះ។
អ្នកទេសចរទៅកាន់អវកាសកាលពីអំឡុងឆ្នាំ ២០០៦។ AFP
តាមពិត បទពិសោធនេះខុសគ្នាឆ្ងាយ ពីភ្ញៀវទេសចរអវកាសលើកដំបូងបំផុត ដែលបានចំណាយប្រាក់រាប់សិបលានដុល្លារ ដើម្បីធ្វើដំណើរទៅកាន់ស្ថានីយអវកាសអន្ដរជាតិ (ISS) កាលពីឆ្នាំ ២០០៦។
ដោយត្រូវចំណាយទិញសំបុត្រតម្លៃថោកត្រឹមតែ ២៥ ម៉ឺនដុល្លារ ភ្ញៀវទេសចររបស់ក្រុមហ៊ុនអវកាស Virgin នឹងត្រូវធ្វើដំណើរច្រើនគីឡូម៉ែត្រ ដើម្បីចូលទៅលំហបរិយាកាសតែមួយភ្លែត និងត្រូវត្រឡប់មកកាន់ផែនដីវិញ។
បើប្រៀបធៀបគ្នា ស្ថានីយអវកាសអន្ដរជាតិ (ISS) គឺស្ថិតនៅលើគន្លង ដែលមានចម្ងាយ ៤០០ គីឡូម៉ែត្រពីភពផែនដីរបស់យើង។ នៅក្នុងរយៈកម្ពស់នេះ ផ្ទៃមេឃមើលទៅគឺងងឹត ហើយទ្រង់ទ្រាយកោងមូលរបស់ផែនដី នឹងត្រូវបានមើលឃើញយ៉ាងច្បាស់។
ផ្នែកមួយនៃការធ្វើតេស្តគម្របរ៉ុក្កែតរបស់ Blue Origin។ AFP
ធ្វើដំណើរជាមួយយានរបស់ក្រុមហ៊ុនអវកាស Virgin Galactic មានអ្នកដំណើរចំនួន ៦ នាក់ រួមនឹងអ្នកបើកបរ ២ នាក់ដោយត្រូវជិះយានស្រដៀងនឹងយន្តហោះឯកជនដែរ។
ក្រុមហ៊ុន Virgin បានប្រាប់ AFP ថា មានមនុស្សប្រហែល ៦៥០ នាក់ បានស្ថិតនៅក្នុងបញ្ជីរង់ចាំធ្វើដំណើរ។ ទន្ទឹមនឹងនេះដែរ ក្រុមហ៊ុនអវកាស Blue Origin បានបង្កើតប្រព័ន្ធមួយស្រដៀងទៅនឹងមុខងាររ៉ុក្កែត ដែលហៅថា New Shepard។
នាយកប្រតិបត្តិក្រុមហ៊ុនលោក Rob Meyerson ថ្លែងកាលពីខែមុនថា ការធ្វើតេស្តលើកដំបូងលើមនុស្សនឹងធ្វើក្នុងពេលឆាប់ៗនេះ»៕
