ភ្នំពេញៈ ថ្មីៗនេះកម្រងសៀវភៅរូបភាពរឿងរាមកេរ្តិ៍ខ្មែរមានចំនួន ៤៦៦ ទំព័រជាស្នាដៃអ្នកថតរូបជាតិអាល្លឺម៉ង់លោក Arjay Stevens ក្រោមចំណងជើងថា« រាមកេរ្តិ៍ខ្មែរ អាទិទេព យក្ស និងវីរជន» ឬជាភាសាអង់គ្លេស «Reamker The Cambodian Ramayana''s God Demons and Heroes» បានបោះពុម្ពផ្សាយ និងដាក់បង្ហាញលក់លើកដំបូងកាលពីចុងសប្តាហ៍មុននៅឯវិទ្យាស្ថានពុទ្ធសាសនបណ្ឌិត្យ។
សៀវភៅបែបជាកម្រងរូបថតនៃរឿងរាមកេរ្តិ៍ខ្មែរនោះមានការសរសេរ ៤ ភាសាឯណោះគឺមានភាសាខ្មែរ អង់គ្លេស អាល្លឺម៉ង់ និងបារាំង ហើយមានកម្រាស់ ៤៦៦ ទំព័រដែលជាសៀវភៅមានរូបពណ៌ធម្មជាតិ និងគុណភាពខ្ពស់។
នេះគឺជាសៀវភៅរូបភាពដែលបានរួមបញ្ចូលគ្នានូវគ្រប់ទម្រង់វត្ថុសិល្បៈ និងការសម្តែងនៃរឿងរាមកេរ្តិ៍ខ្មែរនៅក្នុងសៀវភៅតែមួយក្រោយពីលោក Arjay Stevens បានសន្សំអស់រយៈពេល ២២ ឆ្នាំ។
តាមលោក ស សុខនី ប្រធានវិទ្យាស្ថានពុទ្ធសាសនបណ្ឌិត្យ បង្ហើបប្រាប់ពីដំណើរនៃការចងក្រងនូវកម្រងរូបថតដើម្បីបង្កើតជាសៀវភៅទើបបោះពុម្ពនេះថា៖ «លោក Arjay Stevens មកដល់ប្រទេសកម្ពុជាដំបូងនៅក្នុងឆ្នាំ ១៩៩៦ ហើយលោកបានចាប់អារម្មណ៍ប្រទេសកម្ពុជាយ៉ាងខ្លាំងលោកបានចងក្រងឯកសារផ្សេងៗមួយចំនួនពាក់ព័ន្ធនឹងកម្ពុជានាពេលដែលកម្ពុជាទើបចាកចេញពីសង្គ្រាមស៊ីវិល និងក្រសោបយកប្រព័ន្ធដឹកនាំបែបលទ្ធិប្រជាធិបតេយ្យ។ ក្រោយមកលោកក៏បានចាប់អារម្មណ៍នឹងវិស័យសិល្បៈវប្បធម៌បន្ថែមទៀតតាមរយៈផ្ទាំងគំនូរតួអង្គនានានៃរឿងរាមកេរ្តិ៍ខ្មែរ ដូច្នេះលោកក៏ផ្តើមនូវការប្រមូលចងក្រងជារូបថតជាមួយកាមេរ៉ារបស់លោកពីពេលនោះមក។ ចំពោះរូបថតលោកមានច្រើនប្រភពគឺថតរូបបានមកពីតាមជញ្ជាំង ឬពិតាននៃព្រះវិហារនានាក្នុងទីអារាមដែលមានគូររូបតួអង្គរឿងរាមកេរ្តិ៍តាមជញ្ជាំងនៃព្រះបរមរាជវាំងនៅភ្នំពេញតាមការសម្តែងល្ខោនខោល ឬល្ខោនស្បែកដែលមានសម្តែងរឿងរាមកេរ្តិ៍ និងតាមក្បួននាវាប្រទីបពេលប្រារព្ធពិធីបុណ្យអុំទូកផងដែរ»។
លោកបន្តថា៖ «សៀវភៅកម្រងរូបថតរឿងរាមកេរ្តិ៍ខ្មែរ អាទិទេព យក្ស និងវីរជននេះបានបោះពុម្ពចំនួនប្រមាណ ២៥០ ក្បាលដែលមានចំនួន ៤៦៦ ទំព័រ ជាប្រភេទសៀវភៅមានគុណភាពខ្ពស់ដូចជាមានទំហំធំជាងក្រដាស A4។ លោក Arjay Stevens ដែលជាអ្នកចងក្រងសៀវភៅរូបភាពនេះក៏បានធ្វើបទបង្ហាញកាលពីថ្ងៃសៅរ៍ទី ៩ ខែមីនាកន្លងមកនៅវិទ្យាស្ថានពុទ្ធសាសនបណ្ឌិត្យផងដែរ។ ចំពោះការជាវសៀវភៅនេះតម្លៃមាន ២ ប្រភេទគឺទី ១ សៀវភៅ ១ ក្បាលតម្លៃ ៩០ ដុល្លារ និងទីពីរ ១ ក្បាលតម្លៃ ៩៥ ដុល្លារដែលមានគម្របសៀវភៅរឹង ខណៈតម្លៃនេះអាចនឹងប្រែប្រួលប្រសិនបើទៅរកជាវនៅតាមបណ្ណាគារ ឬស្តង់លក់សៀវភៅនានា»៕