ក្រុងកុលកាតា: ឆ្មាំព្រៃឥណ្ឌាម្នាក់បានធ្វើឲ្យខ្លួនជួបទុក្ខ ក្រោយសត្វពស់ថ្លាន់មួយក្បាលសុខៗស្រាប់តែរឹតកលោកពេលកំពុងថតរូបជាមួយវា។ មន្ដ្រីសត្វព្រៃ សានចាយ ឌុតតា ត្រូវបានអ្នកភូមិដែលភ័យស្លន់ស្លោខលហៅកាលពីថ្ងៃអាទិត្យនៅរដ្ឋវ៉េសបេនហ្គាល់ ក្រោយពីពួកគេបានឃើញពស់ថ្លាន់ទម្ងន់ ៤០ គីឡូក្រាម ១ ក្បាលបានលេបពពែទាំងរស់។
ដោយមិនចាប់ដាក់ទុកក្នុងថង់សុវត្ថិភាព ឆ្មាំព្រៃរូបនោះ បានលើកពស់មករុំនឹងកខ្លួន-ឯង និងថតរូបជាមួយអ្នកភូមិហែហម។ ប៉ុន្ដែរឿងរ៉ាវផ្ដើមកើតឡើងពេលពស់ធំមួយក្បាលនោះបានរឹតក ធ្វើឲ្យលោក ឌុតតា ព្យាយាមរើបម្រះខ្លួនមួយទំហឹង។
លោកបានរួចផុតពីគ្រោះថ្នាក់ តែរាងក្រហមមុខបន្ដិចដែរ។ ពស់ថ្លាន់ថ្មឥណ្ឌា ជាពូជពស់គ្មានពិស តែវាអាចសម្លាប់ចំណីដោយការរុំរឹត និងអាចធំវែងដល់ប្រវែង ១០ ម៉ែត្រ។
នាយកដ្ឋានរុក្ខារដ្ឋវ៉េសបេនហ្គាល់ បានធ្វើការសាកសួរ តែ លោក ឌុតតា បាននិយាយថា លោកគ្រាន់តែចង់សង្គ្រោះជីវិតសត្វល្មូនពីអ្នកភូមិ ដែលហៀបនឹងប្រើកាំបិតប្រហារវាទៅហើយ។ លោកអត់មានថង់ធំសម្រាប់ញាត់ពស់បញ្ជូនទៅកាន់ទីតាំងមានសុវត្ថិភាព។
លោកអះអាងថា៖ «ខ្ញុំអត់មានខ្លាចអីបន្ដិចទេពេលនោះ ព្រោះបើខ្ញុំស្លន់ស្លោ ច្បាស់ជាយ៉ាប់មិនខាន»៕